وتىرىسقا قحا توراعاسىنىڭ ورىنباسارى – پرەزيدەنت اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ, پارلامەنت دەپۋتاتتارى, مادەنيەت جانە اقپارات ۆيتسە-ءمينيسترى ەۆگەني كوچەتوۆ, قحا توراعاسىنىڭ ورىنباسارلارى لۋگمار بۋلاروۆ, يۋري شين, قازاقستان حالقى اسسامبلەياسى كەڭەسىنىڭ مۇشەلەرى, رەسپۋبليكالىق ەتنومادەني بىرلەستىكتەر مەن قوعامدىق قۇرىلىمداردىڭ وكىلدەرى قاتىستى.
– 30 جىل – از عانا ۋاقىت ەمەس. اسسامبلەيا العاش قۇرىلعان ساتتەن باستاپ, نەگىزگى مىندەتتەرى ايقىندالىپ, قوعامداعى ەتنوسارالىق كەلىسىم مەن بىرلىكتى قالىپتاستىرۋدا, ودان ءارى نىعايتۋدا, ءارتۇرلى ەتنوس وكىلدەرىنىڭ مۇددەلەرىن قورعاپ, ولاردىڭ ءتول مادەني قۇندىلىقتارىنىڭ ساقتالۋىنا وزىندىك ۇلەس قوسىپ كەلەدى. سوندىقتان مەرەيلى داتانى تويلاۋدا جاي عانا مەرەكەلىك جيىندار سارىنى ەمەس, ايرىقشا ءمان-ماڭىزعا يە ءىس-شارالار وتكىزىلەدى. جىل باسىنان بەرى العاشقى كەزەڭىن اياقتادىق دەسەك بولادى, ياعني قاڭتار, اقپان جانە ناۋرىز ايىنىڭ ءبىر بولىگىن, ياعني 3 مىڭعا جۋىعىن ءبىز اقپاراتتىق-ءتۇسىندىرۋ سيپاتىنداعى ءىس-شارالارعا ارنادىق. ءتۇرلى تاقىرىپتاعى ماتەريالدار جاريالاندى. ال جالپى, ءۇش ايدا بارلىق جوبانىڭ قورىتىندىسى بويىنشا 15 مىڭنان اسا ءىس-شارا ۇيىمداستىرىلىپتى. اتقارىلعان جۇمىستار ءۇشىن مەن كەڭەس مۇشەلەرىنە ەرەكشە العىسىمدى بىلدىرەمىن. بۇل جۇمىستاردى ءارى قاراي دا بەلسەندى, جۇيەلى جالعاستىرۋىمىز كەرەك, – دەدى م.ءازىلحانوۆ.
كەڭەستە ل.بۋلاروۆ پەن يۋ.شين دە قحا-نىڭ قوعامدىق ورىنباسارلارى رەتىندە اتقارعان جۇمىستارىنا ەسەپ بەردى. ال ە.كوچەتوۆ مەملەكەت باسشىسىنىڭ قازاقستان حالقى اسسامبلەياسىنىڭ ءحححىىى سەسسياسىندا بەرگەن تاپسىرمالارىن مادەنيەت جانە اقپارات مينيسترلىگى, باسقا دا مەملەكەتتىك ورگاندار مەن قوعامدىق ۇيىمداردىڭ ورىنداۋى تۋرالى باياندادى.
