تكش-دا حالىققا ءتيىمدى وزگەرىستەر بولادى

كەشە ورتالىق كوممۋنيكاتسيالار قىزمەتىندە ۇلتتىق ەكونوميكا ۆيتسە-ءمينيسترى قايىربەك وسكەنباەۆ پەن «تكش-نى دامىتۋ جانە جاڭعىرتۋدىڭ قازاقستاندىق ورتالىعى» اق باسقارماسىنىڭ توراعاسى سەرگەي ءشايجۇنىسوۆ ءباسپاسوز ءماسليحاتىن وتكىزدى. وندا «نۇرلى جول» باعدارلاماسى شەڭبەرىندە تۇرعىن ءۇي-كوممۋنالدىق شارۋاشىلىقتى جاڭعىرتۋ ماسەلەسى ءسوز بولدى. «نۇرلى جول» مەملەكەتتىك باعدارلاماسى اياسىندا جىلۋ جانە سۋمەن جابدىقتاۋ, سونداي-اق سۋ بۇرۋ جۇيەسىن جاڭعىرتۋعا 450 ملرد. تەڭگە بولىنەتىن كورىنەدى. ينفراقۇرىلىمدى دامىتۋدىڭ 2015-2019 جىلدارعا ارنالعان مەملەكەتتىك باعدارلاماسى اياسىندا اتالعان ماقساتتارعا جالپى العاندا 450 ملرد. تەڭگە بولىنەدى. ول قارجىنىڭ 60 ملرد. – 2015, 90 ملرد. تەڭگەسى 2016 جىلى يگەرىلەدى. ال, 2017-2019 جىلدارى جىل سايىن بۇل سالاعا 100 ملرد. تەڭگەدەن باعىتتالاتىن بولادى. وسى كەزدە جەرگىلىكتى اكىمدىكتەر جالپى سوماسى 269,4 ملرد. تەڭگەنى قۇرايتىن 200 جوبانى ۇسىنىپ وتىر. اعىمداعى جىلى اتالعان جوبالاردى جۇزەگە اسىرۋ ءۇشىن 60 ملرد. تەڭگە بولىنگەندىكتەن ەلىمىزدىڭ بارلىق وڭىرىنەن 96 جوبا ىرىكتەپ الىندى», دەدى ۆيتسە-مينيستر. بۇگىنگى كۇنى قازاقستانداعى جىلۋمەن جابدىقتاۋ ينجەنەرلىك جەلىلەرىنىڭ جالپى ۇزىندىعى 12,5 مىڭ شاقىرىمعا جەتەدى ەكەن. وعان قوسا, گازبەن 29,4 مىڭ, ەلەكتر ەنەرگياسىمەن جابدىقتاۋدا 136,6 مىڭ شاقىرىمدى قۇرايدى. بۇدان بولەك قۋاتى 100 گيگاكولورياعا دەيىنگى 5 646 قازاندىق بار. ودان ۇلكەن قازاندىقتار ەنەرگەتيكا مينيسترلىگىنىڭ قۇزىرىنا كىرەدى. وسى مالىمەتتەردى العا تارتقان سپيكەر سالاداعى شەشىمىن كۇتكەن ءتۇيىندى ماسەلەلەرگە دە نازار اۋدارتتى. وسى ورايدا ەلىمىزدەگى سۋمەن جابدىقتاۋ جەلىلەرىنىڭ شامامەن 24 پايىزى كۇردەلى جوندەۋدى قاجەتسىنەتىنىن ايتتى. «رەسپۋبليكاداعى سۋمەن جابدىقتاۋ جەلىلەرىنىڭ جالپى ۇزىندىعى 61 مىڭ شاقىرىمدى قۇرايدى. ونىڭ 24 پايىزى كۇردەلى جوندەۋدى نەمەسە تولىعىمەن اۋىستىرۋدى قاجەت ەتەدى. سونداي-اق, سۋ بۇرۋ جۇيەسىنىڭ ۇزىندىعى 15 مىڭ شاقىرىمعا تەڭ. ستاتيستيكالىق دەرەكتەرگە سۇيەنسەك, ءبىزدىڭ حالقىمىزدىڭ سانى 17, 4 ملن. ادامدى قۇرايدى. ونىڭ 13,4 ملن. ادامى ورتالىقتاندىرىلعان سۋمەن جابدىقتاۋ جۇيەسىمەن قامتاماسىز ەتىلگەن. ونىڭ 86 پايىزى قالا تۇرعىندارى بولسا, اۋىلدى جەرلەردە ورتالىقتاندىرىلعان سۋمەن جابدىقتاۋ جۇيەسىنە قوسىلعان حالىق سانى 5,2 ملن. ادام. ال, جەكەلەگەن سۋمەن جابدىقتاۋ جۇيەسىن 3,9 ملن. ازامات پايدالانادى», دەدى ق.وسكەنباەۆ. ءباسپاسوز ءماسليحاتىندا تۇرعىن ءۇي-كوممۋنالدىق شارۋاشىلىعى ينجەنەرلىك ينفراقۇرىلىمدارىن جاڭعىرتۋعا حالىقارالىق ينستيتۋتتاردىڭ قارجىسى تارتىلاتىنى دا ايتىلدى. «نۇرلى جول» ينفراقۇرىلىمدى دامىتۋ مەملەكەتتىك باعدارلاماسىنا سايكەس, حالىقارالىق قارجى ۇيىمدارىنىڭ ەسەبىنەن دە قارجىلاندىرۋ بولجانىپ وتىر. قازىرگى قولدا بار جوبالارعا تاياۋ جىلداردىڭ ىشىندە شامامەن 20 ملرد. تەڭگە تارتۋدى جوسپارلاپ قويدىق. مۇنىمەن بىرگە, 2016 جىلعا دا ءدال وسىنداي كولەمدە سۋبسيديا ءبولۋ نەمەسە ينفراقۇرىلىمدىق گرانتتار تارتۋ كوزدەلگەن. بۇل شارا ەلىمىزدىڭ حالقى ءۇشىن تاريفتەردىڭ وسىمىنە جول بەرمەۋ ماقساتىندا قولعا الىنىپ وتىر. سۋبسيديا بەرۋدىڭ ەرەجەسى ازىرلەنۋدە. ءبىز ونى حالىقارالىق قارجى ۇيىمدارىمەن بىرلەسىپ جاساۋدامىز. قازىرگى ۋاقىتتا اتالعان ەرەجە كەلىسىلۋدە. بۇيىرتسا, ول جاقىن كۇندەرى قابىلدانىپ, بەكىتىلەتىن بولادى», دەدى س.ءشايجۇنىسوۆ بۇل تۋرالى. جۋرناليستەردىڭ سۇراقتارىنا جاۋاپ بەرگەن ەكى سپيكەر دە الداعى ۋاقىتتا تكش سالاسىندا حالىققا ءتيىمدى وزگەرىستەر ورىن الىپ, كوپتەگەن يگى شارالار اتقارىلاتىنىن ايتتى. نۇرباي ەلمۇراتوۆ, «ەگەمەن قازاقستان».