اسقار اسۋلاردى بىرگە باعىندىرامىز

سۆەتلانا ليۋبينا, بانك قىزمەتكەرى. ەلباسى نۇرسۇلتان نازارباەۆ ۇلىقتاۋ سالتاناتىندا قازاقستاندىقتار الدىندا كوپتەگەن مىندەتتەردى شەشۋ ءۇشىن جۇدىرىقتاي جۇمىلۋ, سىرتقى فاكتوردان تونەتىن سىن-قاتەرلەرگە قارسى تۇرا ءبىلۋ قاجەتتىگىن العا تارتتى. شىندىعىندا, كەلەشەكتى ويلاعان ەلدىڭ باسشىسى الداعى كۇندەرى اتقارىلاتىن جۇمىستارىنىڭ جوسپارىن جاساقتايدى. وسى ورايدا ەلباسىنىڭ و باستان كەلەشەكتى بولجاي بىلەتىن كورەگەندىگىنە ءتانتى بولىپ كەلەمىن. ماسەلەن, 1997 جىلى «قازاقستان-2030» ستراتەگياسىن ۇسىندى. سول كەزدە بۇعان تاڭدانا, ءتىپتى, كۇمانمەن قاراعاندار دا كوپ بولدى. الايدا, باستاعان ءىسىن تياناقسىز قالدىرمايتىن, ايتقان ۋادەسىندە تۇراتىن نۇرسۇلتان نازارباەۆ ءوزى تىزگىنىن ۇستاعان تاۋەلسىز ەل ەكونوميكاسىن «قازاقستان-2030» ستراتەگياسىندا كوزدەلگەن باعىتتارمەن دامىتۋعا بەلسەنە كىرىستى. بۇل ستراتەگيادا كوزدەلگەن مىندەتتەر 15 جىلدا ورىندالىپ, تابىستى جەتىستىكتەرگە قول جەتكىزدىك. ال بۇدان كەيىنگى «قازاقستان-2050» ستراتەگياسىندا دا ايقىندالعان مىندەتتەر مەن جوسپارلار وتاندىق ەكونوميكانى الەمدىك باسەكەگە قابىلەتتى ەتۋدى, ءسويتىپ, قازاقستاندى ەڭ دامىعان 30 ەلدىڭ قاتارىنا كىرىكتىرۋدى كوزدەدى. وسى ستراتەگيا اياسىن­دا ەلىمىزدە ۇدەمەلى يندۋستريالىق-يننو­­ۆا­تسيالىق دامۋ باعدارلاماسى قولعا الىندى. بۇل باعدارلامانىڭ العاشقى بەس­جىل­دىعىندا ەكونوميكانىڭ ءار سالاسىن قار­قىندى دامىتۋعا سەرپىن بەرگەن كاسىپ­­ورىن­دار كوپتەپ ىسكە قوسىلدى. جاڭا جۇ­مىس ورىن­­دارى اشىلدى. بۇرىن-سوڭدى ەلىمىزدە شىعارىلماعان جاڭا ونىمدەر حالىق­ارا­لىق تالاپقا ساي شىعارىلا باستادى. جاھاندانۋ ۇدەرىسى كەڭ قانات جايعان سايىن سىرتقى فاكتوردان ءتونۋى مۇمكىن سىن-قاتەرلەردىڭ بولاتىندىعى جانە داۋ­سىز. ەلباسى اتاپ وتكەندەي, الەمدەگى وزگەرىستەر ءار مەملەكەتتىڭ, سونىڭ ىشىندە, ءبىزدىڭ دە الدىمىزعا تاڭداۋ قويارى ءسوزسىز, ياعني قازىرگى ەكونوميكالىق وركەندەۋدى ودان ءارى جەدەلدەتە ءتۇسۋ قاجەتتىگىن قويىپ وتىر. مىنە, وسى سەبەپتەن, نۇرسۇلتان نازارباەۆتىڭ بەس ينستيتۋتتىق رەفورمادان قۇرالعان ۇلت جوسپارىن ۇسىنۋىنىڭ ايرىقشا ماڭىزى بار. ال ونى ىسكە اسىرۋ تەك جاڭعىرتۋ جونىندەگى ۇلتتىق كوميسسيا مۇشەلەرىنىڭ عانا مىندەتى دەگەن ۇشقارى ويدان اۋلاق بولۋىمىز قاجەت. ۇلت جوسپارى – ەلدى وركەندەتىپ, اسقار اسۋلاردى باعىندىرۋدىڭ باس جوسپارى. راس, ونداعى بەس ينستيتۋتتىق رەفورمانى ءبىر مەزەتتە قاتار ىسكە اسىرۋ مۇمكىن ەمەس. سول سەبەپتەن, ونى كەزەڭ-كەزەڭمەن ىسكە اسىرۋ ىسىنە اتسالىسۋ قازاق جەرىن مەكەن ەتكەن, اۋاسىن جۇتىپ, سۋىن ىشكەن ءار ازاماتتىڭ ءتول مىندەتى بولعانى ءجون دەپ ويلايمىن. اتىراۋ.