فوتو: iStock
ۆيتسە-ءمينيستردىڭ ايتۋىنشا, سۋپەركومپيۋتەر — بۇل ءتۇرلى سەرۆەرلەر مەن دەرەكتەردى ساقتاۋ جۇيەلەرىنىڭ جيناعى. بۇل ەسەپتەۋىش ماشينا GPU (Graphics Processing Unit, گرافيكالىق پروتسەسسور) نەگىزىندە جۇمىس ىستەيدى جانە نەيروندىق جەلى مەن جاساندى ينتەللەكت مودەلىن قامتيدى.
«قۇرىلعىلار ساتىپ الىندى, العاشقى پيلوتتىق بازالىق قىزمەتتەر, مىسالى, eGov.AI وسى ونىمدە تەكسەرىلەدى. eOtinish ارقىلى ۇلكەن دەرەكتەردى وڭدەۋ ءاناليزى تاعى دا سىناقتان ءوتىپ جاتىر. قازىرگى تاڭدا ادىلەت مينيسترلىگىمەن بىرگە زاڭناما بويىنشا كەڭەس بەرەتىن بوت پەن AI-اسسيستەنتتى دە سىناقتان وتكىزىپ جاتىرمىز», دەدى روستيسلاۆ كونياشكين.
ۆيتسە-مينيستر اتاپ وتكەندەي, مەملەكەتتىك ورگانداردا ينتەللەكتۋالدى كومەكشىلەردى تولىققاندى ەنگىزۋ ءۇشىن ۇلكەن رەسۋرستار قاجەت. وسى جىلدىڭ سوڭىنا دەيىن بىرنەشە جابدىقتى جەتكىزۋ جوسپارلانعان, ونىڭ ىشىندە جاساندى ينتەللەكت ءۇشىن سەرۆەرلەر مەن جابدىقتاردى دامىتۋدا كوشباسشى Nvidia كومپانياسىنىڭ وزىق شەشىمدەرى بار.
ء«بىزدىڭ الدىمىزدا ءارتۇرلى سالالاردا 50 AI-اگەنتى مەن AI-اسسيستەنتتەرىن قۇرۋ مىندەتى تۇر. قازىرگى تاڭدا مەملەكەتتىك ورگاندارمەن بىرلەسىپ, وسى AI-اگەنتتەر مەن AI-اسسيستەنتتەردىڭ كارتاسى ازىرلەندى. ولار ارقىلى ازاماتتار مەن بيزنەس ءۇشىن مۇمكىندىگىنشە كوپ قىزمەتتەردى قامتۋ كوزدەلدى. ءبىز ونىڭ ازاماتتار مەن بيزنەس ءۇشىن تيىمدىلىگىن جانە پايداسىن, سونداي-اق مەملەكەتتىك سەكتورداعى پروتسەستەردى وڭايلاتۋ مەن بيۋروكراتيادان ارىلتۋ ماسەلەسىن ءتۇسىنۋىمىز قاجەت», دەپ تۇيىندەدى ۆيتسە-مينيستر.
بۇعان دەيىن تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ سۋپەركومپيۋتەردى قۇرۋ كۇردەلى مىندەت ەكەنىن جانە قاجەتتى چيپتەردى ساتىپ الۋ قيىنعا سوعاتىنىن مالىمدەگەن بولاتىن.
