سۋرەت: mail.kz
بۇل جوبانى ىسكە اسىرۋ ەلدىڭ ورتالىق جانە باتىس وڭىرلەرى اراسىنداعى جولدى 560 شاقىرىمعا قىسقارتۋعا مۇمكىندىك بەرەدى. سونىمەن قاتار وسىناۋ اۋقىمدى جوبا بۇكىل تورعاي ءوڭىرىنىڭ دامۋىنا ۇلكەن سەرپىن سىيلايدى. ول تۋرالى مەملەكەت باسشىسى ارنايى توقتالىپ ءوتتى.
جول ءوڭىردىڭ اۋىل شارۋاشىلىعى وندىرۋشىلەرىنە وتە ءتيىمدى بولماق. شارۋالاردىڭ استانا اگلومەراتسياسى مەن ەلدىڭ باتىس وبلىستارىنىڭ نارىعىنا قول جەتكىزۋىن قامتاماسىز ەتەدى. نەلىكتەن بۇل جوبا ەلىمىز ءۇشىن ماڭىزدى؟ ويتكەنى ءبىز سياقتى حالىق شاشىراي قونىستانعان ەلدىڭ وڭىرلەر اراسىنداعى بايلانىسىن كۇشەيتۋ وتە ماڭىزدى. ءتيىمدى جول بايلانىسى ورناعاندا عانا ساۋدا-ساتتىق جاقسارا تۇسەدى, كەرۋەن-كەرۋەن كوش اعىلادى. ايماق ارالىق تاۋار تاسىمالى ەكونوميكاعا قان جۇگىرتىپ, ازاماتتاردىڭ تابىسى ارتادى. بۇل بەر جاعى عانا. ۇلكەن تۇرعىدان العاندا حالىقارالىق كولىك دالىزىنە قاراي بەت تۇزەيتىن مارشرۋتتاردىڭ اياق الىسى جەڭىلدەپ, شەت مەملەكەتتەر ءۇشىن ءبىزدىڭ ترانزيتتىك مۇمكىندىگىمىز ارتا تۇسەدى. ينۆەستيتسيالىق تارتىمدىلىعىمىز دا ءسوزسىز, مولايادى.
دامىعان كولىك جۇيەسى – ەكونوميكالىق وسىمگە, ماكرووڭىرلەردى ءبىرتۇتاس ەكونوميكالىق جۇيەگە ينتەگراتسيالاۋعا, قاشىقتى قىسقارتۋعا جانە بيزنەستىڭ شىعىندارىن ازايتۋعا, سونداي-اق حالىقتىڭ ءومىر ءسۇرۋ ساپاسىن ارتتىرۋعا قاجەتتى جاعدايلار تۋعىزادى. سوندىقتان ەلدىڭ اۋماقتىق-كەڭىستىكتىك ساياساتىنىڭ باسىمدىقتارىنىڭ ءبىرى وڭىرلەردىڭ كولىكتىك بايلانىسىن قامتاماسىز ەتۋ بولىپ وتىر. ورتالىق ءوڭىردى باتىس ايماقپەن بايلانىستىراتىن جولدى سالۋ ورتالىق – باتىس ءدالىزىن جانە ەلدىڭ بىرىڭعاي كولىك قابىرعاسىن قالىپتاستىرۋداعى ماڭىزدى قادام بولماق.
ارينە وڭىرلەر اراسىنداعى دامىعان كولىك بايلانىسىن ورناتپاي ەلدىڭ كولىك قابىرعاسىن نىعايتۋ مۇمكىن ەمەس. استانا – ارقالىق – تورعاي – ىرعىز باعىتى بويىنشا ترانسكاسپي حالىقارالىق كولىك باعىتىنا شىعاتىن ورتالىق-باتىس ءدالىزى استانانى باتىس وڭىرلەرمەن جالعايدى. تيىسىنشە, ايتىلعان باعىتتارداعى تىرشىلىكتى الدەنەشە ەسە جانداندىرادى. بۇل ءوز كەزەگىندە ورتالىق جانە باتىس ءوڭىر اراسىنداعى جۇك اينالىمىن ۇلعايتۋعا, ولاردىڭ كووپەراتسياسىنا, اۆتوموبيل, تەڭىز جانە تەمىرجول كولىگى تاسىمالدارىن ينتەگراتسيالاۋعا جاعداي جاسايدى. بۇدان باسقا, وتاندىق وندىرۋشىلەر ءۇشىن ەلدىڭ تەڭىز پورتتارى ارقىلى جاڭا وتكىزۋ نارىقتارى قولجەتىمدى بولادى.
نۇربولات قۇرمەت ۇلى,
«ەكونوميكالىق زەرتتەۋلەر ينستيتۋتى» اق وڭىرلىك زەرتتەۋلەر جانە ءومىر ساپاسى ورتالىعىنىڭ
ديرەكتورى
