فوتو: ۇكىمەتتىڭ ءباسپاسوز قىزمەتى
قانات بوزىمباەۆ شال اقىن اۋدانىنا قاراستى سەرگەەۆكا قالاسىنداعى سەرگەەۆ سۋ تورابىنىڭ جاعدايىن تەكسەردى. بۇل ەسىل وزەنىنىڭ اعىنىن رەتتەيتىن جانە سۋ رەسۋرستارىمەن قامتاماسىز ەتەتىن ستراتەگيالىق نىسان. وتكەن جىلدان بەرى مۇندا نىعايتۋ, ءتۇبىن تەرەڭدەتۋ جانە جاعالاۋلاردى شايىلۋدان قورعاۋ جۇمىستارى جۇرگىزىلىپ جاتىر. قازىر سۋ تاسقىنىنىڭ ەكىنشى تولقىنىنىڭ شارىقتاۋ كەزەڭى كەلدى.
سونىمەن قاتار ۆيتسە-پرەمەر ەسىل وزەنىنىڭ بويىندا ورنالاسقان نيكولاەۆكا, پوكروۆكا, ياۆلەنكا, بولشايا مالىشكا جانە سوكولوۆكا اۋىلدارىنداعى جاعدايدى تەكسەردى. وبلىس بويىنشا سۋ باسۋ قاۋپى بار 116 ەلدى مەكەن بار. وبلىس اكىمى عاۋەز نۇرمۇحامبەتوۆتىڭ ايتۋىنشا, جاعداي تۇراقتى باقىلاۋدا.
بۇدان بولەك, قانات بوزىمباەۆ نوۆونيكولسك اۋىلىنداعى كوپىردى, قىزىلجار اۋدانىنا قاراستى بەسكول, پريبرەجنوە جانە تەپليچنوە اۋىلدارىنداعى جوندەلگەن بوگەتتەردى, پەتروپاۆل سۋ تورابىن جانە زارەچنىي كەنتىندەگى اينالما كانالدىڭ جاعدايىن قارادى. ۇزىندىعى 3,7 شاقىرىمعا سوزىلعان بۇل كانال بيىل سۋ دەڭگەيىن رەتتەۋ جانە ارتىق سۋدى شىعارۋ ءۇشىن سالىندى.
پەتروپاۆلدا سۋ تاسقىنىنىڭ ءبىرىنشى تولقىنىنىڭ شارىقتاۋ كەزەڭى 4-5 ساۋىرگە بولجانىپ وتىر. قورعاۋ بوگەتتەرىن نىعايتۋ جۇمىستارى اياقتالۋعا جاقىن. قانات بوزىمباەۆ ۋششەۆا كوشەسىندەگى بوگەتتىڭ قالپىنا كەلتىرۋ جۇمىستارىن تەكسەردى. بۇل نىسان پودگورا شاعىن اۋدانىن سۋ تاسقىنىنان قورعايدى. سونداي-اق ول «بيوپرۋد» سۋ جيناۋ قويماسى ماڭىنداعى قورعانىس بوگەتىنىڭ قۇرىلىسىمەن تانىستى. جۇمىستار جەلتوقسان ايىندا اياقتالماق.
ۆيتسە-پرەمەر قالا اۋماعىنداعى ساياجاي القاپتارىن جانە وبلىستىق اكىمدىك جانىنداعى جەدەل ارەكەت ەتۋ ورتالىعىن دا ارالادى.
«وبلىستا سۋ تاسقىنىنا قارسى 109 ءىس-شارادان تۇراتىن ينجەنەرلىك جۇمىستار جوسپارى ىسكە اسىرىلىپ جاتىر. ناتيجەسىندە 60 ەلدى مەكەندە سۋ باسۋ قاۋپى تومەندەدى. 47 شاقىرىم جاڭا بوگەت سالىنىپ, 41 شاقىرىم قورعانىس بىلىكتەرى نىعايتىلدى. اۆتوجولدارعا 108 سۋ وتكىزۋ قۇبىرى ورناتىلىپ, 10 شاقىرىم سۋ بۇرۋ ارىقتارى تەرەڭدەتىلدى, 4 شاقىرىم كىشى وزەن ارنالارى تازارتىلىپ, 200 شاقىرىم نوسەر كارىز جەلىسى تازاردى», دەلىنگەن حابارلامادا.
سۋ تاسقىنى كەزەڭىنىڭ قاۋىپسىز ءوتۋىن قامتاماسىز ەتۋ ءۇشىن قانات بوزىمباەۆ سولتۇستىك قازاقستان وبلىسىنىڭ اكىمدىگى مەن تجم-گە تاۋلىك بويى تاۋەكەل ايماعىنداعى ەلدى مەكەندەردە, اسىرەسە ساياجاي القاپتارىندا مونيتورينگ جۇرگىزۋدى, سۋ قويمالارىنداعى سۋ دەڭگەيىن رەتتەۋدى جانە حالىقتى سۋ تاسقىنىنا قارسى ءىس-شارالار تۋرالى ۋاقتىلى حاباردار ەتۋدى تاپسىردى.
