ناقتىلانعانداي, قاسكويلەر مەسسەندجەرلەردە قازاقستان ۇلتتىق بانكى نەمەسە وزگە مەملەكەتتىك جانە قۇقىق قورعاۋ ورگاندارى قىزمەتكەرلەرىنىڭ جالعان اككاۋنتىن پايدالانادى.
«ال پروفيل شىنايى كورىنۋى ءۇشىن جالپىعا قولجەتىمدى دەرەككوزدەردە, ونىڭ ىشىندە ۆەدومستۆولاردىڭ رەسمي رەسۋرستارىندا ورنالاستىرىلعان سۋرەتتەر مەن ەمبلەمالاردى قولدانادى. سونىمەن قاتار, الاياقتار وزدەرىن مەسسەندجەردىڭ تەحنيكالىق قولداۋ قىزمەتىنەن دەپ تانىستىرىپ, ازاماتتارعا اككاۋنتىن جويۋعا ءوتىنىش بەرۋ تۋرالى حابارلاما جىبەرەدى. بۇل شەشىمنىڭ كۇشىن جويۋ ءۇشىن ازاماتتارعا سايتقا ءوتۋدى ۇسىنادى. وندا ءوز تەلەفون ءنومىرىن كورسەتىپ, حابارلامادا كورسەتىلگەن ءبىر رەتتىك كودتى ەنگىزۋدى تالاپ قىلادى. وسىلايشا, ولار اككاۋنتقا يەلىك ەتىپ, پايدالانۋشىنى بۇعاتتايدى. سودان سوڭ قاسكويلەر جالعان نەمەسە بۇزىلعان اككاۋنتتاردى پايدالانا وتىرىپ, بۇرىنعى يەسىنىڭ تۋىستارى مەن تانىستارىنا حات جازادى جانە ءتۇرلى سىلتاۋمەن اقشا اۋدارۋدى, سىلتەمەگە ءوتۋدى, قوسىمشانى جۇكتەۋدى, مەسسەندجەردە جاڭا فۋنكتسيالاردى ىسكە قوسۋدى نەمەسە جەكە دەرەكتەرىن حابارلاۋدى سۇرايدى», دەلىنگەن اقپاراتتا.
بۇدان بولەك, الاياقتار جالاقىسى جوعارى پەرسپەكتيۆالى جۇمىس تۋرالى حابارلامالار تاراتادى نەمەسە قوعامدىق ورىنداردا QR-كودتار جاريالايدى. پايدالانۋشى كورسەتىلگەن سىلتەمەگە وتكەن كەزدە ولار سول مەزەتتە مەسسەندجەرگە, ءموبيلدى قۇرىلعىعا نەمەسە دەربەس دەرەكتەرگە قول جەتكىزەدى.
«ۇلتتىق بانك ازاماتتاردى قىراعى بولۋعا جانە جاسىرىن اقپاراتتى ءۇشىنشى تۇلعالارعا حابارلاماۋعا, مەسسەندجەردەگى كۇدىكتى حابارلار مەن تەلەفون قوڭىراۋلارىنا سەنبەۋگە, سۇراتۋلاردىڭ تۇپنۇسقالىعىن قايتا تەكسەرۋگە جانە اقشا اۋدارىمدارىن جاساماۋعا, كۇماندى سىلتەمەلەر مەن فايلداردى اشپاۋعا, سونداي-اق HopToDesk, RustDesk, RUDesktop, AnyDesk, TeamViewer جانە ت.ب. قاشىقتان قول جەتكىزۋگە ارنالعان قوسىمشالاردى ورناتپاۋعا شاقىرادى. قازاقستان ۇلتتىق بانكى ءۇشىنشى تۇلعالار تاراپىنان الاياقتىق ارەكەتتەردى بولدىرماۋ ءۇشىن مەملەكەتتىك ورگانداردىڭ نەمەسە ۇلتتىق بانكتىڭ قىزمەتكەرى رەتىندە قوڭىراۋ شالعان اداممەن اراداعى اڭگىمەنى دەرەۋ دوعارىپ, قاجەت بولعان جاعدايدا مەملەكەتتىك ورگاننىڭ رەسمي نومىرىنە الاياقتىق ارەكەت تۋرالى ءوز بەتىنشە حابارلاۋدى ۇسىنادى», دەپ مالىمدەدى ۆەدومستۆو.
ۇلتتىق بانك ەگەر ءسىز الاياقتاردىڭ ارباۋىنا تاپ بولساڭىز, قازاقستان رەسپۋبليكاسىنىڭ قۇقىق قورعاۋ ورگاندارىنا ءتيىستى وتىنىشپەن جۇگىنۋگە كەڭەس بەردى.
