اشىلۋ سالتاناتىندا وبلىس اكىمى مارات احمەتجانوۆ جاڭا يننوۆاتسيالىق جوبانىڭ ماڭىزىنا توقتالىپ, جاسالىپ جاتقان يگى ىستەر جايىندا بايانداپ بەردى. ورتالىق ديرەكتورى باقىت سماعۇل جاڭا مەكەمە اعا بۋىنعا جايلى ورىن بولاتىندىعىنا سەنىم ءبىلدىردى. ايتسا ايتقانداي, عيمارات تولىق جاڭارتىلعان. قۇتتى قۇرىلىسشىنىڭ قالاعىنان جاڭا شىققانداي جارقىراپ تۇر. ەڭ باستىسى, زاماناۋي جابدىقتارمەن قامتاماسىز ەتىلىپتى. نەگىزگى قىزمەتى – ەمدىك, دەنە شىنىقتىرۋ, يوگا, سكانديناۆيالىق ءجۇرىس, ۆوكال, حورەوگرافيا, قولونەر شەبەرلىگىن دامىتۋ, شاحمات, توعىزقۇمالاق, اسىق اتۋ ءتارىزدى ويىندارعا قىزىعۋشىلىقتى ارتتىرۋ. كومپيۋتەرلىك ءبىلىم الۋعا تولىق مۇمكىندىك جاسالعان.
– مەن وبلىس ورتالىعىنداعى اۆتوكولىكتەردى جوندەۋ ستانساسىندا جارتى عاسىرعا جۋىق ەڭبەك ەتتىم, ۇزاق ۋاقىتتان بەرى شاحماتپەن اينالىسامىن, – دەيدى قالا تۇرعىنى ساكەن تاڭىرقۇلوۆ. – ورتالىق زەينەتكەرلەردىڭ باس قوسىپ, شۇيىركەلەسەتىن, ءتۇرلى ويىندار ويناپ, وزدەرى قىزىعاتىن شارۋامەن شۇعىلداناتىن ورىنعا اينالعالى تۇر. ەڭ باستىسى, مەملەكەت تاراپىنان اعا بۋىنعا ايتا قالارلىقتاي قامقورلىق جاسالىپ وتىر.
اشىلۋ سالتاناتىندا فرانتسياداعى حالىقارالىق كۇمىس ۋنيۆەرسيتەتتەر قاۋىمداستىعىنىڭ پرەزيدەنتى, پروفەسسور فرانسۋا ۆەللاس ونلاين بايلانىسقا شىقتى. پروفەسسور ورتالىقتىڭ اشىلۋىمەن قۇتتىقتاپ, جارقىن جوبا جونىندەگى لەبىزىن ءبىلدىردى.
ورتالىقتا ارنايى مەديتسينالىق كابينەت بار. وندا دارىگەر كەلۋشىلەردىڭ دەنساۋلىقتارىن قاداعالايدى. اپپاراتتىق بازا ازىرلەنىپ, ەم-دومنىڭ قاجەتتىلىكتەرى ەكشەلەنەدى. جاڭا عيماراتتا ارداگەرلەر كەڭەسى دە ورنالاسپاق.
جاڭا جوبانى جۇزەگە اسىرۋعا مەتسەناتتار دا قاتىسىپتى. بۇل دا بولسا, جاقسى نىشان, جارقىن مىسال. وڭىردەگى مەملەكەتتىك جانە جەكەمەنشىك ۋنيۆەرسيتەتتەر ىنتىماقتاستىق مەموراندۋمىنا قول قويدى.
كوكشەتاۋ
