ورتالىقتىڭ ماقساتى – قالاعا جانە وڭىرگە كەلگەن قوناقتارعا ءبىر جەردەن بارلىق قاجەتتى اقپاراتتى ۇسىنۋ. مۇندا تۋريستەر قاراعاندىنىڭ كورىكتى ورىندارى, ەكسكۋرسيالىق باعىتتار, قوناقۇيلەر مەن دەمالىس ورىندارى, سونداي-اق تۋروپەراتورلار كورسەتەتىن قىزمەتتەر تۋرالى مالىمەت الا الادى.
«ودان بولەك, ورتالىق ارنايى تۋريستىك جولسىلتەمەلەر دايىنداپ, بولاشاقتا جاڭا باعىتتار اشۋدى, قالالىق جانە وبلىستىق ەكسكۋرسيالار مەن تاريحي-تانىمدىق ەكسپەديتسيالار ۇيىمداستىرۋدى جوسپارلاپ وتىر», — دەلىنگەن ماتەريالدا.
تۋريستىك ورتالىقتا قىزمەت كورسەتەتىن ۆيرتۋالدى كەڭەسشى – ەرەكشە جاڭالىق. ول 170 ءتىلدى مەڭگەرگەن جانە كەز كەلگەن تۋريستكە قولايلى تىلدە اقپارات ۇسىنا الادى.
«كەيدە قاراعاندىلىقتاردىڭ وزدەرى دە ءوڭىرىمىزدىڭ كورىكتى, تاريحي ورىندارى تۋرالى بىلە بەرمەيدى. قازىر ادام اقپاراتتى ىزدەمەۋى كەرەك, كەرىسىنشە اقپاراتتىڭ ءوزى ادامدى تابۋى ءتيىس», – دەيدى تاريحي-گەوگرافيالىق قوعام توراعاسى ۆيتالي شۋپتا.
