ءساۋىر ايى باستالىسىمەن قىرعىزستان, تۇرىكمەنستان, تۇركيا, وزبەكستان, ءازىربايجان ەلدەرىنەن ونەرپازدار دەلەگاتسياسى كەلە باستادى. اقتاۋلىقتار ولاردى تەڭىز جاعاسىنا ارنايى قۇرىلعان «دارحان دالا» ەتنو قالاشىعىندا قارسى الدى.
«دارحان دالا» ەتنو-قالاشىعىنداعى ماڭعىستاۋ وبلىسىنىڭ ءار اۋدان, قالالارىنا ءبولىپ بەرىلگەن «سۋىن ايعىر», «شەرقالا», ء«داستۇر», «باتىرلار», «جەتى قايقى», «عاشىقتار» جانە «شەبەرلەر» اۋىلدارى قويىلىمدار قويىپ, اننەن شاشۋ شاشىپ, كورمەلەردى تانىستىرىپ, شەبەرلىك ساعاتتارىن وتكىزدى. سالت-ءداستۇر مەن مادەنيەتتى دارىپتەگەن ءىس-شارا بىرنەشە كۇنگە جالعاستى.
كيىز باسۋ, ۇرشىق ءيىرۋ, كەلىن ءتۇسىرىپ, بەت اشۋ, ۇلتتىق بي, سونداي-اق قولونەر بۇيىمدارىنان كورمە ۇيىمداستىرىپ, حالقىمىزدىڭ ۇلتتىق باي تاريحى, ونەرى قوناقتار نازارىنا ۇسىنىلدى. قوناقتار دا قالىس قالماي, ءوز بۇيىمدارىن, ۇلتتىق ەرەكشەلىكتەرى مەن جادىگەرلەرىن جايىپ كورسەتتى.
بىرنەشە كۇن قاتارىنان وبلىس اۋداندارىنان كەلگەن ونەرپازدار ءان مەن جىردى اۋەلەتە كونتسەرت قويدى. مىسالى 5 ءساۋىر كۇنى تۇپقاراعاندىق ونەرپازدار باستاعان مەرەكەلىك كونتسەرت تۇركسوي ارتىستەرىنىڭ گالا كونتسەرتىنە جالعاسسا, تۇستە مۇنايلى اۋدانى ءان-جىردان شاشۋ شاشتى. تۇسقايتا جاڭاوزەن قالاسى مەن ماڭعىستاۋ اۋدانى ونەرپازدارى دايىنداعان كونتسەرتتىك باعدارلاماسى ۇسىنىلدى.
اقتاۋداعى ايتۋلى مەرەكەگە تۇركسوي-عا مۇشە مەملەكەتتەردەن 200-گە جۋىق قوناق كەلدى. ولاردىڭ اراسىندا 50-گە جۋىق لاۋازىمدى تۇلعالار مەن حالىقارالىق ۇيىمداردىڭ باسشىلارى بولسا, قالعانى شەتەلدىك ونەرپازدار. ودان بولەك, اۋقىمدى شارانى تاماشالاۋعا ەلىمىزدىڭ تۇكپىر-تۇكپىرىنەن دە تۇرعىندار اعىلىپ كەلىپ جاتىر.
تەڭىز جاعاسىنداعى باس ساحنادا كەشكى ساعات 19.00-دە «اقتاۋ – تۇركى الەمىنىڭ مادەني استاناسى» شاراسىنىڭ سالتاناتتى اشىلۋ ءراسىمى وتەدى.
اشىلۋ سالتاناتىنا ديماش قۇدايبەرگەن قاتىسىپ, ءان اۋەلەتپەك.
ماڭعىستاۋ وبلىسى
