فوتولار: اباي ۋنيۆەرسيتەتىنىڭ ءباسپاسوز قىزمەتى
مەرەكەلىك ءىس-شاراعا بەلگىلى قوعام قايراتكەرلەرى, قۇرمەتتى قوناقتار, باق وكىلدەرى, اباي ۋنيۆەرسيتەتىنىڭ ارداگەر ۇستازدارى, پروفەسسورلىق-وقىتۋشىلار قۇرامى مەن ۋنيۆەرسيتەت قىزمەتكەرلەرى جانە ستۋدەنتتەر قاتىستى.
شارانىڭ العى سوزىندە اباي اتىنداعى قازۇپۋ باسقارما توراعاسى - رەكتور بولات تىلەپ: «تاۋەلسىز ەل بولعاندىقتان وشكەنىمىز جانىپ, ۇزىلگەنىمىز جالعاسىن تاۋىپ, جوعىمىز تۇگەندەلىپ جاتىر. ۇلتىمىزدىڭ رۋحاني قازىناسى سانالاتىن اسىل مۇرالارىمىزدى جاس ۇرپاققا ناسيحاتتاۋدىڭ دا جارقىن ۇلگىسى – وسى بىرلىگى جاراسقان بەيبىت ەلىمىزدە كورىنىس تاۋىپ وتىر. «قاراۋسىز قالعان مازاردى ءشوپ باسادى, قىناپتان سۋىرماعان قىلىشتى توت باسادى», دەگەن اتالى ءسوز بار. ولاي بولسا, ناۋرىز سياقتى سالت-ءداستۇرىمىزدىڭ مارتەبەسىن ۇستەم ەتۋ – بارشامىزدىڭ ورتاق پارىزىمىز دەپ بىلەمىن. سامارقاننىڭ كوك تاسى ەرىگەن كوكتەمنىڭ وسى ءبىر كۇنىندە سىزدەرگە دۇنيەنىڭ بار جاقسىلىعىن, ىرىسى مەن ىنتىماعىن تىلەيمىن», دەپ ۋنيۆەرسيتەت ۇجىمىن ناۋرىز مەرەكەسىمەن قۇتتىقتادى.
مەرەكەلىك جيىن بارىسىندا ۋنيۆەرسيتەت فاكۋلتەتتەرى قازاق حالقىنىڭ كونەدەن كەلە جاتقان تۇرمىس-سالتى مەن داستۇرلەرىن كورسەتۋ بويىنشا ءوزارا سايىسقا ءتۇسىپ, «دۋماندى ناۋرىز», «بەرەكەلى داستارقان», «كورىكتى ۇلتتىق كيىم», «ونەرلى ورتا», ء«داستۇر جاڭعىرۋى», «كرەاتيۆتى ناۋرىز», «ۇلتتىق سپورت ويىنى», «ناۋرىزدىڭ قازاق ءۇيى» نوميناتسيالارى بويىنشا باق سىنادى.
سونىمەن قاتار ءىس-شارا اياسىندا قولونەر شەبەرلەرى مەن سۋرەشىلەر زەرگەرلىك بۇيىم جاساۋ, ۇلتتىق ناقىشتاعى كورمە سىندى ءداستۇردىڭ ۇزدىك ۇلگىلەرىن ۇسىندى.
سونداي-اق, ايتىس ۇيىمداستىرىلىپ, جاراپازان ايتىلدى. حالىق اندەرى شىرقالىپ, قازاق ءبيىنىڭ ءتۇرلى جانرلارى ورىندالدى, كۇمبىرلەگەن كۇي شەرتىلىپ, ءتول ونەر كەڭىنەن دارىپتەلدى. ۇلتتىق كيىمدەگى ونەرپازدار ساحنانىڭ اجارىن اشىپ, حالىقتىڭ ەستەتيكالىق تالعامىن ايشىقتادى.
كەش بارىسىندا بەلگىلى ءانشى قۇدايبەرگەن بەكىش جينالعان قاۋىمعا اننەن شاشۋ شاشتى.
