فوتو: facebook.com/askhat.aimagambetov
ۇلتتىق قۇرىلتاي جاي عانا تالقىلاۋ ەمەس, پروبلەمالاردىڭ شەشىمىن ناقتىلايتىن تەتىك, ال بيلىك سولاردى زاڭنامالىق رەسىمدەۋ مەن ىسكە اسىرۋعا مۇمكىندىك بەرەدى. سوندىقتان دا قۇرىلتاي ناتيجە بەرەتىن فورمات ەكەنىن سەنىممەن ايتا الامىن.
قۇرىلتايدىڭ ءۇشىنشى وتىرىسىنىڭ قورىتىندىسى بويىنشا 10 زاڭ جوباسىنا باستاماشىلىق جاسالىپ, ونىڭ 9-ىنا پرەزيدەنت قول قويدى. قۇرىلتايدا كوتەرىلگەن تاقىرىپتاردىڭ باسىم بولىگى الەۋمەتتىك ساياساتقا, مادەنيەتكە جانە قوعامدىق قۇندىلىقتارعا تىكەلەي قاتىستى بولعاندىقتان, سالالىق كوميتەت توراعاسى رەتىندە وسى جۇمىستارعا تىكەلەي قاتىستىم. نەگىزگى وزگەرىستەر اراسىندا ويىن بيزنەسىن جارنامالاۋعا تىيىم سالۋ, تاريحي ەسكەرتكىشتەر مەن تابيعي نىسانداردى قورعاۋ, ماراپات جۇيەسىن كەڭەيتۋ, ايەلدەر مەن بالالاردى زورلىق-زومبىلىقتان قورعاۋ, باتىرلار ەسىمىن ۇلىقتاۋ, ەسىرتكى قىلمىسىنا جازانى كۇشەيتۋ, ونوماستيكا ەرەجەلەرىن جاڭارتۋ, وڭىرلىك رامىزدەردى رەتتەۋ باستامالارى بار. سونىمەن قاتار ارحەولوگيا سالاسىن رەفورمالاۋ جۇمىستارى جوسپارلانىپ وتىر. وندا ليتسەنزيالاۋدىڭ جاڭا ستاندارتتارى ەنگىزىلەدى, زاڭسىز قازبا جۇمىستارى ءۇشىن جازالاۋ شارالارى كۇشەيتىلەدى.
ۇلتتىق قۇرىلتاي بۇل وقشاۋلانعان باستاما ەمەس, پرەزيدەنتتىڭ كەڭ اۋقىمدى رەفورمالىق ساياساتىنىڭ ءبىر بولىگى ەكەنىن اتاپ ءوتۋ ماڭىزدى. «حالىق ۇنىنە قۇلاق اساتىن مەملەكەت» باعىتى مەن قوعامدىق ءۇن قاتۋدى كۇشەيتۋ اياسىندا قۇرىلتاي ازاماتتاردىڭ ۇسىنىستارى ناقتى زاڭدار مەن رەفورمالارعا اينالاتىن قۇرالعا اينالدى.
اسحات ايماعامبەتوۆ,
ءماجىلىس دەپۋتاتى
