فوتو: shutterstock
26 ناۋرىز كۇنى ارنايى كوميسسيا جاۋعاشتى ايەلدەر كولونياسىنداعى بالالاردىڭ ۋلانۋى تۋرالى اقپاراتتى تەكسەرگەن. تەكسەرىس جۇمىستارىنا دەنساۋلىق ساقتاۋ باسقارماسى, ارنايى پروكۋرور, سانيتارلىق-ەپيدەميولوگيالىق باقىلاۋ قىزمەتى جانە قاجد وكىلدەرى قاتىسقان.
ناتيجەسىندە 14 بالانىڭ ۋلانعانى تۋرالى اقپارات راستالماعان. الايدا, 22-23 ناۋرىز ارالىعىندا ءۇش بالا ىلە اۋداندىق ورتالىق اۋرۋحاناسىنىڭ جۇقپالى اۋرۋلار بولىمىنە «ەنتەروۆيرۋستىق ينفەكتسيا, 0-1 دارەجەلى سۋسىزدانۋ» دياگنوزىمەن تۇسكەن.
«ولاردىڭ جاعدايى ورتاشا اۋىرلىقتا, وڭ ديناميكا بايقالادى. ءبىر بالا باستاپقىدا جانساقتاۋ بولىمىندە بولدى, كەيىن جۇقپالى اۋرۋلار بولىمىنە اۋىستىرىلدى. قازىر ەكى بالا اناسىمەن بىرگە جۇقپالى بولىمدە, بىرەۋى – اناسىن ەمدەۋ كەزىندە وعان كۇتىم جاساپ جاتقان مەيىرگەردىڭ باقىلاۋىندا بولادى», دەلىنگەن حابارلامادا.
دارىگەرلەر بالالار ۇيىندەگى بارلىق تاربيەلەنۋشىلەر تولىق مەديتسينالىق تەكسەرىستەن وتكەنىن, ولاردان ينفەكتسيا بەلگىلەرى انىقتالماعانىن مالىمدەگەن. بۇگىندە بالالار ۇيىندە 63 سوتتالعان ايەل ءوز بالالارىمەن بىرگە تۇرىپ جاتىر. ونىڭ ىشىندە 14 بالا – ەڭبەكتەپ جۇرەتىن توپتا.
ەستەرىڭىزگە سالا كەتەيىك, بۇعان دەيىن قۇقىق قورعاۋشى ايمان وماروۆا الەۋمەتتىك جەلىدە بالالاردىڭ جاپپاي ۋلانعانى جانە انالارىنىڭ ولارمەن كەزدەسە الماي جاتقانى تۋرالى اقپارات تاراتقان ەدى.
