كومەسكىلەنە باستاعان مەرەكەلىك ءداستۇردى وسىدان سەگىز جىل بۇرىن ءبىر توپ ونەرپاز قايتا ءتىرىلتىپ, سودان بەرى ۇزبەي ناسيحاتتاپ كەلەدى. جاراپازانشى جىگىتتەردىڭ اراسىندا كەيىنگى كەزدەرى جاس بالالار دا بوي كورسەتىپ ءجۇر. سونىڭ ءبىرى – قوستاناي قالاسىنداعى توعىزىنشى مەكتەپتىڭ 6-سىنىپ وقۋشىسى – جاناسىل اسىلان ۇلى.
جاناسىلدى مەكتەبىنە ىزدەپ بارىپ, مۋزىكا ءپانىنىڭ مۇعالىمى ەركەبۇلان بالەسوۆ ناۋرىز تويىنا جوسپارلانعان مەرەكەلىك كونتسەرتكە دايىنداپ جاتقان ءبىر توپ بالانىڭ ورتاسىنان تاپتىق.
«جاناسىل – بەتكەۇستار وقۋشىمىزدىڭ ءبىرى, مەكتەبىمىزدىڭ ماقتانىشى, وقۋ وزاتى. دومبىرا تارتىپ, ءان ايتادى. مەكتەپتەن تىس, مۋزىكا مەكتەبىنىڭ دومبىرا بولىمىندە وقىپ ءجۇر. وسى جەردە ءوتىپ جاتاتىن ءتۇرلى مادەني ءىس-شارالارعا بەلسەندى اتسالىسادى. كوپ شارۋانى ءوزى جۇگىرىپ ءجۇرىپ ۇيىمداستىرىپ, تياناقتى اتقارىپ شىعادى. ۇلىستىڭ ۇلى كۇنىنە جاراپازان كورىنىسىن دايىنداپ جاتىرمىز. بيىل قاسيەتتى رامازان ايى مەن ناۋرىز ايى تۇسپا-تۇس كەلگەندىكتەن, مەرەكە كۇنى 20 مۇعالىم, 30 وقۋشى مەكتەپكە جاراپازان ايتىپ كىرىپ, سىنىپتار مەن جۇمىس كابينەتتەرىن ارالاپ بۇكىل ۇجىمدا قۇتتىقتاپ شىعادى», دەيدى ەركەبۇلان بالەسوۆ.
جاناسىل جاراپازان ايتۋعا العاش اكەسىمەن بىرگە شىعىپتى. سول كەزدە العاش ەستىپ, كەيىن ۇيدە اتاسى باقىتبەك قاجىنىڭ ايتۋىمەن جاتتاپ العان.
«بيىل اكەمە ىلەسىپ تاعى شىقتىم. كورىسۋ كۇنى التىنسارين مەموريالدىق مۋزەيىنىڭ فويەسىندەگى مەرەكەلىك كەشتە, «مارت» ساۋدا ۇيىندە, ورتالىق ساياباقتا جاراپازان ايتتىق. جاراپازاننىڭ اۋەنى ايتۋشىنىڭ كوڭىلىن كوتەرەدى, تىڭداۋشىنى قۋانتادى. ادەتتە, ءبىز بارعان جەرلەر مەرەكە-دۋمانعا اينالىپ كەتەدى. ءتىپتى اسىعىپ كەتىپ بارا جاتقان ادامداردىڭ ءوزى ءبىر ءسات توقتاپ, ۇيالى تەلەفونىن الىپ ۆيدەوعا, سۋرەتكە ءتۇسىرىپ الادى. اتامنىڭ ايتۋىنشا, جاراپازان ء«جا, رامادان» دەگەن ارابتىڭ سوزىنەن شىعادى. قاسيەتتى رامازان ايى كەلدى دەپ سۇيىنشىلەۋ, جاريالاۋ, جار سالۋ ماعىناسىندا ايتىلعان. اتا-بابالارىمىز ءدىن مەن ءداستۇردى ءبولىپ جارماعان. سوندىقتان بۇل جىر ورازا ايىمەن تۇسپا-تۇس كەلگەن ناۋرىز مەرەكەلەرىندە دە ايتىلىپ, جۇرتقا جىل باسى كەلدى دەپ جار سالىپ, جاقسىلىقتى, قايىرىمدىلىقتى, بىرلىك-تاتۋلىقتى دارىپتەگەن. نەگىزى, جاراپازان قۇراندا, شاريعاتتا جازىلماعان, بۇل – قازاقتىڭ كونە سالت-داستۇرلەرىنىڭ ءبىرى. كەزىندە بالالار ءۇي-ءۇيدى ارالاپ ءجۇرىپ جاراپازان ايتقان, ءۇي يەسى بالالارعا باتاسىن بەرىپ, ءسۇيىنشىسىن ۇستاتىپ, دورباسىن تولتىرىپ جىبەرگەن. قازىر سىنىپتاستارىم سايات, ەراسىل, مەيىر دە مەنىمەن بىرگە جاراپازان ايتىپ ءجۇر», دەيدى جاناسىل.
وسىدان سەگىز جىل بۇرىن قوستانايدا العاش جاراپازان ايتىپ شىققان ونەرپازدىڭ ءبىرى زاڭعار سانايدىڭ ايتۋىنشا دا جاراپازاندى, نەگىزى, بالالار ايتادى.
«العاشقى جىلى قىدىربەك قيىسحان باستاعان ءۇش-ءتورت ادام شىعىپ كوكبازار, «سكلادسكوي» ساۋدا الاڭىنا دەيىن جاياۋ ارالاپ ءجۇرىپ, رامازان ايىن سۇيىنشىلەگەنبىز. كەيىن قاتارىمىز كوبەيدى. بۇل باستاما, نەگىزى, اۋىز بەكىتۋدى ازاپ كورەتىندەر ءبىزدى كورسىن, مۇسىلماندىق پارىزدىڭ اسا قيىندىعى جوق ەكەنىن ءبىلسىن دەگەن نيەتتەن تۋعان. قازىر قاتارىمىزعا جاس بالالار قوسىلىپ جاتىر. باقىتبەك قاجى اعامىزدىڭ نەمەرەسى جاناسىل جانىمىزدان قالمايدى. كەيىنگى ەكى-ءۇش جىل ىشىندە ءبىراز اقساقال, اجەلەر دە ءبىزدى قولداپ بىرگە شىعىپ ءجۇر. باستى ماقسات – ۇمىتىلىپ بارا جاتقان ءداستۇردى قايتا جاڭعىرتىپ, اتالارىمىز ايتىپ كەتكەن تۇرمىس-سالت جىرىن كەيىنگى جاستارعا ۇيرەتىپ, ايتقىزىپ, ادەتكە اينالدىرۋ. ادەتكە اينالعان دۇنيە ەشقاشان ۇمىتىلمايدى», دەيدى زاڭعار ساناي.
قوستاناي وبلىسى
