باقىلاۋسىز بالا جاماندىققا ۇرىنادى

ولار قوعامدىق ورىندار, تەمىرجول ۆوكزالى, كومپيۋتەرلىك كلۋبتاردى ارالادى. ەڭ الدىمەن, تەمىرجول ۆوكزالى ماڭىندا قىزىن ەرتىپ, كوشەدە جۇرگەن ماساڭ كۇيدەگى ايەل كوزگە ءتۇسىپ, پوليتسيا بولىمشەسىنە جەت­كىزىلدى. كامەلەتكە تولماعان بالاسىمەن ۇستالعان ايەلگە قاتىستى اكىم­شىلىك حاتتاما تولتىرىلىپ, ۋچاس­كەلىك ينسپەكتورلارعا جولداندى. ودان كەيىن بەلسەندىلەر ستۋدەنتتەر ءۇيى جانىن­دا ورنالاسقان تاۋلىك بويى جۇمىس ىستەيتىن اسحاناعا كىرىپ شىقتى.

پد يۋۆەنالدىق پوليتسيا ءبولىمى­نىڭ باستىعى بوتاگوز جالەكەشەۆا­نىڭ ­ايتۋىنشا, مۇنداي ورىندارعا كامە­لەتكە تولماعاندار كەشكى ساعات 22.00-دەن كەيىن اتا-اناسىمەن جانە زاڭدى وكىلىمەن عانا كەلە الادى. ەندىگى باعىت – كومپيۋتەرلىك كلۋب. قاراڭعى عيمارات ىشىندە جۇرگەن بىرنەشە ءجاسوسپىرىم انىقتالدى. مۇنداي جاعدايدا پوليتسيا قىزمەتكەرلەرى ولاردىڭ اتا-انالارىنا ءۇش ايلىق كورسەتكىش ەسەبىندە ايىپپۇل سالادى. سونداي-اق كوڭىل كوتەرۋ ورتالىقتارىنىڭ يەلەرىنە دە ون ايلىق ەسەپتىك كورسەتكىشپەن ايىپپۇل سالىنادى.

جاستار اراسىنداعى قۇقىق بۇزۋ­شىلىقتىڭ جىلدان-جىلعا ءوسىپ بارا جاتقانى – الاڭداتارلىق قۇبىلىس. «جاستار رۋحى» قق جەتەكشىسى الىشەر تىنىشتىق بەيمەزگىل ۋاقىتتا بوس سەندەلىپ جۇرگەن جاسوسپىرىمدەردىڭ ءبىر-بىرىمەن جانجالداسىپ قالۋ قاۋپى وتە جوعارى دەيدى. سول ءۇشىن بالالار كوپ جينالاتىن قوعامدىق ورىنداردا رەيدتىك شارالاردى ءجيى وتكىزىپ تۇرۋ قاجەت.

بيىل ءتارتىپ ساقشىلارى اكىمشىلىك زاڭ تالاپتارىن بۇزعان 70 جەتكىنشەك پەن تۇرمىس جاعدايى تومەن 36 وتباسىنى ەسەپكە العان. اقتوبە وبلىسىندا جىل باسىنان بەرى تۇنگى ۋاقىتتا ويىن-ساۋىق مەكەمەلەرىندە جۇرگەن 13 ءجاسوسپىرىم انىقتالدى. پوليتسيا قىزمەتكەرلەرى ەسەپتە تۇرعان الەۋمەتتىك جاعدايى تومەن وتباسىلاردى نازاردان تىس قالدىرمايدى. قازىر وبلىستا 342 وتباسى ارنايى ەسەپكە الىنعان.

اقتوبە وبلىسى