2015 جىلى اتاۋىن وزگەرتكەن ءوندىرىس ورنىندا ءتۇرلى سالاعا ماماندانعان بىرنەشە جاۋاپكەرشىلىگى شەكتەۋلى سەرىكتەستىك پايدا بولدى. بەرتىن كەلە بىرنەشە ءوندىرىس ورنى مەن زاۋىتتىڭ باسىن قوسقان كومپانيالار توبىنا اينالدى. قازىر «بەنت»-قا قاراستى كاسىپورىندار بىرنەشە ۇلگىدەگى تەمىر-بەتون شپالداردى, وندىرىستىك قۋاتى جىلىنا 800 مىڭ دانادان استام رەلس بەكىتكىشىن شىعارادى. 2016 جىلدان باستاپ جۇمىس ىستەيتىن «قاپشاعايحيممونتاج» جشس قيىرشىق تاس پەن شويتاس وندىرەدى. «اۆتوكلاۆ KZ» جشس اۆتوكلاۆتى گاز بلوكتارىن شىعارۋمەن اينالىسادى. وندىرىستىك قۋاتى – جىلىنا 150 مىڭ تەكشە مەتردەن استام گاز بلوگى.
كومپانيا باسشىسى دىنمۇحامەد كۋزيەۆتىڭ ايتۋىنشا, زاۋىت ءونىمى – قابىرعالاردى, قالقالاردى, قاسبەتتەردى جىلىتۋ سياقتى ءارتۇرلى قۇرىلىس ءۇشىن تاپتىرماس قۇرال.
«اۆتوكلاۆتى گاز بلوكتارىن ءوندىرۋ كەزىندە جوعارى ساپالى ماتەريالداردى عانا پايدالانامىز. ولاردا ساپا سەرتيفيكاتىنىڭ بار-جوعى تەكسەرىلەدى جانە مىندەتتى تۇردە زەرتحانانىڭ كىرىس باقىلاۋىنان وتەدى. تەحنولوگيالىق ۇدەرىس تولىعىمەن اۆتوماتتاندىرىلعان جانە كومپيۋتەرلەندىرىلگەن, بۇل ادام فاكتورىن ءىس جۇزىندە بولدىرماۋعا مۇمكىندىك بەرەدى. كاسىپورىنعا سالىنعان ينۆەستيتسيا 2 ملرد تەڭگەنى قۇرايدى, سونداي-اق 150 جۇمىس ورنى قۇرىلدى», دەيدى د. كۋزيەۆ.
2023 جىلى قۇرىلعان «Fasteners Metal» بك» جشس – الماتى وبلىسىندا اشىلعان ەڭ العاشقى قازاقستان-قىتاي بىرلەسكەن كاسىپورىنى. اتالعان كاسىپورىندا وندىرىلەتىن رەلستىك بەكىتپەلەر وتاندىق تەمىرجول مەن مەترودا قولدانىلادى. سونداي-اق قىرعىزستان, رەسەي, وزبەكستان, باسقا دا ەلدەرگە ەكسپورتتالادى. بۇل ءوندىرىستى ىسكە قوسۋ «قازاقستان تەمىر جولى» ۇلتتىق كومپانياسىنىڭ باس مەردىگەرلەرىنە رەلستىك بەكىتپەسى بار جيىنتىقتا دايىن تەمىربەتون شپالداردى ساتىپ الۋعا مۇمكىندىك بەردى. بۇرىن بۇل شپالداردىڭ بۇراندالارىن بولەك ساتىپ الاتىندىقتان, قوسىمشا شىعىندار تۋىندايتىن. ەندى بۇرانداسى بار شپالداردى جەتكىزۋدىڭ ناتيجەسىندە «قتج» شىعىنى دا ايتارلىقتاي تومەندەدى.
قازىر «Fasteners Metal» كومپانياسى 800 مىڭنان استام شپال مەن 1 ملن 200 مىڭعا جۋىق رەلستى بەكىتكىش شىعارادى. وندىرىستىك قۋاتى – جىلىنا 1 500 000 جول بۇرانداسى مەن 2 000 000 سەرپىمدى تەرمينال. ەلىمىزدەگى بىرەگەي ءوندىرىس وشاعى بولىپ سانالاتىن كاسىپورىن جۇمىسى تولىقتاي اۆتوماتتاندىرىلعان.
