فوتو: primeminister.kz
مەديتسينا مەكەمەسىندە 148 ورىندىق ستاتسيونار جانە كلينيكا ناۋقاستارىنا ارنالعان 24 ورىندىق قوناق ءۇي سىندى ەكى كورپۋس قاراستىرىلعان.
باس عيماراتتا زاماناۋي مەديتسينالىق قۇرال-جابدىقتارمەن قامتىلعان زەرتحانالار, ساۋلەلىك دياگنوستيكا, كارديولوگيا, كارديوحيرۋرگيا, گەماتولوگيا, سۇيەك كەمىگىن ترانسپلانتاتسيالاۋ جانە كۇردەلى سوماتيكا بولىمشەلەرى ورنالاستىرىلادى. جاڭا ورتالىق ناۋقاستاردى ەمدەۋ مەن وڭالتۋدىڭ وزىق ادىستەرىن پايدالانۋعا مۇمكىندىك بەرەدى.
جوبانىڭ جالپى قۇنى – 71,3 ملرد تەڭگە. بۇگىندە نىساننىڭ 78%-ى اياقتالعان. عيماراتتىڭ قاڭقاسى تۇرعىزىلىپ, سىرتقى ينجەنەرلىك جەلىلەر تارتىلعان. سونداي-اق, شاتىر, قاسبەتى, تەرەزە بلوكتارى دايىندالىپ, ىشكى ارلەۋ جۇمىستارى ءىشىنارا اياقتالعان.
ۇكىمەت دەنساۋلىق ساقتاۋ جۇيەسىندەگى ينفراقۇرىلىمدى دامىتۋعا ەرەكشە كوڭىل ءبولىپ كەلەدى. 2024 جىلدىڭ قورىتىندىسى بويىنشا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 361 العاشقى مەديتسينالىق-سانيتاريالىق كومەك كورسەتۋ نىسانىنىڭ قۇرىلىسى اياقتالدى. بۇل ءوز كەزەگىندە شالعاي جانە اۋىلدىق ەلدى مەكەندەر تۇرعىندارىنا مەديتسينالىق قىزمەت كورسەتۋدىڭ قولجەتىمدىلىگىن ارتتىرۋعا مۇمكىندىك بەردى.
بۇگىندە ۇكىمەت الەۋمەتتىك ماڭىزى بار نىساندار قۇرىلىسىنا ارناۋلى مەملەكەتتىك قوردان قاراجات ءبولدى. ولاردىڭ قاتارىندا 7 مەكتەپ, ونىڭ ىشىندە ءبىر مۋزىكا مەكتەبى, 2 سپورت كەشەنى, ستاديون, كوپسالالى اۋرۋحانا كەشەنى, وبلىستىق جەدەل جاردەم ستانساسى, ارناۋلى الەۋمەتتىك قىزمەتتەر كورسەتۋ ورتالىعى, جاتاقحانا, 2 بالاباقشا بار. بۇدان بولەك, قاراجات قىزىلوردا وبلىسىنىڭ ارال اۋدانىنداعى سۋمەن جابدىقتاۋ جۇيەلەرىن سالۋ جانە جاڭعىرتۋعا باعىتتالعان.
