فوتو: parlam.kz
ە.سمىشلياەۆانىڭ ايتۋىنشا وسىدان ەكى جىل بۇرىن قابىلدانعان تسيفرلىق اكتيۆتەر تۋرالى زاڭ يننوۆاتسيالىق نارىقتى رەتتەۋ مەن دامىتۋدىڭ العاشقى قادامى بولدى. الايدا, سالاداعى جاعداي كۇن سايىن وزگەرىپ وتىراتىندىقتان العا جىلجۋ كەرەك. اعىمداعى جاعدايدى تالداۋ يندۋستريانىڭ بىرقاتار پروبلەمالارىن كورسەتتى. قازىرگى ۋاقىتتا قازاقستانداعى تسيفرلىق اكتيۆتەر «استانا» حالىقارالىق قارجى ورتالىعىنىڭ (احقو) كريپتوبيرجالارىندا عانا زاڭدى تۇردە اينالىسقا جىبەرىلە الادى. بۇل رەتتە, ساراپشىلاردىڭ باعالاۋىنشا, قازاقستاننىڭ كريپتوينۆەستورلارىنىڭ 5% -ى عانا وسى الاڭدى پايدالانادى, ال قالعاندارى «سۇر ايماقتا» جۇمىس ىستەيدى.
ە.سمىشلياەۆانىڭ سوزىنشە, ەكىنشىدەن, ەل ەكونوميكاسىنا تسيفرلىق ماينەرلەردىڭ قاتىسۋى تومەندەپ وتىر.
«بۇگىندە كومپانيالار سالىق تولەيدى, ماينەرلەردىڭ ورتالىقتارى ەنەرگيا جۇيەسىنىڭ تەڭگەرىمدەۋشى ەلەمەنتىنە اينالدى. الايدا, ازىرگە مۇنداي كومپانيالارعا دەگەن سەنىم دەڭگەيى تومەن كۇيىندە قالىپ وتىر, ولار زور الەۋەت پەن رەسۋرستارعا يە بولعانىمەن, ءىس جۇزىندە يننوۆاتسيالىق ەكونوميكاعا قاتىسپايدى», دەدى ە.سمىشلياەۆا.
دەپۋتاتتىڭ سوزىنشە بۇگىندە تسيفرلىق اكتيۆتەر سالاسى جىلىستاتۋ ورتاسىنا اينالعاندىقتان قىلمىستىق كىرىستەردى زاڭداستىرۋ بەلەڭ العان. زاڭسىز كريپتوالماسۋشىلارعا قاتىستى بىرقاتار قىلمىستىق ىستەر بويىنشا اينالىم مولشەرىندەگى ءوندىرىپ الۋ سوماسى 5-6 ملرد. تەڭگەنى قۇرايدى.
وسى جانە باسقا دا جايتتاردى تالداي كەلە ءماجىلىس دەپۋتاتى ەكاتەرينا سمىشلياەۆا تسيفرلىق اكتيۆتەر سالاسىن ودان ءارى دامىتۋ جانە زاڭ بۇزۋشىلارعا ارنالعان قىلمىستىق قۇرامداردى قايتا قاراۋ بويىنشا بىرقاتار ۇسىنىستارىن ايتتى.
«كولەڭكەلى نارىقتى ازايتۋ ءۇشىن قامتاماسىز ەتىلمەگەن تسيفرلىق اكتيۆتەردىڭ اينالىمىنا سالىنعان تىيىمدى شەكتەۋ شاراسىنا وزگەرتۋ, ياعني جەكە تۇلعالارعا ليتسەنزيالانعان پلاتفورمالار ارقىلى قاتىسۋعا مۇمكىندىك بەرۋ.
تسيفرلىق اكتيۆتەردىڭ بارلىق تۇرلەرىن زاڭدى تۇردە شىعارۋ جانە اينالىمعا ەنگىزۋ ينفراقۇرىلىمىن كەڭەيتۋ ماقساتىندا تسيفرلىق اكتيۆتەر سالاسىنداعى قىزمەت كورسەتەتىن ليتسەنزيالانعان پروۆايدەرلەردىڭ (ايىرباستاۋ ورىندارى) سانىن كەزەڭ-كەزەڭىمەن احقو اياسىندا, كەيىن ۇلتتىق دەڭگەيدە ارتتىرۋ.
تسيفرلىق اكتيۆتەر سالاسىنداعى قىلمىسپەن كۇرەس تيىمدىلىگىن ارتتىرۋ ءۇشىن باقىلاۋ شارالارىن قاراپايىم پايدالانۋشىلاردان الاياق دەلدالدارعا اۋىستىرۋ.
تسيفرلىق اكتيۆتەر سالاسىنداعى قۇقىق بۇزۋشىلىقتار بويىنشا قىلمىستىق جاۋاپكەرشىلىك نەگىزدەرىن قايتا قاراۋ.
ليتسەنزيالانعان ماينينگتىك كومپانيالاردى ەنەرگەتيكا سالاسىن قوسا العاندا, ءتۇرلى ينۆەستيتسيالىق جوبالارعا قاتىسۋعا تارتۋ.
يننوۆاتسيالىق قىزمەتتى قولداۋدىڭ باسىم باعىتتارىنىڭ قاتارىنا قامتاماسىز ەتىلگەن تسيفرلىق اكتيۆتەردىڭ شىعارىلۋى مەن اينالىمىنا بايلانىستى جوبالاردى قوسۋ.
تسيفرلىق اكتيۆتەر سالاسىن رەتتەۋ ءۇشىن پيلوتتىق جانە ەكسپەريمەنتتىك قۇقىقتىق رەجيمدەردى كەڭىنەن پايدالانۋ», دەدى ماجىلىسمەن.
ە.سمىشلياەۆانىڭ ايتۋىنشا زاڭنامانى وزگەرتۋ بويىنشا قازىرگى ۋاقىتتا دەپۋتاتتار رەتتەۋشى ورگاندارمەن بىرلەسىپ شۇعىل, پەرسپەكتيۆالى ۇسىنىستار دايىندادى. الايدا, تسيفرلىق كودەكس جوباسى 7 اي بويى ۇكىمەتتىڭ قورىتىندىسىن كۇتىپ جاتىر.
«اتالعان قۇجاتتار تسيفرلىق اكتيۆتەرمەن وپەراتسيالاردىڭ اشىقتىعى مەن زاڭدىلىعىن قامتاماسىز ەتۋگە مۇمكىندىك بەرەدى. وسىعان بايلانىستى, ءتيىستى مەملەكەتتىك ورگانداردىڭ بۇل ماسەلە بويىنشا كەلىسىم بەرۋىن جانە ۇيلەسىمدى جۇمىس ىستەۋ پروتسەسىن جەدەلدەتۋىن سۇرايمىز», دەپ اياقتادى ساۋالىن دەپۋتات.
