باعدارلامانىڭ العاشقى شىعارىلىمىندا ەكى جەتەكشى جوعارى وقۋ ورنى – نارحوز ۋنيۆەرسيتەتى مەن ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ ستۋدەنتتەرىنەن قۇرالعان قوس كوماندا ءوزارا پىكىر تالاستىردى.
جوبا ەلىمىزدەگى 100-دەن استام جوعارى وقۋ ورنىنىڭ ىشىنەن ىرىكتەلگەن 32 ۋنيۆەرسيتەت كومانداسى اراسىندا وتەدى. تۋرنير وليمپيادالىق جۇيە بويىنشا ۇيىمداستىرىلىپ, جەڭگەن كوماندا كەلەسى كەزەڭ – 1/8 فينالعا وتەدى. دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ, «كوكپار» فەدەراتسياسىنىڭ پرەزيدەنتى, ءماجىلىس دەپۋتاتى ايداربەك قوجانازاروۆ, ۇلتتىق جانە ات سپورت تۇرلەرى ورتالىعى ديرەكتورىنىڭ مىندەتىن اتقارۋشى قارلىعاش رامازانوۆا, ءداستۇرلى ساداق اتۋدان كوشپەندىلەر ويىنىنىڭ جەڭىمپازى باقبەرگەن ءسالىموۆ, Qazaq Debate قوزعالىسىنىڭ نەگىزىن قالاۋشى ەربولات مۇحامەدجان باستاعان ازاماتتار قازىلىق ەتتى.
پىكىرسايىس بارىسىندا نارحوز ۋنيۆەرسيتەتىنىڭ وكىلدەرى ۇلتتىق سپورتتى دامىتۋداعى ناقتى جەتىستىكتەرگە توقتالدى: 2023 جىلى ەلىمىزدە 113 جاڭا سپورت نىسانى سالىنعانىن, سونداي-اق 26 نىساننىڭ جاڭعىرتىلعانىن اتاپ ءوتتى. سونىمەن قاتار, ۇلتتىق سپورت ۋنيۆەرسيتەتىنىڭ قۇرىلىسى دا كوتەرىلدى. ولار ۇلتتىق سپورتتى حالىقارالىق دەڭگەيگە شىعارۋ ءۇشىن ورتاق ەرەجە مەن جۇيە قاجەت ەكەنىن باسا ايتتى.
قارسى تاراپ ۇلتتىق سپورت پەن ۇلتتىق ويىنداردىڭ اراجىگىن ناقتى اجىراتىپ, سپورتتى بۇقارالىق سيپاتقا اينالدىرۋ قاجەتتىگىن العا تارتتى. ولار ورتالىق ازيادا جۇرگىزىلگەن ساۋالناما ناتيجەسىنە سۇيەنىپ, رەسپوندەنتتەردىڭ 30%-ى فۋتبولدى كورەتىنىن, ال نەبارى 3,8%-ى عانا ۇلتتىق سپورتتى تاڭداعانىن مىسال ەتتى.
قازىلار شەشىمىمەن جەڭىسكە جەتكەن نارحوز ستۋدەنتتەرى ۇلتتىق سپورت تەك تاريحي مۇرا ەمەس, بولاشاقتىڭ ماڭىزدى بولىگى ەكەنىن دالەلدەپ شىقتى. ولار ونىڭ ەرەجەلەرىن زامان تالابىنا ساي, تۇسىنىكتى ءارى تارتىمدى ەتۋ قاجەت ەكەنىن جەتكىزدى.
اتالعان جوبانى جۇزەگە اسىرۋعا قر پارلامەنتى ءماجىلىسى, مادەنيەت جانە اقپارات مينيسترلىگى, سونداي-اق عىلىم جانە جوعارى ءبىلىم مينيسترلىگى قولداۋ ءبىلدىردى.
