سالتاناتتى راسىمگە پاتەر يەلەرىنىڭ تۋىستارى مەن جاقىندارى قاتىسىپ, قونىستويعا ارنايى ازىرلەنگەن ناۋرىز كوجەدەن اۋىز ءتيدى.
باسپانالى بولعانداردىڭ دەنى 10-15 جىل بويى پاتەر كەزەگىندە تۇرعان. مىسالى, اتا-اناسىنان ەرتە ايىرىلعان ءجاميلا دوسمايىلوۆا باسپانا كەزەگىنە 2009 جىلى تىركەلگەن. بۇگىندە ءۇش بالا تاربيەلەپ وتىر.
«بۇعان دەيىن قوستانايدان پاتەر جالداپ كەلدىك. 15 جىل بويى كەزەكتە تۇرىپ, كوپتەن كۇتكەن قۋانىشقا بۇگىن جەتىپ وتىرمىز», دەيدى ءجاميلا.
باسپانا قۋانىشىنا يە بولعان سارا لوبا 34 جاستاعى ناۋقاس ۇلىن باعىپ وتىر. «وتباسىمدا ءوزىم عانا جۇمىس ىستەيتىندىكتەن, پاتەر جالداپ تۇرۋ قيىن. كەمتار ۇلىمدى جيىرما جاسىندا باسپانا كەزەگىنە تىركەتتىم. بۇگىن, مىنە, توبەمىز كوككە جەتكەندەي بولدىق. ءبىز كورپەسىنە قاراي كوسىلىپ, قاراپايىم تۇرمىس كەشكەن وتباسىمىز. مەملەكەتتىڭ قولداۋىن, قامقورلىعىن ءاردايىم سەزىنىپ, شۇكىرلىك ەتىپ كەلەمىز. ەڭ باستىسى, ەلىمىزدى وسىنداي بىرلىكتەن, بەيبىت كۇننەن ايىرماسىن. دۇنيە, باسپانا دەگەندەر بىرتە-بىرتە ورنىنا كەلەدى», دەيدى سارا لوبا.
قونىستوي يەلەرىن ءوڭىر باسشىسى قۇتتىقتاپ, ىزگى تىلەگىن ارنادى.
«رامازان ايى – جاقسى ويدىڭ, جاقسى تىلەكتىڭ, جاقسى ىستەردىڭ ايى. بۇگىنگى قۋانىش وسى رامازان ايىندا ناۋرىزبەن تۇسپا-تۇس كەلىپ وتىر. مەن سول قۋانىشتارىڭىزدى ارنايى بولىسۋگە كەلىپ وتىرمىن. ۇلىستىڭ ۇلى كۇنى قارساڭىندا قونىستانىپ جاتقان ۇيلەرىڭىز قۋانىشقا, ىرىس-بەرەكەگە تولسىن!», دەدى قۇمار اقساقالوۆ.
وتكەن جىلى وڭىردە بوي كوتەرگەن بەس مىڭ پاتەرلى تۇرعىن ءۇيدىڭ ىشىنەن 940 پاتەر كەزەكتە تۇرعان كوپ بالالى انالارعا, كەمتارلار مەن اتا-انا قامقورلىعىنان قاعىلعان جاندارعا بەرىلگەن. اتالعان ساناتتاعى ازاماتتارعا بيىل تاعى 1000 پاتەر بولىنەدى.
