اسكەري قىزمەتشىلەردىڭ ارقاسىندا اتا-اناسىنان اداسىپ, مەكەن جايدان جاڭىلعان 15 بالا جاقىندارىنا تابىستالدى. ۇلاندىقتاردىڭ قاتىسۋىمەن 11 ءورت ءسوندىرۋ جانە ادامداردى قۇتقارۋ فاكتىسى تىركەلگەنىن دە اتاپ وتكەن ءجون. اسكەري جاساق جاۋىنگەرلەرى 45 ادامنىڭ جوعالعان زاتتارىن تاۋىپ, 91 سمارتفوندى يەلەرىنە تابىستادى. جاۋىنگەرلىك قىزمەت بارىسىندا ساربازدار جۇرەك تالماسى مەن دەمىكپەسى بار ادامدارعا, جول-كولىك اپاتىنا دۋشار بولعان جاندارعا نەمەسە وزىنە-ءوزى قول جۇمساماق بولعاندار مەن سۋعا باتقان كىسىلەرگە دەر كەزىندە كومەك كورسەتىپ جاتادى. ءۇش ايدىڭ ىشىندە ۇلتتىق ۇلان اسكەري قىزمەتشىلەرى 21 ادامعا العاشقى مەديتسينالىق كومەك كورسەتتى. بۇدان بولەك, ءتۇرلى قۇقىق بۇزۋشىلىقتارعا جول بەرگەن 4 938 ازامات ىشكى ىستەر ورگاندارىنا جەتكىزىلگەن. ولاردىڭ 194-ءى قىلمىستىق بەلگىلەرمەن ۇستالعان.
وسىنداي ناتيجەلى قىزمەت بارىسىندا بەلسەندىلىك تانىتقان جاۋىنگەرلەرگە قۇرمەت كورسەتىلدى.
ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى اڭساعان بالتابەكوۆ جىلدىڭ العاشقى توقسانىنداعى قىزمەت قورىتىندىسى بويىنشا بىرقاتار اسكەري قىزمەتشىنى ماراپاتتادى.
«ۇلتتىق ۇلان اسكەري قىزمەتشىلەرى تىنىشتىق جولىندا تىنباي تەر توگىپ, ىشكى تۇراقتىلىق پەن بەيبىت كۇننىڭ تىرەگى بولىپ كەلەدى. ساربازدارىمىز ادال قىزمەتتەرىمەن ەل قاۋىپسىزدىگىنە ەلەۋلى ۇلەس قوسۋدا. جاۋىنگەرلەرىمىزدىڭ جارقىن ىستەرى مەن قىزمەتتەگى جەتىستىكتەرى – وسىعان ناقتى دالەل!», دەدى گەنەرال-مايور ا.بالتابەكوۆ.
بۇعان دەيىن استانادا 5573 اسكەري ءبولىمىنىڭ جاۋىنگەرلەرى ءورت شىققان جاتاقحانادان 60-تان اسا ادامدى قاۋىپسىز جەرگە ەۆاكۋاتسيالاپ, قاۋىپتىڭ الدىن العان بولاتىن.
«قىزمەت بارىسىندا جاقىن ماڭداعى جاتاقحانالاردىڭ بىرىنەن شىققان ءتۇتىندى بايقاپ, جەدەل جەتىپ باردىم. ورتەنىپ جاتقان عيماراتتىڭ ىشىنە ەنىپ, باستاپقى ساتتە قارتتار مەن بالالاردى سىرتقا الىپ شىقتىم. جوبامەن قاۋىپسىز ايماققا 30 شاقتى ادامدى شىعاردىم. وسى كەزدە وزگە دە قارۋلاستارىم كومەككە كەلدى. ابىروي بولعاندا, ورتتەن زارداپ شەككەندەر بولمادى. ال بۇگىن قىراعى قىزمەتىمىز بەن حالىققا كورسەتكەن كومەگىمىز ءۇشىن ءبىزدى ۇلتتىق ۇلان باس قولباسشىسى ءوزى كەلىپ ماراپاتتادى. بۇل مەن ءۇشىن عانا ەمەس, اتا-انام مەن باۋىرلارىم ءۇشىن دە ۇلكەن قۋانىش», دەدى قاتارداعى جومارت جۇمابەك.
سونداي-اق ناۋرىز ايىندا ورال قالاسىندا ۇلاندىق ساربازدار ءجاسوسپىرىمدى ءبىر توپ بوزبالانىڭ الىمجەتتىك ارەكەتىنەن قۇتقارىپ قالدى. وسى وقيعاعا ۇقساس جاعداي قاڭتار ايىندا ەلوردادا دا بولدى. جالپى مۇنداي مىسالدار جەتىپ ارتىلادى. جوعالعان بالالاردى تابۋ, بۇزاقىلار مەن قىلمىسكەرلەردى قۇرىقتاۋدان بولەك, ەسىرتكى تاسىمالداۋشىلاردى ۇستاۋدا, ادام ومىرىنە اراشا بولۋدا ۇلاندىقتار كاسىبي شەبەرلىكتەرىمەن ءجيى كوزگە تۇسەدى.
جالپى اسكەري بورىشىن ادال ورىنداعانى, قوعامدىق ءتارتىپ پەن قاۋىپسىزدىكتى قامتاماسىز ەتۋدە قايسارلىق تانىتقانى ءۇشىن رەسپۋبليكا بويىنشا قۇقىقتىق ءتارتىپ اسكەرىنىڭ 57 جاۋىنگەرى ماراپاتتالدى. ولاردىڭ 52-ءسى ۇلتتىق ۇلان باس قولباسشىسىنىڭ العىس حاتتارىن يەلەنسە, 5 ساربازعا «قوعامدىق ءتارتىپتى ساقتاعانى ءۇشىن» كەۋدە بەلگىلەرى تابىستالدى.
ايتا كەتەيىك, قۇقىقتىق ءتارتىپ اسكەرىنىڭ جەكە قۇرامى ساقشىلارمەن بىرلەسىپ ەلىمىزدىڭ 21 قالاسىندا قوعامدىق ءتارتىپتى قاداعالايدى. بۇل مىندەتتى اتقارۋعا كۇن سايىن اسكەر بويىنشا 8 000-نان اسا ۇلاندىق جۇمىلدىرىلادى.
