فوتو: ۇكىمەت
«كولىك, ساۋدا, ۇلتتىق ەكونوميكا, تۋريزم مينيسترلىكتەرى مەن اكىمدىكتەر جول بويىنداعى سەرۆيستى جاقسارتۋ جۇمىستارىن جالعاستىرسىن. كۇرە جولدىڭ بويىنداعى ءدامحانالار, جانارماي قۇيۋ بەكەتتەرى مەن تەحنيكالىق قىزمەت كورسەتۋ ستانتسيالارى قابىلدانعان ستاندارتتارعا ساي بولۋى كەرەك. سونداي-اق وسى بيزنەستە جۇمىس ىستەيتىن كاسىپكەرلەردى ىنتالاندىرۋ ماسەلەسىن پىسىقتاۋدى تاپسىرامىن. بۇل رەتتە تۋريستەردىڭ قاۋىپسىزدىگىن ارتتىرۋعا ەرەكشە نازار اۋدارىلسىن. بۇكىل ينفراقۇرىلىمعا – اۋەجايلاردان باستاپ قوناق ۇيلەرگە, ساۋدا نۇكتەلەرىنە, تاماقتانۋ ورىندارىنا, كونتسەرت الاڭدارىنا دەيىن – قاۋىپسىزدىك پەن جايلىلىق تۇرعىسىنان رەۆيزيا جۇرگىزىلۋى قاجەت», دەپ اتاپ ءوتتى ولجاس بەكتەنوۆ.
سونىمەن قاتار تۋريزم, مادەنيەت, دەنساۋلىق ساقتاۋ, ىشكى ىستەر مينيسترلىكتەرى, ارناۋلى مەملەكەتتىك ورگاندار الدىنا اۋقىمدى مادەني, سپورتتىق جانە تۋريستىك ءىس-شارالاردى وتكىزۋ كەزىندە بارىنشا جاردەم كورسەتۋ مىندەتى قويىلدى.
«ولاردى ۇيىمداستىرۋ مەن وتكىزۋ دەڭگەيى ەكونوميكالىق پايدا اكەلىپ قانا قويماي, ەلىمىزدىڭ ءيميدجىن نىعايتىپ, ينۆەستورلار مەن تۋريستەر ءۇشىن تارتىمدىلىقتى ارتتىرا تۇسەدى», دەپ اتاپ ءوتتى پرەمەر-مينيستر.