كەيىپكەرىمىزدىڭ ايتۋىنشا, 2021 جىلى رەسەيلىك ارىپتەستەرمەن بىرلەسە وتىرىپ, «StandLab» جشس – تاۋەلسىز اككرەديتتەلگەن زەرتحانا اشۋعا شەشىم قابىلداندى. نارىق ساپالى تاۋارلاردىڭ قاجەتتىگىن ەندى عانا سەزىنە باستاعان. زەرتحانا الماتى قالاسى مەن الماتى وبلىسىندا قۇرىلىس جانە تەمىرجول ماتەريالدارىنىڭ 400-دەن استام ءتۇرىن سىناقتان وتكىزەدى. زەرتحانا اشۋ ناتيجەسىندە 80 ادام جۇمىسپەن قامتىلدى.
«2020 جىلدىڭ الدىنداعى احۋال «كۇرىشتىڭ ارقاسىندا كۇرمەك سۋ ىشەدىنى» ەسكە ءتۇسىردى. سىرتتان كولەڭكەلى جولمەن كەلەتىن, ەشبىر ستاندارتقا ساي ەمەس قۇرىلىس ماتەريالدارى نارىقتىڭ وتاندىق ونىمدەرگە دەگەن سەنىمىنە سەلكەۋ ءتۇسىردى. اككرەديتتەلگەن زەرتحانا اشۋ قاجەت دەگەن شەشىمگە سول كەزدە بەكىندىك. ءبىزدىڭ كومپانيالار توبىنا قاراستى كاسىپورىندارىندا شىعارىلعان تاۋارعا قولداناتىن شيكىزات قۇرامى الدىمەن سول زەرتحانادا تەكسەرۋدەن وتەدى. سودان كەيىن نارىققا جول تارتادى. وسى ورايدا ايتا كەتەر تاعى ءبىر جايت – جۇمىسپەن قامتۋ ماسەلەسى. ءبىز كوپ جىل بويى جۇمىسشى تاپشىلىعىن باستان وتكەردىك. كوپىر كراندارى ماشينيست, گاز-ەلەكترمەن دانەكەرلەۋشى, قالىپتاۋشى, زەرتحاناشى, بەتون-ارالاستىرۋ توراپتارىنىڭ وپەراتورلارى قاجەت. وكىنىشكە قاراي, مۇنداي ماماندار الماتى وبلىسىندا دايارلانبايدى. زاۋىت جانىنان اشىلعان اككرەديتتەلگەن وقۋ ورتالىعىندا 300 ادامدى وقىتۋ جوسپارلانعان بولاتىن. كۋرستى بىتىرگەننەن كەيىن «بەنت» فيرماسىنىڭ زاۋىتىندا جۇمىس ىستەۋگە مىندەتتەگەن جوقپىز. ولار وزدەرى قالاعان جەرگە جۇمىسقا ورنالاسۋعا ەرىكتى. بىراق تۇلەكتەرىمىزدىڭ كوبى بىزگە قاراستى زاۋىتتاردا قالۋعا شەشىم قابىلدادى», دەيدى د.كۋزيەۆ.
ونىڭ سوزىنشە, نارىقتىڭ قازىرگى بەتالىسى ءتاپ-ءتاۋىر. سالادا سەرپىلىس بايقالادى.
«پرەزيدەنت 2025 جىلدى «جۇمىسشى ماماندىقتارى جىلى» دەپ جاريالادى. اتالارىمىز, اكەلەرىمىز 1960 جىلدارى تەحنيكالىق ماماندىقتاردىڭ ءباسى باسىم بولعانىن ءجيى ايتادى. قازىر دە تەحنيكالىق ماماندىقتارعا سۇرانىس جوعارى. ەكونوميكا تسيفرلانىپ, اۆتوماتتاندىرۋ دەڭگەيى جاڭا ماماندىقتارعا سۇرانىستى ارتتىرىپ جاتىر. ىرگەلى تاريحى بار زاۋىتتار جاستارعا بەلگىلى ءبىر سالاعا ماماندانۋعا مۇمكىندىك بەرەدى. قازىر «بەنت» ونەركاسىپتىك كومپانيالار توبى قىزمەتكەرلەرىنىڭ 54%-ى – تەحنيكالىق ماماندىقتى يگەرگەن 36 جاسقا دەيىنگى جاس ماماندار», دەيدى د.كۋزيەۆ.
الماتى
