قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى كونفەرەنتسيانىڭ اشىلۋ سالتاناتىندا قاتىسۋشىلاردى ايتۋلى مەرەيتويمەن قۇتتىقتاپ, تاريحي ەستەلىكتەردى ساقتاۋدا ەكى ەلدىڭ ءوزارا بايلانىسىنىڭ ماڭىزىن اتاپ ءوتتى.
«الماتىدا ءوتىپ جاتقان «جەڭىستىڭ ەستەلىگى: ۇرپاقتار مەن حالىقتار بىرلىگى» كونفەرەنتسياسى – ەلدەرىمىز اراسىنداعى قارىم-قاتىناستى نىعايتۋعا باعىتتالعان تاعى ءبىر قادام. سوعىس تۋرالى ەستەلىكتەر – ءبىزدىڭ ورتاق تاريحىمىز, كەلەشەكتەگى بىرلەسكەن ىنتىماقتاستىقتىڭ نەگىزى. جەڭىستىڭ 80 جىلدىعى اياسىندا جانە جالپى العاندا, ءبىز ءۇشىن ءبىلىم بەرۋ, ءوزىن-ءوزى دامىتۋ, جاستاردىڭ رۋحاني-ادامگەرشىلىك تاربيەسىنە باعىتتالعان بىرلەسكەن جوبالاردى جۇزەگە اسىرۋ ماڭىزدى», دەدى ابزال نۇكەنوۆ.
كونفەرەنتسيا اياسىندا 2025 جىلعا ارنالعان قازاقستان-رەسەي گۋمانيتارلىق ىنتىماقتاستىعى سالاسىنداعى ءىس-شارالار جوسپارىنا قول قويىلدى.
كونفەرەنتسيا باعدارلاماسى ءۇش پانەلدىك سەسسيادان تۇردى. اتاپ ايتساق, «جەڭىستىڭ ەستەلىگى: ۇرپاقتار مەن مادەنيەتتەر اراسىنداعى كوپىر», «جەڭىس ەستەلىگىن ساقتاۋعا ارنالعان جاستار قوزعالىستارى» جانە «ورتاق تاريحتى نىعايتۋعا باعىتتالعان زاماناۋي جوبالار» سەكىلدى سەسسيالار بار.
اتاۋلى مەرەيتوي قارساڭىندا تاراپتار بىرقاتار بىرلەسكەن جوبالاردى جوسپارلاۋدا. اتاپ ايتساق, اكتسيالار, فورۋمدار, مادەني ءىس-شارالار ۇيىمداستىرادى.
