وزبەكستان پرەزيدەنتى شاۆكات ميرزيوەۆ قۇتتىقتاۋىندا ورازا ايت تۇتاس مۇسىلمان الەمىنە ەرەكشە كوڭىل-كۇي سىيلايتىنىن جازىپ, الماتىداعى بەيرەسمي كەزدەسۋگە جوعارى باعا بەردى.
«اسەم قالا الماتىدا وتكەن كەزدەسۋ ءبىزدىڭ ماڭگى دوستىق, تاتۋ كورشىلىك, ستراتەگيالىق سەرىكتەستىك جانە وداقتاستىق رۋحىنداعى بايلانىستارىمىزدى تەرەڭدەتە تۇسەدى دەپ سەنەمىن», دەگەن وزبەكستان پرەزيدەنتى.
قىرعىزستان پرەزيدەنتى سادىر جاپاروۆ ورازا ايت مەرەكەسى بارشا مۇسىلمانعا شاتتىق سىيلاپ, ەلدەرىمىزدىڭ ىرىس-ىنتىماعىن ارتتىرا بەرسىن دەپ جىلى لەبىزىن جەتكىزدى.
تاجىكستان پرەزيدەنتى ەمومالي راحمون قاسيەتتى مەرەكەنىڭ قۇندىلىعى ەكى ەل اراسىنداعى دوستىق پەن كوپجاقتى ىنتىماقتاستى دامىتۋعا سەپتىگىن تيگىزەتىنىنە سەنىمدى ەكەنىن اتاپ وتكەن.
«ورازا ايت حالىقتارىمىزدى تازالىققا, مەيىرىمدىلىككە, قامقورلىققا ۇندەي بەرسىن», دەپ جازىلعان جەدەلحاتتا.
قاسيەتتى ورازا ايت مەيرامىنا وراي تۇرىكمەنستان پرەزيدەنتى سەردار بەردىمۇحامەدوۆ پەن تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆ تە ىزگى تىلەگىن جولدادى.
«ادامزاتتىڭ اسىل قاسيەتتەرىن دارىپتەيتىن مەرەكە الداعى ۋاقىتتا دا ەلدەرىمىزدىڭ اراسىنداعى قارىم-قاتىناستى دامىتۋعا, دوستىقتى نىعايتۋعا ىقپال ەتە بەرەتىنىنە سەنىمدىمىن», دەلىنگەن تۇرىكمەنستان پرەزيدەنتىنىڭ جەدەلحاتىندا.
تۇركيا پرەزيدەنتى رەجەپ تايپ ەردوعان ادامزاتقا تىنىشتىق پەن بەيبىتشىلىك اكەلەدى دەپ ۇمىتتەنەتىن قاسيەتتى مەيرامدا باۋىرلاس حالىقتاردىڭ ىنتىماعى مەن بىرلىگى نىعايا بەرۋىنە تىلەكتەستىك ءبىلدىردى.
سونىمەن قاتار مەملەكەت باسشىسىن ءباا پرەزيدەنتى مۇحاممەد بەن زايد ءال ناحايان, ءباا ۆيتسە-پرەزيدەنتى, پرەمەر-ءمينيسترى, دۋباي بيلەۋشىسى مۇحاممەد بەن راشيد ءال ماكتۋم, ءباا ۆيتسە-پرەزيدەنتى, پرەمەر-ءمينيستردىڭ ورىنباسارى مانسۋر بەن زايد ءال ناحايان, يوردانيا كورولى II ابداللا بەن ءال-حۋسەين, كۋۆەيت ءامىرى شەيح ميشاال ءال-احماد ءال-دجابەر اس-ساباح, كۋۆەيتتىڭ تاق مۇراگەرى ساباح حاليد ءال-حاماد اس-ساباح, ومان سۇلتانى حايسام بەن تاريق, باحرەين كورولى حاماد بەن يسا ءال حاليفا, مىسىر پرەزيدەنتى ابدەل فاتتاح اس-سيسي, پالەستينا پرەزيدەنتى ماحمۋد ابباس, سومالي پرەزيدەنتى حاسان شەيح موحامۋد, سينگاپۋر پرەمەر-ءمينيسترى لوۋرەنس ۆونگ, ليۆيا پرەزيدەنتتىك كەڭەسىنىڭ توراعاسى مۇحاممەد يۋنۋس ءال-مانفي, ەفيوپيا پرەمەر-ءمينيسترى ابي احمەد, تاتارستان رايسى رۋستام ميننيحانوۆ, يسلام ىنتىماقتاستىعى ۇيىمىنىڭ باس حاتشىسى حيسسەين براحيم تاحا, وپەك باس حاتشىسى حايسام ءال-گايس, يسەسكو باس ديرەكتورى ساليم بەن مۇحاممەد ءال-ماليك قۇتتىقتادى.
