سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
– ۇلىستىڭ ۇلى كۇنى – ۇلتىمىزدىڭ ۇلىق مەيرامى. بۇل – ءبىزدىڭ اتا ءداستۇرىمىز. شۋاقتى كوكتەم مەرەكەسىندە بۇكىل دۇنيە قايتا جاڭعىرادى. كۇن مەن ءتۇن تەڭەلەدى. قازاق ەلى ءاز-ناۋرىزدى كونە زاماننان بەرى تويلاپ كەلەدى. ناۋرىز – ەڭ الدىمەن, يگىلىكتى ىستەردىڭ مەرەكەسى. وسى كۇندەرى ءار ۇيدە اق داستارقان جايىلادى. ەل-جۇرت ءبىر-بىرىمەن قاۋىشىپ, اق تىلەگىن ايتادى. مۇقتاج جاندارعا قايىرىمدىلىق جاساپ, قامقورلىق كورسەتەدى. ۇلىستىڭ ۇلى كۇنى بيىل دا قاسيەتتى ورازا ايىمەن تۇسپا-تۇس كەلىپ وتىر. ەلىمىز ءۇشىن مۇنىڭ ءمان-ماڭىزى زور. سەبەبى ءبىزدىڭ ءدىنىمىز بەن ءداستۇرىمىز – ەگىز. قوس قازىنامىز حالقىمىزدىڭ بىرەگەي بولمىسىن ايشىقتاي تۇسەدى, – دەدى قاسىم-جومارت توقاەۆ.
پرەزيدەنت ناۋرىز مەرەكەسى بىلتىردان باستاپ جاڭا تۇجىرىمداماعا سايكەس ون كۇن بويى اتالىپ وتەتىنىنە نازار اۋدارىپ, ناۋرىزنامانىڭ ءار كۇنى تاعىلىمعا تولى ەكەنىن ايتتى.
– ناۋرىز كوپتەگەن شىعىس حالىقتارىنا ورتاق مەرەكە بولعانىمەن, ەلىمىزدە ۇلىستىڭ ۇلى كۇنىن تويلاۋدىڭ ەرەكشە ءداستۇرى بار. بۇل مەيرامنىڭ ءتول مادەنيەتىمىزدەگى ورنى ايرىقشا. شەتەلدىك مەيماندار دا مەرەكە قارساڭىندا قازاقستانعا ارنايى كەلىپ, ءبىزدىڭ سالت-داستۇرىمىزبەن تانىسادى, ادەت-عۇرپىمىزدى تانىپ-بىلەدى. ءبىز وسى رۋحاني قازىنامىزدى جان-جاقتى دارىپتەۋىمىز كەرەك. ناۋرىزناما بويىنشا بۇگىن – ىنتىماق كۇنى. ەلىمىز ءۇشىن اۋىزبىرشىلىك پەن تاتۋلىقتىڭ ورنى قاشاندا ەرەكشە. بۇكىل حالقىمىز ۇلتىنا, دىنىنە قاراماستان ءبىر ەل بولىپ, ناۋرىزدى بىرگە اتاپ وتەدى. ءبىز وسىنداي بەرەكە-بىرلىگىمىزدىڭ ارقاسىندا بولاشاققا زور سەنىممەن قاراپ, تەك العا قاراي قادام باسىپ كەلەمىز. جان-جاقتى رەفورما جاساپ, مەملەكەتتىڭ ساياسي جۇيەسىن جاڭعىرتىپ جاتىرمىز. اۋقىمدى ەكونوميكالىق جوبالاردى قولعا الدىق. بايسالدى سىرتقى ساياساتىمىزدىڭ ارقاسىندا قازاقستان بۇكىل الەمگە بەدەلدى مەملەكەت رەتىندە تانىمال بولدى, – دەدى مەملەكەت باسشىسى.
سونىمەن قاتار قاسىم-جومارت توقاەۆ ناۋرىز مەيرامىنىڭ تازالىق, ەڭبەكقورلىق قۇندىلىقتارىن دارىپتەيتىن تاربيەلىك مانىنە توقتالدى.
