مەرەيتويلارعا دايىندىق باستالدى

بيىل ەلىمىز ءۇشىن ۇلكەن مەرەيتويلىق مەرەكەلەرگە تولى جىل. اسىرەسە, مامىر ايىندا ايتۋلى مەرەكەلەر اتالىپ وتىلەدى. سونىڭ ىشىندە مەرەيتويلاردىڭ نەگىزگى دەنى ەلىمىزدىڭ باس قالاسى – استانادا وتكىزىلەرى تاعى بەلگىلى. كەشە ەلوردانىڭ ءبىر توپ جاۋاپتى قىزمەتكەرى وسىعان وراي ارنايى ءباسپاسوز ءماليحاتىن وتكىزىپ, بىرقاتار تۇسىنىكتەر بەرە كەتتى. استانا قالاسى مادەنيەت باسقارماسى باسشىسىنىڭ ورىنباسارى ناريما مۇحامبەتالينا بيىل وتان قورعاۋشىلار كۇنى جانە دە وتان سوعىسىنىڭ جەڭىسىنە 70 جىلدىعى اتالىپ وتكەلى جاتقاندىعىن ەرەكشە اتادى. ونىڭ ايتۋىنشا, مامىردىڭ 7, 8 جانە 9-ىندا استانا قالاسىنىڭ مادەني وشاقتارىندا ەلۋدەن استام ءىس-شارا وتكىزىلەدى. سونىڭ ىشىندە ەڭ ماڭىزدىسى 7 مامىردا وتەتىن اسكەري شەرۋ بولماق. قالالىقتار مەن كەلگەن قوناقتار ءۇشىن ەلور­دانىڭ اشىق الاڭدارىندا ۇلكەن كونتسەرتتىك باعدارلامالار ۇيىم­داستىرىلىپ, ولاردا وتاندىق ەسترادا جۇلدىزدارى ءوز ونەرلەرىن پاش ەتەتىنى اتالماي قالعان جوق. ال 8 مامىردا قالاداعى ەسكەرتكىشتەرگە گۇل شوقتارىن قويۋ راسىمدەرى ورىن الاتىنى دا العا تارتىلدى. ن.مۇحامبەتالينا, سونىمەن قاتار, كونگرەسس-حولدا «پوكلونيمسيا ك تەم گودام» اتتى كونتسەرتتىڭ ورىن الارىن دا جەتكىزدى. بۇدان كەيىن ءسوز العان استانا قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى مەيىرلان نارىنبەتوۆ ارداگەرلەردى پاتەرمەن قامتاماسىز ەتۋ ماسەلەسى تولىق شەشىمىن تاپقانىنا نازار اۋدارتتى. ونىڭ سوزىنە قاراعاندا, 20 ساۋىردە سوڭعى 6 پاتەر ءبولىنىپ, ولار ەلىمىزدىڭ وڭىرلەرىنەن قونىس اۋدارعان ارداگەرلەرگە بەرىلىپتى. جانە دە تۇرعىن ءۇي جانە تۇرمىستىق جاعداي بويىنشا جۇرگىزىلگەن زەرتتەۋ ناتيجەسىندە 84 ارداگەردىڭ باسپاناسىنا ءتۇرلى دەڭگەيدەگى جوندەۋ جۇمىستارى جۇرگىزىلەدى. سونداي-اق, م.نارىنبەتوۆ ماسكەۋدەگى پارادقا قازاقستاننان 6 ۇوس ارداگەرى بارارىنان حاباردار ەتە كەتتى. 7 مامىردا ەلورداداعى وتەتىن اسكەري شەرۋ كەزىندە بىرقاتار شەكتەۋلەردىڭ ورىن الارى دا اتالماي قالعان جوق. استانا قالاسى ىشكى ىستەر دەپارتامەنتىنىڭ اكىمشىلىك پوليتسياسى باسقارماسىنىڭ باسشىسى باقىتجان مالىباەۆ تاڭعى 6-دان تۇسكى 14:00-گە دەيىن تاۋەلسىزدىك داڭعىلى بويىمەن ب.مومىش ۇلى كوشەسىنەن ش.قالداياقوۆ كوشەسىنە دەيىن; ش.قالداياقوۆ كوشەسىمەن م3 كوپىرى جول ايىرىعىنان باس­تاپ وباعان كوشەسىنە دەيىن; ر. قوشقارباەۆ كوشەسى بويىمەن ب. مومىش ۇلى كوشەسىنەن باستاپ سارىكول كوشەسىنە دەيىن جابىلادى. ايناكول كوشەسى بويىمەن سارىكول كوشەسىنەن باستاپ ناجىمەدەنوۆ كوشەسىنە دەيىن كولىك قوزعالىسى تولىق توقتاتىلادى. سونداي-اق, 4-7 مامىر ارالىعىندا اسكەري شەرۋگە دايىندىقتىڭ وتۋىنە بايلانىستى تاۋەلسىزدىك داڭ­عىلىمەن ا. بايتۇرسىنوۆ كوشەسىنەن ناجىمەدەنوۆ كوشەسى­نە دەيىن جابىلاتىن بولادى. سون­دىقتان دا قالا جانە قالا قوناق­تارى بۇل جايتتارعا تۇسىنىستىكپەن قاراۋى كەرەك. اسكەري شەرۋ وتكىزى­لەتىن كۇنى قالالىق ىشكى ىستەر دەپارتامەنتىنىڭ 3 مىڭعا تارتا قىز­مەتكەرلەرى مەن 180 كولىگى جۇمىل­دىرىلارى دا العا تارتىلدى. قالالىق كولىك-اۆتوموبيل جول­دارى باسقارماسى باسشىسىنىڭ ورىن­باسارى ءابدىحاميت تاماباەۆ اۆتوبۋستار مارشرۋتىنىڭ وزگەرى­سىن حابارلادى. ول بۇل رەتتە اسكەري شەرۋلەردىڭ وتۋىنە بايلانىستى تەك جابىلعان كوشەلەردە جۇرەتىن اۆتوبۋستاردىڭ مارشرۋتتارى وزگەرەرىن العا تارتتى. اسكەري شەرۋ بىتىسىمەن اۆتوبۋستار باياعى مارشرۋتتارىمەن جۇرە باستايدى. اسقار تۇراپباي ۇلى, «ەگەمەن قازاقستان».