پرەزيدەنت جينالعان قاۋىمدى ءاز-ناۋرىزدىڭ باستاۋى كورىسۋ كۇنىمەن قۇتتىقتاپ, قاسيەتتى رامازان ايىندا تۇتقان ورازالارى قابىل بولۋىنا تىلەكتەستىك ءبىلدىردى. سونداي-اق كوكشە جەرىندە وتكەن ۇلتتىق قۇرىلتايدىڭ كەزەكتى وتىرىسىندا كوپتەگەن سالماقتى ۇسىنىس ايتىلىپ, قوعامدى تولعاندىرىپ جۇرگەن ماڭىزدى ماسەلەلەر كوتەرىلگەنىن اتاپ ءوتتى.
– ەلدىك ىستە كۇش بىرىكتىرۋ – ءبىرتۇتاس ۇلتقا ءتان قاسيەت. سىزدەر ءاردايىم ازاماتتىق جاۋاپكەرشىلىكتىڭ وزىق ۇلگىسىن كورسەتىپ جۇرسىزدەر. بارشاڭىزعا زور ريزاشىلىعىمدى بىلدىرەمىن. رامازان ايى – «ايلاردىڭ سۇلتانى». وسى كەزدە ازاماتتارىمىز يگى امالدار جاساۋعا تىرىسادى. مۇقتاج جاندارعا كومەكتەسەدى. يمان كەلتىرىپ, رۋحاني جاعىنان تازارادى. تۇپتەپ كەلگەندە, مۇنىڭ ءبارى جۇرتىمىزدىڭ ىنتىماعىن ارتتىرادى. بەرەكەلى بىرلىگىمىزدى بەكەمدەي تۇسەدى, – دەدى قاسىم-جومارت توقاەۆ.
مەملەكەت باسشىسى وزىق ويلى ۇلت رەتىندە تەك العا قادام باسۋعا شاقىردى.
– قازىرگى ب ۇلىڭعىر, تۇراقسىز الەمدە حالقىمىزدىڭ تۇتاستىعى اسا ماڭىزدى. سوندىقتان ءبارىمىز سانالى, سابىرلى بولايىق, اعايىن! حالىققا نەگىزگى ساياساتىمىزدى دۇرىس تۇسىندىرەيىك. جاپپاي جۇرتقا ۇلگى بولايىق. ەل ىشىندەگى دارىندى, قابىلەتتى ازاماتتارعا, ەڭ الدىمەن, جاستارعا جول بەرەيىك. ءبىز ءبىر ەل, ءبىر حالىق بولىپ, ەلەۋلى وزگەرىستەردى بىرگە جاساپ جاتىرمىز. قازاقستاننىڭ ساياسي جۇيەسىن تولىق جاڭعىرتتىق. جاڭا ەكونوميكالىق باعدارىمىزعا ساي ناقتى جوسپارىمىزدى جۇزەگە اسىراتىن بولدىق. بۇگىندە جان-جاقتى رەفورمالار ءوز جەمىسىن بەرىپ جاتىر. وسى جولدا ۇلتتىق قۇرىلتايدىڭ ەرەكشە ءرول اتقارعانى ءسوزسىز. سىزدەردىڭ باستامالارىڭىز كوپتەگەن ماسەلەنى ۋاقتىلى شەشۋگە ىقپالىن تيگىزۋدە. بۇل باعىتتاعى جۇمىس جالعاسا بەرەدى. مەن «Ana tili» گازەتىنە بەرگەن سۇحباتىمدا ەلىمىزدىڭ الدىندا تۇرعان جاڭا مىندەتتەردى اتاپ ءوتتىم. نەگىزگى ماقسات – بارشاعا بىردەي مۇمكىندىك بەرەتىن ادىلەتتى قازاقستاندى قۇرۋ. بۇل ادال ازاماتتاردىڭ قولىنان كەلەتىن ءىس. ادال ازاماتقا ءتان قاسيەتتەر يسلامنىڭ گۋمانيستىك يدەيالارىمەن تەرەڭ استاسادى, – دەپ ساباقتادى ءسوزىن پرەزيدەنت.
قاسىم-جومارت توقاەۆ اسىل ءدىنىمىز حالقىمىزدىڭ ءبىتىم-بولمىسىمەن, تانىم-تۇسىنىگىمەن بىتە قايناسىپ جاتقانىنا, اتا-بابالاردان ميراس بولعان سالت-داستۇرىمىزبەن ساباقتاس ەكەنىنە نازار اۋداردى.
– وسى قوس قۇندىلىق, ياعني ءدىن مەن ءداستۇر – ۇلتتىق بىرەگەيلىگىمىزدىڭ مىزعىماس تىرەگى. ءداستۇرلى يسلام – قاراڭعىلىقتان ادا, مەيىرىم مەن جاسامپازدىقتىڭ ءدىنى. ۇلتىمىزدىڭ اتادان بالاعا جالعاسقان نانىم-سەنىمى ادامگەرشىلىك قۇندىلىقتارعا نەگىزدەلگەن. سولاي بولىپ قالا بەرەدى. جۇرتىمىز اق پەن قارانى, جاقسى مەن جاماندى اجىراتا بىلگەنى ابزال. اسىرەسە جاستاردىڭ كوزى اشىق, كوكىرەگى وياۋ بولعانى ءجون. ولار جاسامپازدىق جولىمەن ءجۇرۋى قاجەت. اعا بۋىن وسكەلەڭ ۇرپاققا دۇرىس باعىت-باعدار بەرىپ وتىرۋى كەرەك. جاستارىمىز بارشا ادامزاتقا ورتاق قۇندىلىقتاردى بويىنا ءسىڭىرىپ وسۋگە ءتيىس. ۇلتتىق بولمىسىمىزدى ساقتاي وتىرىپ, جاڭاشىلدىققا ۇمتىلعانى ابزال. سوندا ءبىز ۇيرەنەتىن ءارى ۇيرەتەتىن ۇلت بولامىز, – دەدى پرەزيدەنت.
مەملەكەت باسشىسى يسلام تازالىقتىڭ ءدىنى ەكەنىن العا تارتىپ, وركەنيەتتى ەل بولۋ ءۇشىن تازالىق ۇعىمىن قوعامدا تەرەڭ ورنىقتىرۋ ماسەلەسىنە توقتالدى.
– بىلتىردان بەرى ەلىمىزدە «تازا قازاقستان» اكتسياسى ءجۇرىپ جاتىر. جالپىۇلتتىق جوبا جۇرتشىلىقتىڭ كەڭ قولداۋىنا يە بولدى. اسىرەسە جاستارىمىز, سونىڭ ىشىندە ەرىكتىلەر ەرەكشە بەلسەندىلىك تانىتتى. ۇلتتىق قۇرىلتاي مۇشەلەرى دە يگى ىسكە اتسالىستى. «تازا قازاقستان» جاي ناۋقان ەمەس ەكەنىن مەن بىرنەشە رەت ايتتىم. ونىڭ تۇپكى مازمۇنى كوشەنى, اۋلانى تازالاۋمەن شەكتەلمەيدى. بۇل – ۇلتتىق بولمىسىمىزعا قاتىسى بار ماسەلە, تۇتاس ەلىمىزدىڭ كەلبەتىن وزگەرتەتىن باستاما, – دەدى قاسىم-جومارت توقاەۆ.
مەملەكەت باسشىسى ءسوزىن قورىتىندىلاي كەلە, قازىرگىدەي گەوساياسي احۋال كۇردەلەنگەن الماعايىپ كەزەڭدە ىنتىماعىمىزدى نىعايتا ءتۇسۋ ماڭىزدى ەكەنىن ەسكە سالدى.
«تاتۋ ەلدە تۇراقتىلىق پەن تىنىشتىق بولادى. بىرلىگى مىقتى ەل وركەندەيدى. قاسيەتتى رامازان ايى ەلىمىز ءۇشىن جاقسىلىققا تولى, شاراپاتى مول اي بولسىن. ورازادا نيەت ەتكەن دۇعا-تىلەكتەرىڭىز قابىل بولسىن! ەلىمىز امان, جۇرتىمىز تىنىش بولسىن! – دەدى پرەزيدەنت.