– ۇلىستىڭ ۇلى كۇنى – تازالىق مەرەكەسى. حالقىمىز وسى كۇنى تال ەگىپ, بۇلاقتىڭ كوزىن اشقان. اينالاسىن تازالاپ, تابيعاتتى ايالاعان. بۇل ءداستۇر بۇگىن دە ءوز جالعاسىن تابۋدا. بىلتىردان بەرى ەلىمىزدە «تازا قازاقستان» اكتسياسى ءجۇرىپ جاتىر. جالپىۇلتتىق ىسكە بارشا جۇرتىمىز, اسىرەسە, جاستار بەلسەندى اتسالىسۋدا. وسىلايشا, قوعامىمىزدا جاڭا ەكولوگيالىق مادەنيەت پەن بولمىس قالىپتاسىپ كەلەدى. ناۋرىز – ناعىز ەڭبەك مەرەكەسى. كوكتەمنىڭ باسى – دالا ەڭبەگى جانداناتىن كەزەڭ. قازىر اۋىل شارۋاشىلىعىندا قارقىندى جۇمىس باستالدى. ءبىز وسى جىلدى «جۇمىسشى ماماندىقتارى جىلى» دەپ جاريالادىق. باستى ماقساتىمىز – ەڭبەك ادامىنىڭ بەدەلىن ارتتىرۋ. ويتكەنى ەڭبەكقورلىق – وزىق ويلى ۇلتقا ءتان قاسيەت, – دەدى مەملەكەت باسشىسى.
پرەزيدەنت بۇكىل الەمنىڭ الماعايىپ جاعدايدا ءومىر ءسۇرىپ جاتقان شاعىندا قوعامنىڭ تۇراقتىلىعىن نىعايتۋ ساياساتىمىزدىڭ باستى باعىتى بولىپ قالا بەرەتىنىن ايتتى.
– بيىل كونستيتۋتسيامىزعا جانە قازاقستان حالقى اسسامبلەياسىنا 30 جىل تولادى. سونداي-اق ۇلى جەڭىستىڭ 80 جىلدىعىن اتاپ وتەمىز. كوپ ۇزاماي قاستەرلى تاۋەلسىزدىگىمىزدىڭ 40 جىلدىق مەرەيلى بەلەسىنە جەتەمىز. قازاقستان وسى ۋاقىتتا وزىق, وركەنيەتتى, قۋاتتى مەملەكەت بولۋى كەرەك. مەن ۇلتتىق قۇرىلتايدىڭ بۋرابايداعى جيىنىندا وسى ماسەلەگە ارنايى توقتالدىم. ءبىز ەلىمىزدى جاڭا جاھاندىق جاعدايعا بەيىمدەۋىمىز قاجەت. مەملەكەتىمىزدىڭ باعدارى دا, باسىمدىعى دا ايقىن. تسيفرلاندىرۋ ءىسى مەن جاساندى ينتەللەكت, ءىرى ينفراقۇرىلىمدىق جوبالار, كولىك تاسىمالى جانە ەنەرگەتيكا, اگروونەركاسىپ كەشەنى, سونداي-اق ادام كاپيتالى – وسىنىڭ ءبارى ەلىمىزدىڭ نەگىزگى دامۋ باعىتتارى. قازاقستان وسى سالالار بويىنشا الەمدىك باسەكەگە قابىلەتتى ەل بولماق. بۇعان ءبىزدىڭ مۇمكىندىگىمىز تولىق جەتەدى. ءبىز «زاڭ مەن ءتارتىپ» قاعيداسى بەرىك ورنىققان, ادىلەتتى, قاۋىپسىز, تازا, مادەنيەتتى جانە دامىعان قازاقستاندى مىندەتتى تۇردە بىرگە قۇرامىز! قازاقستاننان باسقا ەلىمىز جوق. سوندىقتان ءبارىمىز ءبىر قوعام بولىپ مەملەكەتىمىزدى نىعايتايىق, دامىتايىق, كوركەيتەيىك! – دەدى قاسىم-جومارت توقاەۆ.
بۇدان كەيىن مەملەكەت باسشىسى جۇرتشىلىقپەن بىرگە مەرەكەلىك كونتسەرتتى تاماشالادى.
سونىمەن قاتار قاسىم-جومارت توقاەۆ ەتنواۋىلداعى قولونەر جارمەڭكەسىن ارالاپ كوردى. بيىل كورمەگە وتاندىق قولونەرشىلەرمەن قاتار قىتاي, رەسەي, ازەربايجان, قىرعىزستان, وزبەكستان, تۇرىكمەنستان, تۇركيا, يران, تاجىكستان ەلدەرىنەن شەبەرلەر شاقىرىلعان.
بۇعان قوسا پرەزيدەنتكە ۇلتتىق ويىندار, وتاندىق ديزاينەرلەر مەن تانىمال برەندتەردىڭ ۇلتتىق كيىم ۇلگىلەرى تانىستىرىلدى.
