جالپى, سارى قۇرلىقتىڭ باستى دوداسىندا جاپونيا قۇراماسىنىڭ كوماندالىق ەسەپتە وزگەلەرگە ەسە جىبەرگەن كەزدەرى سيرەك. ماسەلەن, سول كەزدەن بەرى ۇيىمداستىرىلعان 27 جارىستىڭ 19-ىندا كۇن شىعىس ەلى وكىلدەرىنىڭ اسىعى الشىسىنان ءتۇستى. قىتاي قىزدارىنىڭ التى رەت مەرەيى ۇستەم بولدى. 2021 جىلى كوروناۆيرۋستىڭ كەسىرىنەن الماتىدا جالاۋى جەلبىرەگەن جارىسقا اتالعان مەملەكەتتىڭ بۇرىمدىلارى كەلمەدى. بالۋان شولاق اتىنداعى سپورت سارايىندا وتكەن سول باسەكەدە ءۇندى ەلى وكىلدەرىنىڭ باق جۇلدىزى جاندى.
تۇساۋكەسەر ازيا چەمپيوناتىندا ەلىمىزدىڭ قۇراماسى ءبىر قولاعا قول جەتكىزدى. ول جۇلدەنى 57 كگ سالماقتا بەلدەسكەن سۆەتلانا ۆولكوۆا يەلەندى. اتالعان دودادا ەلىمىز بارلىعى 86 جۇلدە ولجالادى. ونىڭ 19-ى التىن, 16-سى كۇمىس, 51-ءى قولا. جەڭىس تۇعىرىنىڭ ەڭ بيىك ساتىسىنا كوتەرىلگەندەر قاتارىندا سۆەتلانا ياروشەۆيچ (2003), جۇلدىز ەشىموۆا (2007), ەلەنا شالىگينا (2009, 2012), تاتيانا امانجول (2009, 2013, 2014, 2020), گۇزال مانيۋروۆا (2010, 2011, 2012, 2014), ءجاميلا باقبەرگەنوۆا (2020, 2022, 2023), ۆالەنتينا يسلاموۆا (2021), ەلميرا سىزدىقوۆا (2021, 2023), ءمادينا باقبەرگەنوۆا (2022) سىندى سۇلۋلار بار.
جەرلەستەرىمىز ءۇشىن 2009, 2012, 2014, 2019, 2020, 2021, 2022, 2023 جىلدار تابىستى بولدى. سول جارىستاردا ءانۇرانىمىز ەكى رەتتەن شىرقالدى. 2003, 2007, 2010, 2011, 2013 جىلدارى ءبىر-ءبىر التىننان يەلەندىك. قالعان باسەكەلەردە كۇمىس پەن قولانى قورجىنعا سالعانىمىزبەن, باس جۇلدەگە قول جەتكىزە المادىق.
ازيا چەمپيوناتىندا بارلىعى 11 كومانداعا عانا باس جۇلدە بۇيىرعان ەكەن. سولاردىڭ اراسىنداعى ەڭ تابىستىلارى – جاپونيا مەن قىتاي. جاپوندار 102 التىن السا, قىتايلىقتار 57 رەت توپ جاردى. وسى كورسەتكىش جونىندە 19 التىنى بار ەلىمىز ءۇشىنشى ورىندا. باسقا ەلدەردىڭ ناتيجەلەرى مىناداي: موڭعوليا مەن ءۇندىستان – 10, قىرعىزستان – 8, وڭتۇستىك كورەيا مەن سولتۇستىك كورەيا – 4, تۇرىكمەنستان مەن تايپەي – 1.
2020–2023 جىلدار ارالىعىندا نيۋ-دەلي, الماتى, ۇلانباتىر, استانادا وتكەن جارىستاردا ەلىمىزدىڭ ايەلدەر قۇراماسى ەكى التىننان ولجالاپ, جالپى ەسەپتە ۇزدىك ۇشتىكتىڭ قاتارىنان كورىندى. ءجاميلا باقبەرگەنوۆا ازيانىڭ ءۇش دۇركىن چەمپيون اتانسا, ەلميرا سىزدىقوۆاعا بۇل بەلەس ەكى رەت باعىندى. تاتيانا امانجول, ۆالەنتينا يسلاموۆا, ءمادينا باقبەرگەنوۆانىڭ ءبىر مارتە مەرەيى ۇستەم بولدى.
بىلتىر بىشكەكتە شىمىلدىعى تۇرىلگەن باسەكەدە بىردە-ءبىر بۇرىمدىمىز التىن تۇعىرعا كوتەرىلە المادى. الاتاۋدىڭ ارعى بەتىندەگى ايقاستى ءتورت قولامەن قورىتىندىلادىق. جۇلدە يەگەرلەرى – لاۋرا الماعامبەتوۆا, ديانا كايۋموۆا, اناستاسيا پاناسوۆيچ, ەلميرا سىزدىقوۆا. ەندى قازاق قىزدارى امماندا وتەتىن ازيا چەمپيوناتىندا سول ولقىلىقتىڭ ورنىن تولتىرادى دەپ ۇمىتتەنەمىز.
ايەلدەر كۇرەسىنەن 2024 جىلعى ازيا چەمپيوناتىنىڭ جەڭىمپازدارى: 50 كگ – يۋي سۋساكي (جاپونيا), 53 كگ – كيم دجيحانگ (سولتۇستىك كورەيا), 55 كگ – مو كيوكا (جاپونيا), 57 كگ – فەنگ يونسين (قىتاي), 59 كگ – جانگ سي (قىتاي), 63 كگ – ايسۇلۋ تىنىبەكوۆا (قىرعىزستان), 65 كگ – ماحيرو يوسيتاكە (جاپونيا), 68 كگ – نوناكا ودزاكي (جاپونيا), 72 كگ – دجانگ سيان (قىتاي), 76 كگ – ايپەرى مەدەتقىزى (قىرعىزستان).
