ەكولوگيا جانە تابيعي رەسۋرستار ءمينيسترى ەرلان نىسانباەۆ اتاپ وتكەندەي, بۇگىندە ەلىمىز كولەمىندە ماتەريالدىق-تەحنيكالىق جابدىقتار بارىنشا جاڭارتىلىپ, بىرقاتار ورمان ءورتىن ءسوندىرۋ تەحنيكاسى ساتىپ الىندى. ءورتتى ەرتە انىقتاۋ جۇيەلەرى ەنگىزىلدى. جاڭا ورمان تالىمباقتارى قۇرىلدى. ەرەكشە قورعالاتىن تابيعي اۋماقتار كەڭەيتىلىپ جاتىر. قالدىقتاردى كادەگە جاراتۋ جوبالارى جۇزەگە اسىرىلادى. سيرەك كەزدەسەتىن جانۋارلار – جولبارىستار, قۇلاندار, پرجەۆالسكي جىلقىلارى تابيعاتقا قايتا جىبەرىلەدى.
ورمانداردى قورعاۋدى كۇشەيتۋ, ماتەريالدىق-تەحنيكالىق بازانى جاڭارتۋعا رەسپۋبليكالىق بيۋدجەتتەن ورتكە قارسى, ورمان ءورتىن ءسوندىرۋ تەحنيكاسىن ساتىپ الۋعا 5,4 ملرد تەڭگە باعىتتالدى, جەرگىلىكتى قۇرىلىمداردان 6,7 ملرد تەڭگە ءبولىندى. ورمان ورتتەرىن ءتيىمدى سوندىرۋگە بەيىمدەلگەن تراكتورلار, ارنايى تەحنيكا, جابدىقتار ساتىپ الىندى.
ورمان ورتتەرىن ەرتە انىقتاۋ جۇيەسى «قازاقتەلەكوممەن» بىرلەسىپ جۇزەگە اسىرىلىپ جاتىر. «جاسىل ايماق», «سەمەي ورمانى» سياقتى 24 ورمان شارۋاشىلىعى اۋماقتارىن زەرتتەۋ جۇمىستارى باستالدى.
6 وڭىردە جاڭا ورمان تالىمباقتارىن قۇرۋ جۇمىستارى جۇرگىزىلەتىن بولادى. جالپى بيۋدجەت 21,2 ملرد تەڭگەنى قۇرايدى, ءاربىر تالىمباققا 3,5 ملرد تەڭگەدەن قارالعان. ونىڭ قۋاتى – 6 ملن كوشەت. قۇرىلىس 2025 جىلى باستالادى. بيوالۋانتۇرلىلىكتى ساقتاۋ تۇجىرىمداماسى ازىرلەنەدى.
جاڭا ەرەكشە قورعالاتىن تابيعي اۋماقتار – «مەركە» وڭىرلىك پاركى (86 مىڭ گا), «ارال» (471 مىڭ گا), «جايىق ورمانى» (46,9 مىڭ گا) رەزەرۆاتتارى قۇرىلادى. ءۇستىرت, قاراتاۋ, ىلە-بالقاش اۋماقتارىن 648 مىڭ گەكتارعا كەڭەيتۋ جوسپارلانىپ وتىر. 6 ەقتا-دا باقىلاۋ وتكىزۋ پۋنكتەرىن اۆتوماتتاندىرۋ, ەلەكتروندىق تولەم جۇيەسى ەنگىزىلەدى. ورمانشىلارعا ارنالعان ءبىلىم بەرۋ ورتالىعى اشىلادى.
2024 جىلدان پرەزيدەنتتىڭ «تازا قازاقستان» باستاماسى جۇزەگە اسىرىلىپ كەلەدى. ەكولوگيالىق قوزعالىسقا 6 ملن ادام, ونىڭ ىشىندە 230 مىڭ ەرىكتى قاتىستى. 1,1 ملن توننا قوقىس جينالىپ, 1,6 ملن اعاش وتىرعىزىلدى. ەكومادەنيەتتى دامىتۋدىڭ 2029 جىلعا دەيىنگى تۇجىرىمداماسى بەكىتىلدى, وڭىرلىك جوسپارلار ماقۇلداندى. ەكولوگيالىق باستامالار قوعام تاراپىنان بەلسەندى قولداۋعا يە بولىپ وتىر.
2021 جىلدان باستاپ 1,145 ملرد اعاش ەگىلدى. ەندى 2 ملرد ءتۇپ اعاش وتىرعىزىلادى. سونداي-اق ارال تەڭىزىنىڭ قۇرعاعان تابانىن كوگالداندىرۋ جۇمىستارى جۇرگىزىلەدى, مۇندا 1,1 ملن گەكتارعا سەكسەۋىل وتىرعىزۋ جوسپارلانعان.
قاتتى تۇرمىستىق قالدىقتارعا قاتىستى ماسەلەلەردى شەشۋ ماقساتىندا 238 ملرد تەڭگەگە 94 جوبادان تۇراتىن پۋل قالىپتاستىرىلدى. زاماناۋي پوليگوندار سالۋ, قايتا وڭدەۋدى دامىتۋ, قالدىقتاردى بولەك جيناۋدى ەنگىزۋ نەگىزگى باعىتتار سانالادى. سيرەك كەزدەسەتىن جانۋارلاردى تابيعاتقا قايتا جىبەرۋ جۇمىستارى جالعاسادى, ولاردى جەرسىندىرۋ باعدارلامالارى جۇيەلى تۇردە جۇزەگە اسىرىلىپ جاتىر.
