لاپاروسكوپيالىق ءادىس ءداستۇرلى وپەراتسيامەن سالىستىرعاندا اناعۇرلىم زاماناۋي جانە از ءينۆازيۆتى. وسىعان دەيىن ۇلىتاۋ وبلىسىندا مۇنداي حيرۋرگيالىق ارالاسۋ ۇزىندىعى 30 سانتيمەترلىك تىلىك ارقىلى جاسالاتىن. بۇل ناۋقاستاردىڭ قالىپتى ومىرگە ورالۋى مەن وپەراتسيادان كەيىنگى ايىعۋىن قيىنداتا تۇسەتىن. ال, تىلىكسىز ءادىس پاتسيەنتتەرگە وپەراتسيادان سوڭ 1-2 ساعات ىشىندە اياققا تۇرىپ كەتۋىنە مۇمكىندىك بەرەدى.
وپەراتسيالار مىندەتتى الەۋمەتتىك مەديتسينالىق ساقتاندىرۋ ەسەبىنەن, ياعني اقىسىز جۇرگىزىلدى. تەرمينالدىق گيدرونەفروز (بۇيرەكتىڭ جارامسىزدىعى) دياگنوزى بويىنشا ەسەپتە تۇرعان ەكى ناۋقاس تا ءمامس جۇيەسىندە ساقتاندىرىلعان.
ايبات بايجانتاەۆ 50 جاستا, وعان جۇمىس بەرۋشىسى اي سايىن ءمامس تولەمدەرىن اۋدارسا, ساتباەۆتىق ليۋبوۆ پاحاروكوۆا – زەينەتكەر رەتىندە جەڭىلدىك ساناتىندا.
بۇل وپەراتسيا ۇلىتاۋ وبلىسىندا العاش رەت جۇرگىزىلگەنىن اتاپ ءوتۋ ماڭىزدى. بۇرىن مۇنداي ارالاسۋدى جۇزەگە اسىرۋ ءۇشىن پاتسيەنتتەر باسقا قالالارعا بارۋعا ءماجبۇر بولاتىن, بۇل ايتارلىقتاي قولايسىزدىقتار تۋدىراتىنى بەلگىلى. الايدا, بۇگىنگى تاجىريبە الماسۋعا مۇمكىندىك بەرگەن شەبەرلىك سىنىبىنان كەيىن جەزقازعان ۋرولوگتارى مۇنداي وپەراتسيالاردى ءوز بەتىنشە جاساي بەرمەك.
جالپى 2025 جىلدىڭ باسىنان مەديتسينالىق ورتالىقتىڭ ۋرولوگيا بولىمىندە ءمامس شەڭبەرىندە 100 ناۋقاسقا وتا جاسالدى.
