فوتو: parlam.kz
دەپۋتاتتىڭ پىكىرىنشە كىتاپتار مەن باسپانى قولداعان ءجون. ەگەر ققس-تى تومەندەتپەسەك, كىتاپتار ودان سايىن قىمباتتايدى. ال بالالار YouTube پەن TikTok قانا كورەدى. فرانتسيا, جاپونيا سياقتى ەلدەردە كىتاپقا مۇلدە ققس سالىنبايدى نەمەسە ۇلكەن جەڭىلدىكتەر بار.
«بۇرىن سوعىس كەزىندە ادامدار وت ىشىنەن كىتاپتى الىپ شىعاتىن. ال ءبىز قازىر سولاي قۇرمەتتەلگەن كىتاپقا سالىق سالىپ وتىرمىز. سوندىقتان كىتاپ پەن بالالارعا ارنالعان باسپا ونىمدەرىنەن ققس-تى الىپ تاستايىق», دەدى ماجىلىسمەن.
ا.ايماعامبەتوۆتىڭ ايتۋىنشا تەاتر, كىتاپحانا, مۇراجاي, قولونەر – بيزنەس ەمەس, ءبىزدىڭ مادەنيەتىمىز.
«ديۆاندارى مەن كرەسلولارى بار تەاتر – كەڭەستىك داۋىردەن, ال كىتاپتارى سارعايعان كىتاپحانا – ساۋدا ورتالىقتارىنداي سالىق تولەمەۋى كەرەك. بۇل مەكەمەلەردى كورپوراتيۆتىك تابىس سالىعىنان بوساتۋ قاجەت», دەدى دەپۋتات.
ماجىلىسمەننىڭ سوزىنشە, ەمدەۋ جانە ءدارى-دارمەك بويىنشا دۇرىس قادام جاسالدى.
«راك, سيرەك كەزدەسەتىن اۋرۋلار, ديابەت ماسەلەلەرى تۇرعىسىندا ۇكىمەت ءبىزدىڭ ۇسىنىستى قولدادى. بۇل ماڭىزدى قادامدى مىڭداعان وتباسى سەزىنەدى. بىراق ودان باسقا دا ماڭىزدى اۋرۋلار جانە دارىلەر بار. ەپيلەپسيا, پسيحيكالىق بۇزىلىستار, ينسۋلتتان كەيىنگى قالپىنا كەلۋ – بۇلار دا ءومىر ساپاسىن انىقتايتىن جاعدايلار, بۇنداي سىرقات بەلگىلەرى بويىنشا دا سالىق سالۋ – ادىلەتسىزدىك. قازىر 10% ققس ومىرلىك ماڭىزدى دارىلەرگە دە سالىنىپ جاتىر. ەگەر ءبىز دەنساۋلىق سالاسىندا گۋمانيستىك سالىق ساياساتىن باستادىق دەسەك – سوڭىنا دەيىن بارۋىمىز كەرەك», دەگەن دەپۋتات ءوز سوزىندە حالىقتىڭ 40%-ى ەمدەلۋگە ءوز قالتاسىنان تولەيتىنىن ت.ب. جايتتاردى ايتتى.
«ال, ترانسجيرگە – اكتسيز كەرەك», دەگەن اسحات ايماعامبەتوۆتىڭ ايتۋىنشا كوپ ادام ءتاتتى نارسەلەردى جاقسى كورگەنىمەن, ترانسجير – ءۇنسىز قاۋىپ. كوپ ەلدەر وعان مۇلدە تىيىم سالعان. راك, سەمىزدىك, جۇرەك-قان تامىر اۋرۋلارى, ديابەت – سونىڭ دا سالدارى. ترانسجيرگە اكتسيز – قاۋىپسىزدىك بەلبەۋى سەكىلدى, قيىن مەزەتتە ءومىردى ساقتاپ قالادى.
دەپۋتاتتىڭ تاعى ءبىر توقتالعان ماسەلەسى – قازاقشا مۋلتفيلمدەردىڭ از ەكەنى, ال سالىقتىڭ مولدىعى.
«بۇگىندە بالالاردىڭ كوبى باسقا تىلدەگى TikTok پەن Netflix عانا كورەدى. مەملەكەتتىك تىلدە كونتەنت از. ويتكەنى, ءبىزدىڭ انيماتسيالىق ستۋديالار ءار كادر ءۇشىن ققس تولەيدى. قازاقشا مۋلتفيلم شىعارۋ قىمبات. وڭتۇستىك كورەيا, پولشا, فرانتسيا ءوز انيماتسيالارىن قورعايدى. بىزگە دە سول قاجەت», دەدى دەپۋتات.
ال, كازينولارعا سالىقتى 20%, 30%, 50%-عا دەيىن باتىل كوتەرۋ كەرەك ەكەنىن ايتقان ا.ايماعامبەتوۆتىڭ سوزىنشە ءاربىر ۇتىلعان ستاۆكا – ءبىر وتباسىنىڭ ءۇمىتى, ەندەشە بۇل – بيزنەس ەمەس, بۇل – ءۇمىتتى جۇتاتىن يندۋستريا.
ء«بىزدىڭ ۇسىنىپ وتىرعانىمىز – جەڭىلدىك ەمەس, ادىلەتتىلىك. سالىق جۇيەسى مۇقتاجعا دەمەۋ بولۋى ءتيىس. سمارتفون – كىتاپتان ارزان بولماۋى كەرەك. ەنەرگەتيكالىق سۋسىن – سۋدان ارزان بولماۋى كەرەك. وسى ۇسىنىستاردى قولدايىق», دەپ تۇيىندەدى ءماجىلىس دەپۋتاتتى اسحات ايماعامبەتوۆ.