– جالپى, قحا توراعاسىنا 23 تاپسىرما بەرىلدى, ولاردىڭ 17-ءى – ورتالىق مەملەكەتتىك ورگاندارعا, التاۋى جەرگىلىكتى اتقارۋشى ورگاندارعا جۇكتەلدى. اتالعان تاپسىرمالاردىڭ ىشىندە مادەنيەت جانە اقپارات مينيسترلىگىنە 12 تاپسىرما بەرىلگەن. بارلىق تاپسىرما مەرزىمىندە ورىندالدى. قويىلعان ماقساتتارعا قول جەتكىزۋ ءۇشىن مينيسترلىك مەملەكەتتىك ورگاندارمەن, قوعامدىق ۇيىم وكىلدەرىمەن بىرگە قوعامدىق كەلىسىمدى نىعايتۋ, ازاماتتىق بەلسەندىلىكتى دامىتۋ جانە ەتنوسارالىق ديالوگتى قولداۋ باعىتىندا كەشەندى شارالاردى جۇزەگە اسىردى. ورتالىق جانە جەرگىلىكتى اتقارۋشى ورگاندارمەن, قوعامدىق ينستيتۋتتارمەن بىرلەسىپ, قحا-نىڭ 30 جىلدىعىن اتاپ وتۋگە ارنالعان ءىس-شارالار جوسپارى ازىرلەندى. 400 اۋقىمدى ءىس-شارا, 5 مىڭ الەۋمەتتىك ماڭىزى بار جوبا, يميدجدىك باستامالار بار. جوسپار بويىنشا 1,5 ملن-نان اسا ادامدى قامتۋ كوزدەلىپ وتىر. قازىرگى ۋاقىتتا اسسامبلەيانىڭ 13 ارنايى جوباسى, 34 جول كارتاسى جۇزەگە اسىرىلىپ جاتىر, – دەدى ە.كوچەتوۆ.
سونداي-اق بەس الەۋمەتتىك كەسەلمەن كۇرەس – ناشاقورلىق, قۇمار ويىندارعا تاۋەلدىلىك, وتباسىنداعى جانە قوعامداعى زورلىق-زومبىلىق, ۆانداليزم جانە ىسىراپشىلدىق تۋراسىندا 6 مىڭنان اسا ءتۇرلى فورماتتاعى ءىس-شارالار وتكىزىلىپ, تاقىرىپتىق اكتسيالار دا ۇيىمداستىرىلىپتى. پاتريوتيزم, مادەنيەتكە دەگەن سۇيىسپەنشىلىكتى ناسيحاتتاۋ, جالپىۇلتتىق بىرلىكتى جانە كەلىسىمدى نىعايتۋعا ىقپال ەتۋ ماقساتىندا ەلىمىزدىڭ تەاترلارىندا وتاندىق اۆتورلاردىڭ شىعارمالارى بويىنشا 1 744 سپەكتاكل قويىلعان.
بۇعان قوسا قازاقستاننىڭ 20 وڭىرىندە اسسامبلەيانىڭ حاتشىلىعىمەن بىرلەسىپ, قحا-مەن ءوزارا ارەكەتتەسەتىن دەپۋتاتتىق توپتار قۇرىلدى. قحا قوعامدىق قۇرىلىمدارىنىڭ مادەني بىرلەستىكتەرى جەتەكشىلەرىنىڭ ورىنباسارلارى رەتىندە جاستاردى كانديداتۋراسى قارالعان. ناتيجەسىندە, توراعالاردىڭ ورىنباسارلارى رەتىندە 14 رەسپۋبليكالىق جانە 243 وڭىرلىك ەتنومادەني بىرلەستىكتەردىڭ بەلسەندى جاستارى تاعايىندالدى.
بۇگىندە رەسپۋبليكا كولەمىندە 32 دوستىق ءۇيى جۇمىس ىستەيدى. ولار جەرگىلىكتى تۇرعىندار ءۇشىن كوميۋنيتي-ورتالىق رەتىندە ءوز قىزمەتىنىڭ اياسىن كەڭەيتتى. وسىلايشا, دوستىق ۇيلەرىندە 2 700-دەن اسا ءىس-شارا وتكىزىلىپ, وعان شامامەن 300 مىڭ ادام قاتىسقان.
جيىن سوڭىندا كەڭەس مۇشەلەرى قازاقستان حالقى اسسامبلەياسىنىڭ جانە قحا كەڭەسىنىڭ جاڭارتىلعان قۇرامىن قاراستىرىپ, قحا انالار كەڭەسىنىڭ ۇلگىلىك ەرەجەسىن بەكىتتى.
