الەۋمەتتىك جوبالارعا سەرپىن بەرەدى

جاستار ساياساتى تۇجىرىمداماسى اياسىندا جاس كاسىپكەرلەر ءۇشىن جىلدىق 2,5% جەڭىلدىكپەن نەسيە بەرۋ باستاماسى ەنگىزىلگەن. اباي وبلىسىندا دا جاستاردى ەكونوميكالىق جانە قوعامدىق ومىرگە تارتۋعا باعىتتالعان بىرقاتار باعدارلاما جۇزەگە اسىرىل­دى. 2023 جىلى وبلىس جاستارى اراسىنان 226 ادام جالپى سوماسى 1 ملرد تەڭگە كولەمىندە جەڭىلدەتىلگەن ميكرو­نەسيە الدى. نەسيە العانداردىڭ باسىم بولىگى مال شارۋاشىلىعىمەن اينالىسادى (167). سونداي-اق قىزمەت كورسەتۋ (44), ساۋدا (9), جەڭىل جانە اۋىر ونەركاسىپ (5), اگروونەركاسىپتىك ونىمدەردى قايتا وڭدەۋ (1) سالالارى قامتىلعان.

وڭىردە ءبىلىم الۋمەن دە, جۇمىس­پەن دە اينالىسپايتىن جاستار (NEET ساناتى) ماسەلەسى وزەكتى بولىپ وتىر, ولاردىڭ سانى شامامەن – 6 029 ادام. بۇل ماسەلەنى شەشۋ ءۇشىن جاستاردى الەۋمەتتىك جانە ەكونوميكالىق بەلسەندىلىككە تارتۋ تەتىكتەرى ەنگىزىلىپ جاتىر. «Zhas project» اياسىندا 8 جاس 1 ملن تەڭگەدەن گرانت الىپ, باستامالارىن جۇزەگە اسىرۋعا كىرىستى. جازعى ماۋسىمدا 1 004 ازامات «جاسىل ەل» باعدارلاماسىنا قاتىسىپ, ۋاقىتشا جۇمىسپەن قامتىلدى.

ۇلتتىق قۇرىلتاي جۇمىسى بارىسىندا بيزنەستىڭ قوعامدىق جاۋاپكەرشىلىگىنە ەرەكشە ءمان بەرىلدى. كاسىپكەرلەرگە مەكتەپ, اۋرۋ­حانا, كىتاپحانا, سپورت نىسانى جانە باسقا دا ينفراقۇرىلىمدىق جوبالارعا ينۆەستيتسيا سالۋعا ۇندەۋ جاسالدى. مۇنداي يگى باستامانى قولدايتىن بيزنەس وكىلدەرى جوق ەمەس. مىسالى, سەمەي قالاسىندا جەكە ينۆەستور زاماناۋي جابىق اكۆاپارك جوباسىن ازىرلەپ جاتىر. «KAZ Minerals» كومپانيا­سى وبلىس ورتالىعىندا جالپى قۇنى 9 ملرد تەڭگەدەن اساتىن 1 200 ورىنعا لايىقتالعان جاڭا IT-مەكتەپ-ليتسەيىن سالىپ, ءبىلىم سالاسىنا ايتارلىقتاي ۇلەس قوستى. بۇل باس­تامالار وزگە دە كاسىپكەرلەرگە ۇلگى بولىپ, ولاردىڭ الەۋمەتتىك جوبا­لارعا اتسالىسۋىنا سەرپىن بەرەدى دەپ سەنەمىز.

ۇلتتىق قۇرىلتاي – تەك پىكىرتالاس الاڭى ەمەس, ناقتى شەشىمدەر قابىلداۋ تەتىگى. قۇرىلتاي مۇشەلەرى ماسەلەلەردى كوتەرىپ قانا قويماي, شەشىمدەر ۇسىنىپ, ىسكە اسىرۋعا ىقپال ەتەدى. بىرلەسكەن كۇش-جىگەردىڭ ارقاسىندا ناقتى ناتيجەلەرگە قول جەتكىزۋگە بولادى.

بەرىك قادىروۆ,

پرەزيدەنت جانىنداعى قسزي اباي وبلىسى بويىنشا وكىلى