قاشقىندار قۇرىقتالدى

قىلمىس كەشە ءىىم-دە اعىمداعى جىلدىڭ 22 ماۋسىمىندا ماڭعىستاۋ وبلىسىنداعى قاتاڭ رەجىمدەگى تۇزەۋ مەكەمەسىنەن 21 ادامنان تۇراتىن ءبىر توپ قارۋلانعان, اۋىر قىلمىس جاساعانى ءۇشىن سوتتالعانداردىڭ قاشىپ كەتۋ وقيعاسىنا بايلانىستى بريفينگ بولىپ ءوتتى. وندا ءباسپاسوز حاتشىسى قۋانىشبەك جۇمانوۆ سوتتالعانداردىڭ تولىق ۇستالعاندىعى تۋرالى حابارلادى. وقيعا بويىنشا از-كەم تۇسىنىكتەمە بەرسەك. سوتتالعاندار تاڭعى ساعات 5 شاماسىندا كىشى ترانسفورماتور ستانساسىن ىستەن شىعارىپ, الدىن الا دايىنداپ العان بوگەت-توسقاۋىلداردى كەسەتىن قۇرالداردى پايدالانا وتىرىپ, تىيىم سالىنعان ايماقتى بۇزىپ وتكەن. قاشۋ بارىسىندا كۇزەتتە تۇرعان ساقشىعا باعىتتاپ بىرنەشە رەت وق اتقان. الايدا ىشكى اسكەردىڭ اسكەري قىزمەتشىسى ءوزىنىڭ جارالان­عانىنا قاراماستان, قاشقىندارعا  قارۋ قولدانىپ, ونىڭ ناتيجەسىندە ءۇش سوتتالعان وقيعا ورنىندا كوز جۇمعان. قاشقىن­داردىڭ ىزىنە تۇسكەن قاراۋىل توبى سوتتالعان­داردىڭ ءبىرىن قاتاڭ رەجىمدەگى تۇزەۋ مەكەمەسىنەن 200 مەتر جەردە جارالاعان, ول العان جاراقاتىنان كەيىن مەديتسينالىق مەكەمەدە قايتىس بولدى. سوتتالعان­داردىڭ ءبىر بولىگى اقتاۋ قالاسىنان 13 شاقى­رىم جەردە سالىنىپ جاتقان عي­ماراتتا جاسىرىنعان. ءىىم ىشكى اسكەرلەرىنىڭ ىزگە ءتۇسۋ توبى مەن جيىنتىق جاساعى عيماراتتى قورشاۋعا الىپ, قىلمىسكەرلەرمەن كەلىسسوزدەر جۇرگىزگەن. ودان ەش ناتيجە شىقپاعان سوڭ سول جەرگە جەدەل تۇردە جەتكەن وبلىستىق ءىىد “ارلان” ارنايى ماقساتتاعى ءبولى­نىسىنىڭ ۇستاۋ توبى ولارعا شابۋىل جاساپ, قارۋلى قارسىلىق كورسەتۋ ناتيجەسىندە 2 سوتتالعان وپات بولىپ, تاعى بىرەۋى اۋىر جارا­لانىپ, سونىڭ سالدارىنان قايتىس بولدى. وسىلايشا وقيعا ورىن العان كۇننىڭ كەشىندە 7 سوتتالعان قايتىس بولىپ, تاعى بىرەۋى تىرىدەي قولعا ءتۇستى. وقيعا ورنىنان اتىس قارۋى, جارعىش پاكەتتەر مەن جارىلعىش زاتتار سالىنعان سومكە, مەتالل جاڭقاسىمەن تولتىرىلىپ قولدان جاسالعان جارعىش قۇرىلعى, جاناتىن قوسىن­دىسى بار 16 بوتەلكە, سونداي-اق 400 مىڭ تەڭگەگە جۋىق اقشا تاركىلەندى. توتەنشە وقيعا ورىن العان كۇندەرى اقتاۋ قالاسىنىڭ ىشكى ىستەر ورگاندارى دەرەۋ دابىل بويىنشا كوتەرىلىپ, ۆوكزال, اۋەجاي مەن سوتتالعانداردىڭ بارۋى ىقتيمال باعىتتار جابىلىپ, قىزمەت كۇشەي­تىلگەن رەجىمگە اۋىستىرىلدى. سون­داي-اق كورشىلەس قىزىلوردا, اتىراۋ, باتىس قازاقستان وبلىس­تارىنىڭ ىشكى ىستەر ورگاندارىنىڭ جەكە قۇرامدارى دابىل بويىنشا كوتەرىلىپ, ولار دا كۇشەيتىلگەن جۇمىس كەستەسىنە ءوتتى. وقيعاعا وراي ىشكى ىستەر ءمينيسترى سەرىك باي­ماعان­بەتوۆ ارنايى جەدەل تەرگەۋ توبىن قۇردى. كريمينالدىق پولي­تسيا كوميتەتىنىڭ توراعاسى س. قۇسەتوۆ باسقارعان ءىىم-ءنىڭ بىرقاتار قىزمەتكەرلەرى ماڭعىستاۋ وبلى­سىنا اتتاندىرىلدى. سونداي-اق ءىىم-ءنىڭ “سۇڭقار” جانە “بۇركىت” ارنايى ماقساتتاعى بولىنىستەرى جىبەرىلىپ, قاشقىنداردى ۇستاۋ ماقساتىنداعى جۇمىسقا جۇمىل­دىرىلدى. مەكەمەدەن قاشىپ شىققان سوتتالعانداردى ىزدەۋ جانە ۇستاۋ جونىندەگى ءىس-شارالار مەم­لەكەت باسشىسىنىڭ تىكەلەي, جەكە باقىلاۋىندا بولدى. جەدەل-ىزدەستىرۋ ءىس-شارالارى­نىڭ ناتيجەسىندە اقتاۋ قالاسىنان 170 شاقىرىم قاشىقتىقتاعى قىزىلساي شاتقالىنان سوتتال­عاندار مەن ولاردىڭ قاشىپ شى­عۋىنا كومەكتەسكەن ادامدار تابىل­دى. 27 ماۋسىمعا قاراعان ءتۇنى ىشكى ىستەر ورگاندارى ارنايى ءبولىنىس­تەرىنىڭ كۇشىمەن وسى ادامداردى ۇستاۋ بويىنشا ارنايى جاۋىنگەر­لىك وپەراتسيا جۇرگىزىلدى. ۇستاۋ كەزىندە ىشكى ىستەر ورگاندارىنا قارۋلى قارسىلىق كورسەتىلگەن. وپەراتسيا ناتيجەسىندە سوتتالعان 5 ادام ۇستالىپ, 8 قىلمىسكەر قايتىس بولعان. سونداي-اق قارۋلى قاقتى­عىستا سوتتالعانداردىڭ قاشۋىنا كومەكتەسكەن 4 ادام قازا تاپقان. پوليتسيا قىزمەتكەرلەرى انىق­تاعان باستاپقى دەرەكتەر بويىنشا, سوتتالعاندار قاشۋعا جارتى جىل بويى دايىندالىپ, جوسپارلاعان كورىنەدى. وقيعا ورنىنان اتىس قارۋى, ۇيالى بايلانىس قۇرالدارى, ازىق-ت ۇلىك, كومپاس جانە 3,5 ملن. تەڭگەدەن استام اقشا الىندى. قىل­مىسكەرلەردى ۇستاۋ جانە ولاردى زالالسىزداندىرۋ بويىنشا وپەرا­تسيالاردى وتكىزۋ كەزىندە ىشكى ىستەر ورگاندارى مەن ىشكى اسكەرلەردىڭ 3 قىزمەتكەرى جاراقات العان. ايدىڭ-كۇننىڭ امانىندا بۇكىل ەلدى دابىر­لاتىپ, ەلدىڭ تىنىشتىعىن بۇزعان وقيعا بويىنشا باس بوستاندىعىن ايىرۋ ورنىنان قاشۋ جانە اسكەري قىزمەتشىنىڭ ومىرىنە قاستاندىق جاساۋ فاكتىلەرىنە بايلانىستى, تۇزەۋ مەكەمەسىنىڭ لاۋازىمدى تۇلعالارىنا قاتىستى قك-ءنىڭ 316- بابى (سالاقتىق) بويىنشا 3 قىل­مىستىق ءىس قوزعالدى. قىلمىس جاسا­دى دەگەن كۇدىكپەن قاتاڭ رەجىمدەگى مەكەمەنىڭ باستىعى, جەدەل ءبولىمنىڭ باستىعى جانە مەكەمە باستىعىنىڭ كەزەكشى-كومەكشىسى ۇستالىپ, ولار ۋاقىتشا ۇستاۋ يزولياتورىنا قاماۋعا الىندى. قازىرگى ۋاقىتتا تەرگەۋ امالدارى جۇرگىزىلۋ ۇستىندە. ۆەنەرا تۇگەلباي. اسا ءىرى كولەمدەگى كونتراباندا انىقتالدى استانا قالاسى بويىنشا كەدەن­دىك باقىلاۋ دەپارتامەنتى كونترا­بانداعا قارسى كۇرەس باسقارماسى­نىڭ قىزمەتكەرلەرى استانا قالاسى حالىق­ارالىق اۋەجايىنىڭ ۇشۋ زالىندا ا. ا. دەگەن رەسەي ازاماتىن ۇستادى. بۇل ازامات قازاقستان اۋماعىنا تۇركىمەنستاننان, ياعني الماتى قالاسىنىڭ حالىقارالىق اۋەجايىنا ۇشىپ كەلگەندە 145 000 اقش دول­لارى كولەمىندە كەدەندىك دەكلاراتسيا تولتىرعان. ال قازاق­ستان اۋماعىنان ۇشىپ شىعاردا 120 000 اقش دول­لارى كەدەندىك دەك­لاراتسياسىن تولتىرعان. بىراق كەدەنشىلەردىڭ قى­راعى تەكسەرىسى ارقاسىندا جو­عارىدا اتالعان ازا­مات­تان زاڭسىز جاسى­رىلعان 117 610 اقش دوللارى, 40 000 ەۋرو, 40 رەسەي ءرۋبلى, 22 قىرعىز سومى بار ەكەنى انىقتالىپ, الىندى. سوندا “قازاقستان رەسپۋبلي­كاسى حالىق بانكى” مم-ءنىڭ ورتا­لىق فيليالىنىڭ مالىمەت­تەرىنە سايكەس, 1 اقش دوللارى – 147, 28 تەڭگە, 1 ەۋرو – 179,40 تەڭگە, 1 رەسەي ءرۋبلى – 4,69 تەڭگە, 1 قىرعىز سومى 3,22 تەڭگە بولسا, رەسەيلىكتەن الىنعان شەتەل ۆاليۋتاسىنىڭ قۇنى 24 497 859,44 تەڭگەنى قۇرادى. دەمەك, بۇل اسا ءىرى كولەمدەگى كونتراباندا بولىپ تابىلادى. وسى دەرەككە قاتىستى ا.ا. دەگەن ازاماتقا قاتىستى قر قك-ءنىڭ 209-بابى (ەكونوميكالىق كونتراباندا) بويىنشا قىلمىستىق ءىس قوزعالدى, دەپ حابارلادى استانا قالاسى بويىنشا كەدەندىك باقىلاۋ دەپارتامەنتىنىڭ ءباسپاسوز قىزمەتى.