بۇل شارادا 200 ادام ءبىر مەزەتتە ارقان تارتىپ, وسىناۋ ۇلتتىق سپورتتىڭ بۇعان دەيىن بولماعان ناتيجەسىن كورسەتكەن. ء«بىز بۇل ءىس-شارانى سالاۋاتتى ءومىر سالتىن ناسيحاتتاۋ, ۇلتتىق مۇرامىزدى ۇلىقتاۋ جانە جاستاردىڭ سپورتقا قىزىعۋشىلىعىن ارتتىرۋ ءۇشىن ۇيىمداستىردىق» دەيدى وبلىستىق دەنە شىنىقتىرۋ جانە سپورت باسقارماسى وكىلدەرى.
ءبىر قىزىعى, 200 ادام قاتىساتىن تارتىسقا 300 مەترلىك ارقان كەرەك بولىپتى. مۇنداي ارقاننىڭ ەڭ ۇزىنى 100 مەتردەن اسپايدى ەكەن. ءسويتىپ, الماتى قالاسىنان الدىرىلعان ءۇش بولەك ارقاندى ءبىر بىرىنە جالعاۋعا تۋرا كەلىپتى. «ال كوماندا جيناۋدا ەش قيىندىق بولمادى. سايىسقا تەك سپورتشىلار ەمەس, قالا تۇرعىندارى, جاستار ۇيىمدارىنىڭ بەلسەندىلەرى قاتىستى» دەيدى باسقارمانىڭ ءباسپاسوز قىزمەتىنىڭ جەتەكشىسى اينۇر قاسەنوۆا.
سايىسقا تۇسكەن كوماندانىڭ ءبىرى - «جايىق», ءبىرى - «ەدىل» دەگەن اتاۋدى تاڭداپ الىپتى. قىزىقتى دا تارتىستى وتكەن باسەكەدە «جايىق» كومانداسى جەڭىسكە جەتىپ, كوپشىلىكتىڭ قوشەمەتىنە بولەندى.
قازاقستاندا ەڭ كوپ ادام قاتىسقان ارقان تارىستى رەسمي تىركەپ الۋ ءۇشىن ورال قالاسىنا قازاقستان رەكوردتار كىتابىنىڭ رەسمي وكىلى قۋاندىق قۇدايبەرگەنوۆ ارنايى شاقىرىلعان بولاتىن. ول ۇلتتىق سپورت دوداسىن باستان اياق تاماشالاپ, شىنىمەن دە رەكورد ورناتىلعانىن جاريالادى. ءسويتىپ, ۇيىمداستىرۋشىلارعا ارنايى سەرتيفيكات سالتاناتتى تۇردە تابىستالدى.
باتىس قازاقستان وبلىسى
