سۋرەت: kisi.kz
اتالعان الاڭدا جەتەكشى ساراپشىلار, ساياساتتانۋشىلار, عىلىمي قاۋىمداستىق جانە قوعامدىق ۇيىمداردىڭ وكىلدەرى ساياسي جاڭعىرۋدىڭ نەگىزگى جەتىستىكتەرىن, كەيىنگى ءۇش جىلدا ەلىمىزدەگى ساياسي, ەكونوميكالىق جانە الەۋمەتتىك رەفورمالار سالاسىندا جۇرگىزىلىپ جاتقان جۇيەلى جۇمىستاردى تالقىلادى. ساراپشىلار قىسقا مەرزىم ىشىندە ەلدىڭ ساياسي قۇرىلىمىندا ەلەۋلى وزگەرىستەر بولعانىن, سونىڭ ىشىندە ساياسي جۇيەنىڭ ليبەراليزاتسياسى, پارلامەنت ءرولىنىڭ كۇشەيۋى جانە بيلىكتى ورتالىقسىزداندىرۋ ءۇردىسىن ءسوز ەتتى. سونداي-اق سوت سالاسىنىڭ رەفورمالارى دا قوزعالدى.
پرەزيدەنت جانىنداعى قسزي الماتى قالاسىنداعى وكىلدىگىنىڭ باسشىسى اسەل نازاربەتوۆا ەلدە قىسقا مەرزىم ىشىندە بىرقاتار ساياسي رەفورما جۇزەگە اسىرىلعانىن ايتتى.
«ەكونوميكانى جاڭعىرتۋ جانە قوعامدىق ەتيكانى جاڭارتۋ جونىندە اۋقىمدى جۇمىس اتقارىلدى. ماڭىزدى رەفورمالاردىڭ ءبىرى 2022 جىلى قازاقستان كونستيتۋتسياسىنا وزگەرىستەر ەنگىزۋ بولدى. بۇل ەلدىڭ ساياسي قۇرىلىمىندا ەلەۋلى وزگەرىس اكەلدى. قابىلدانعان رەفورمالار شەڭبەرىندە پارتيالىق جانە سايلاۋ جۇيەسىن ىرىقتاندىرۋ جۇمىستارى ىسكە اسىرىلدى. پرەزيدەنتتىڭ وكىلەتتىكتەرىن شەكتەۋ بويىنشا شارالار قابىلداندى: پرەزيدەنت پارتيا مۇشەسى بولۋ جانە وبلىس اكىمدەرىن تاعايىنداۋ قۇقىنان ايىرىلدى, مەملەكەت باسشىسىن قايتا سايلاۋعا تىيىم سالىندى», دەيدى ءا.نازاربەتوۆا.
ونىڭ ايتۋىنشا, 2022 جىلعى رەفەرەندۋم ناتيجەسىندە باستالعان اۋقىمدى ساياسي جانە ەكونوميكالىق رەفورمالاردان كەيىن قازاقستان دەموكراتيا ينستيتۋتتارىن نىعايتۋ, قوعامدىق ديالوگتى كەڭەيتۋ جانە مەملەكەتتىك ساياساتتى جەتىلدىرۋ باعىتىن جالعاستىرىپ كەلەدى.
«ۇلتتىق قۇرىلتاي بيلىك, ازاماتتىق قوعام جانە ساراپشىلار قوعامداستىعىنىڭ وكىلدەرى وزەكتى سىن-قاتەرلەر بويىنشا بىرلەسكەن شەشىمدەر ازىرلەيتىن الاڭعا, ۇلتتىق ماسەلەلەر مەن ەلدىڭ ستراتەگيالىق دامۋىن تالقىلاۋدىڭ ماڭىزدى تەتىگىنە اينالدى. بۋرابايدا وتكەن قۇرىلتايدىڭ كەزەكتى وتىرىسى بۇل ۇدەرىستەگى ماڭىزدى كەزەڭ بولىپ, جۇيەنى ودان ءارى رەفورمالاۋ مەن جاڭعىرتۋ ءۇشىن جاڭا باعدارلاردى ايقىنداپ بەردى», دەدى ءا.نازاربەتوۆا.
ماڭىزدى تاقىرىپتاردى تالقىلاۋعا قاتىسقان الماتى ازاماتتىق اليانسىنىڭ توراعاسى قايىرجان ابدىحالىقوۆ الەم ۇكىمەتتەر مەن حالىقتار اراسىنداعى بايلانىستى نىعايتۋ, بيلىكتىڭ اشىقتىعىن قامتاماسىز ەتۋ جانە ۇلتتىق كونسەنسۋستىڭ قالىپتاسۋىنا ىقپال ەتۋ ءۇشىن ۇلتتىق جينالىستار مەن اسسامبلەيالاردىڭ الۋان ءتۇرلى نىسانىن قالىپتاستىرا باستاعانىن ايتتى. مەملەكەت پەن قوعام اراسىنداعى وسىنداي پارمەندى ءارى زاماناۋي كوممۋنيكاتسيا ارناسى رەتىندە ەلىمىزدەگى ۇلتتىق قۇرىلتايدى ەرەكشە اتاپ ءوتتى.
«حالىق ۇنىنە قۇلاق اساتىن مەملەكەت» تۇجىرىمداماسىنا پرەزيدەنت 2019 جىلى باستاماشى بولعانىن ءبارىمىز بىلەمىز. ونى جۇزەگە اسىرۋدىڭ بەس جىلىندا وتە جاقسى ناتيجەلەر بايقالدى. 2024 جىلعا قاراي «قوعامدىق باقىلاۋ تۋرالى» زاڭ كۇشىنە ەنگەنىن ايتقىم كەلەدى, ەندى ازاماتتاردىڭ سۇراقتار قويۋعا, بيۋدجەت قاراجاتىنىڭ جۇمسالۋىن تەكسەرۋگە قۇقى بار. بۇرىن بۇل قوعامدىق كەڭەستەردىڭ نەمەسە دەپۋتاتتاردىڭ عانا قۇزىرەتى بولسا, ەندى كەز كەلگەن ازامات مۇنى جاساي الادى. بۇل دا – مەملەكەت باسشىسىنىڭ ازاماتتىق قوعامدى قولداعان باستاماسى», دەدى ق.ابدىحالىقوۆ.
ساراپشىنىڭ ايتۋىنشا, ازاماتتىق قوعامدى تۇراقتى دامىتۋ ءۇشىن مەملەكەتتىك ورگاندارمەن ءوزارا ءىس-قيمىل بولۋى كەرەك ەكەنىن ءتۇسىنۋ وتە ماڭىزدى. ال مەملەكەتتىك ورگاندار دا ءبىر ورىندا تۇرماي, رەفورمالانۋعا ءتيىس.
جالپى, ۇلتتىق ساراپتاما الاڭىنىڭ كەزەكتى وتىرىسىندا رەفورمانىڭ تيىمدىلىگى, الداعى دامۋ جولدارى, ۇلتتىق قۇرىلتايدا ۇسىنىلعان ىشكى ساياسات تۇجىرىمداماسى, كوممەرتسيالىق ەمەس ۇيىمدارعا (ۇەۇ) قاتىستى زاڭنامالىق وزگەرىستەر, شاعىن جانە ورتا بيزنەستى قولداۋ مەن مەملەكەتتىڭ جالپى بولاشاقتاعى دامۋى تالقىلاندى.
الماتى
