فوتو: اقوردا
پرەزيدەنتتىڭ ايتۋىنشا, سلوۆەنيا – قازاقستاننىڭ ەۋروپا وداعىنداعى ماڭىزدى سەرىكتەسى ءارى ەكى ەلدىڭ قارىم-قاتىناسى دوستىق جانە ءوزارا سىيلاستىق رۋحىندا نىعايىپ كەلەدى. ونىڭ ايقىن دالەلى – بىلتىر ليۋبليانا قالاسىندا قازاقستان ەلشىلىگىنىڭ اشىلۋى.
«مەن مۇنى ىقپالداستىعىمىزدى دامىتۋ جولىنداعى ماڭىزدى قادام دەپ سانايمىن. قازاقستان ەكى ەل اراسىنداعى دوستىقتى ودان ءارى تەرەڭدەتۋگە مۇددەلى. سوندىقتان بۇل ساپاردىڭ ءمان-ماڭىزى ايرىقشا. ءبىز بۇگىن قۇرمەتتى پرەزيدەنت پيرتس-مۋسار حانىممەن مازمۇندى ءارى جەمىستى كەلىسسوز جۇرگىزدىك. قازاق-سلوۆەن ىنتىماقتاستىعىنىڭ اياسىن كەڭەيتۋ جولىن تالقىلادىق. ناقتى ۋاعدالاستىقتارعا قول جەتكىزدىك. بىرلەسكەن مالىمدەمە قابىلدادىق. سونداي-اق بۇگىن بىرقاتار ۇكىمەتارالىق جانە مەكەمەارالىق كەلىسىم جاسالدى. سونىڭ ىشىندە دەنساۋلىق ساقتاۋ, تۋريزم, ءبىلىم بەرۋ سالالارىنا قاتىستى ماڭىزدى قۇجاتتار بار. بۇل كەلىسىمدەردى ءتيىمدى ىسكە اسىرۋ ارقىلى ەكى ەلدىڭ ىنتىماقتاستىعىن جانداندىرا تۇسەمىز دەپ سەنەمىن», دەدى قاسىم-جومارت توقاەۆ.
پرەزيدەنتتەر ەكىجاقتى ساۋدا-ەكونوميكالىق جانە ينۆەستيتسيالىق بايلانىستاردى ارتتىرۋعا كەلىستى. قازىر قوس مەملەكەت فارماتسەۆتيكا, جاڭارتىلاتىن ەنەرگيا, ينجەنەريا, تەلەكوممۋنيكاتسيا باعىتتارىندا ماڭىزدى جوبالاردى جۇزەگە اسىرىپ جاتىر. مەملەكەت باسشىسى ەلىمىزدە وسى سالالاردا 20-عا جۋىق سلوۆەن كومپانياسى تابىستى جۇمىس ىستەپ جاتقانىنا توقتالىپ, ەكونوميكالىق بايلانىستاردىڭ اۋقىمىن ودان ءارى كەڭەيتۋدىڭ ماڭىزىن اتاپ ءوتتى.
«تاۋ-كەن, جاسىل ەنەرگەتيكا, اتوم ونەركاسىبى, تسيفرلاندىرۋ جانە يننوۆاتسيا, دەنساۋلىق ساقتاۋ, تۋريزم سالالارىندا تىڭ جوبالاردى جۇزەگە اسىرۋعا كەلىستىك. قولدا بار مۇمكىندىكتى ءتيىمدى پايدالانۋ ءۇشىن ۇكىمەتارالىق كوميسسيانىڭ جۇمىسىن جانداندىرىپ, ونىڭ قىزمەتىن جاڭا دەڭگەيگە كوتەرۋگە شاقىردىم. ەكى ەل بيزنەس وكىلدەرىنىڭ بايلانىسىن تەرەڭدەتۋ – ماڭىزدى مىندەتتىڭ ءبىرى. وسىعان وراي, «قازاقستان – سلوۆەنيا» ىسكەرلىك كەڭەسىن قۇرۋ ماسەلەسىن تالقىلادىق. ەلىمىزگە سلوۆەنيانىڭ ءىرى كاسىپكەرلەرى دە كەلدى. ەرتەڭ ولاردىڭ قاتىسۋىمەن بيزنەس-فورۋم وتەدى. بۇل ءىس-شارا وسى باعىتتاعى جۇمىستى كۇشەيتۋگە ىقپال ەتەدى دەپ ويلايمىن», دەدى قازاقستان پرەزيدەنتى.
