كوڭىل ايتۋ جەدەلحاتىن جولدادى

مەملەكەت باسشىسى نۇرسۇلتان نازارباەۆ كسرو حالىق ءارتىسى, مەملەكەتتىك سىيلىقتىڭ لاۋرەاتى شامعون قاجىعاليەۆتىڭ قايتىس بولۋىنا بايلانىستى مارقۇمنىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى. جەدەلحاتتا ەلباسى قازاق ونەرىنىڭ اسا كورنەكتى وكىلى, بارشا حالقىمىزدىڭ ماقتانىشى بولعان ش.قاجىعاليەۆتىڭ دۇنيە سالۋىنا بايلانىستى كوڭىل ايتتى. «شامعون ساعاددين ۇلى حالقىمىزدىڭ اراسىنان شىققان العاشقى كاسىبي ديريجەرلەردىڭ ءبىرى, دومبىراشى, پەداگوگ رەتىندە ونەرىمىزدىڭ وركەندەۋىنە ولشەۋسىز ۇلەس قوستى. ءوزى باسقارعان قۇرمانعازى اتىنداعى قازاق مەملەكەتتىك حالىق اسپاپتارى وركەسترىن الەمگە تانىتىپ, تالانتتى شاكىرتتەردىڭ بىرنەشە بۋىنىن تاربيەلەدى. ول ۇلتتىق باي مۇرامىز بەن كلاسسيكالىق شىعارمالاردى ناسيحاتتاۋعا اسا زور ەڭبەك ءسىڭىردى», – دەلىنگەن جەدەلحاتتا. نۇرسۇلتان نازارباەۆ سوڭىنا مول مۇرا قالدىرعان ش.قاجىعاليەۆتىڭ جارقىن بەينەسى حالقىمىزدىڭ جادىندا ماڭگى ساقتالاتىنىن اتاپ ءوتتى. *** ەلباسى نۇرسۇلتان نازارباەۆ مەملەكەت جانە قوعام قايراتكەرى, ۇلتتىق عىلىم اكادەمياسىنىڭ اكادەميگى قيلىباي مەدەۋبەكوۆتىڭ قايتىس بولۋىنا بايلانىستى مارقۇمنىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى. جەدەلحاتتا قازاق عىلىمىنىڭ كورنەكتى وكىلى ق.مەدەۋبەكوۆتىڭ قازاق كسر جوعارعى كەڭەسىنىڭ توراعاسى, لەنين اتىنداعى بۇكىلوداقتىق اۋىل شارۋاشىلىعى عىلىمدارى اكادەمياسىنىڭ (ۆاسحنيل) ۆيتسە-پرەزيدەنتى, ونىڭ شىعىس ءبولىم­شەسى تورالقاسىنىڭ توراعاسى, بىلىكتى عالىم رەتىندە ەلىمىزدىڭ وركەندەۋىنە زور ۇلەس قوسقانى اتاپ وتىلگەن. «قيلىباي ۇسەن ۇلى اۋىل شارۋاشىلىعى سالاسىنا ارناپ كوپتەگەن ماماندار مەن عالىم شاكىرتتەر دايارلاپ, وزىندىك مەكتەبىن قالىپتاستىردى. ونىڭ ماڭىزدى عىلىمي ەڭبەكتەرى جانە جولىن جالعاستىرۋشى ءىزباسارلارى الداعى ۋاقىتتا دا ەل يگىلىگىنە قىزمەت ەتە بەرەدى دەپ سەنەمىن», – دەلىنگەن جەدەلحاتتا. قازاقستان پرەزيدەنتى رەسپۋبليكامىزدىڭ دامۋىنا كوپ ەڭبەك ءسىڭىرىپ, عىلىمدا ايرىقشا ءىز قالدىرعان ق.مەدەۋبەكوۆتىڭ جارقىن بەينەسى حالقىمىزدىڭ جادىندا ءاردايىم ساقتالاتىنىن ايتتى.