دەپۋتاتتىڭ ايتۋىنشا بۇگىندە قازاقستاننىڭ 14 وبلىسى كورشىلەس 5 ەلمەن (رەسەي, قىتاي, وزبەكستان, قىرعىزستان, تۇركىمەنستان) شەكتەسەدى. شەكارالىق ايماقتاردا 65 اۋدان بار. وندا 3,5 ملن ادام تۇرادى. ال شەكارانىڭ تۇبىندە, ياعني شەكارادان 50 شاقىرىمدىق ارالىقتا 1,7 ملن. حالىق تۇراتىن 1 283 ەلدى مەكەن ورنالاسقان.
«الايدا, كەزىندە جۇرگىزىلگەن اۋدانداردى بىرىكتىرۋ, كليماتتىڭ قولايسىزدىعى, جۇمىسسىزدىق, كولىك قاتىناسىنىڭ ناشارلىعى, الەۋمەتتىك جانە ينجەنەرلىك ينفراقۇرىلىمنىڭ توزۋى, كەڭەس وداعى كەزىندە شەكارالىق اۋدانداردا حالىق سانىن تۇراقتاندىرۋ ءۇشىن قولدانىلعان جەڭىلدىكتەردىڭ جويىلۋى سەكىلدى كوپتەگەن سەبەپتەن بۇگىندە 65 شەكارا ماڭىنداعى اۋداننىڭ 40-ىندا حالىق سانى ازايىپ كەتكەن. اسىرەسە, بۇل اۋا-رايى قاتاڭ سولتۇستىك قازاقستان, قوستاناي, پاۆلودار, شىعىس قازاقستان وبلىستارىندا انىق بايقالىپ وتىر», دەدى ە.سايروۆ.
وسىعان بايلانىستى مەملەكەت باسشىسىنىڭ تىكەلەي باستاماسىمەن شىعىس قازاقستان, اباي وبلىستارىندا قاتون-قاراعاي, مارقاكول, تارباعاتاي, ماقانشى اۋداندارىنىڭ اشىلۋى وتە ورىندى ءىس بولعانىن, بۇل سول اۋدانداردىڭ الەۋمەتتىك-ەكونوميكالىق دامۋىنا وڭ اسەر ەتەتىنىن ايتقان ءماجىلىس دەپۋتاتىنىڭ سوزىنشە, پرەزيدەنتتىڭ تاپسىرماسىنا سايكەس وڭىرلەردى دامىتۋعا باعىتتالعان بىرقاتار مەملەكەتتىك ستراتەگيالىق قۇجاتتاردا شەكارالىق اۋماقتارعا قولداۋ كورسەتۋ شارالارى قامتىلعان.
«دەگەنمەن, وسى قۇجاتتاردا قاراستىرىلعان شەكارالىق ەلدى مەكەندەرگە بەرىلۋى ءتيىس جەڭىلدىكتەر ءالى دە ءىس جۇزىنە اسپادى. بۇل شەكارالىق اۋداندارعا قاتىستى كوزدەلگەن مەملەكەتتىك قولداۋ تەتىكتەرىنىڭ ءتۇرلى نورماتيۆتىك اكتىلەردە شاشىراپ كەتۋىنە, ولاردى ۇيلەستىرەتىن جاۋاپتى ۋاكىلەتتى ورگاننىڭ بەكىتىلمەۋىنە, مەملەكەتتىك سۋبسيديالاردى ءبولۋ بويىنشا جانە ۇلتتىق جوبالاردى ىسكە اسىرۋ تۇرعىسىندا بەلگىلى ءبىر ساناتتارعا ناقتى باسىمدىقتاردىڭ بەلگىلەنبەۋىنە بايلانىستى بولىپ وتىر», دەدى ەرلان سايروۆ.
دەپۋتاتتىڭ ايتۋىنشا, سونىڭ سالدارىنان شەكارالىق اۋداندارداعى بىرقاتار ەلدى مەكەندەردەن تۇرعىنداردىڭ جاپپاي كوشۋى تولاستاماي تۇر. بۇل ءوز كەزەگىندە شەكارا ماڭىنداعى اۋماقتاردىڭ بوس قالىپ, ۇلتتىق, اۋماقتىق قاۋىپسىزدىكتىڭ السىرەۋىنە الىپ كەلىپ جاتىر.
«بوس جاتقان جەر جاۋ شاقىرادى» دەگەن. سوندىقتان بۇل ماڭىزدى ماسەلەگە ءجىتى نازار اۋدارىپ, ونى ءتيىمدى شەشۋ جولدارىن شۇعىل قاراستىرعانىمىز ءجون.
ماسەلەن, اۋماعى ۇلكەن جانە حالقى از ەلدەردىڭ (كانادا, نورۆەگيا جانە اۆستراليا) تاجىريبەسى شالعايداعى جانە شەكارا ماڭىنداعى اۋماقتاردى دامىتۋ ءۇشىن جەرگىلىكتى تۇرعىندارعا ءتۇرلى جەڭىلدىكتەر بەرۋ ءتيىمدى (سالىقتىق, الەۋمەتتىك, نەسيەلىك, ەنەرگەتيكالىق جانە ت.ب.) ەكەنىن كورسەتەدى», دەدى دەپۋتات.
ماجىلىسمەن ەرلان سايروۆتىڭ ايتۋىنشا اتالعان ارنايى زاڭ قابىلدانسا, ەل اۋماعىن ءتيىمدى پايدالانۋعا, شەكارالىق اۋدانداردى مەملەكەتتىك قولداۋ شارالارىن ءبىر جۇيەگە تۇسىرۋگە, حالىقتىڭ شەكارالىق اۋماقتاردا تۇراقتانۋىنا, ءوڭىردىڭ دامۋىنا جانە اۋماقتىق قاۋىپسىزدىگىمىزدى قامتاماسىز ەتۋگە زور سەرپىن بەرەدى. وسى رەتتە, «AMANAT» پارتياسى جۋىردا مەملەكەت باسشىسىنىڭ تاپسىرماسىنا سايكەس اتالعان زاڭ جوباسىن دايىنداپ, ۇسىنادى.
