استانا. 19 ماۋسىم. قىزىلوردا وبلىسى قازالى اۋدانىندا ەلدى-مەكەندەردە سانيتارلىق تازالىقتى ساقتاۋ بارىسى جايلى جيىن ءوتتى. جيىندا اۋدان اكىمى باحىت جاقانوۆ اۋىلداردى اباتتاندىرۋ, تازالىق نورمالارىن ساقتاۋ, تۇرعىنداردى مادەنيەتتىلىككە شاقىرۋ اياسىندا بايانداما جاسادى. بۇل تۋرالى اۋدان اكىمدىگىنىڭ ءباسپاسوز قىزمەتى حابارلادى.
اۋدان اكىمى باحىت جاقانوۆ: «حالىق اراسىندا تارتىپسىزدىككە جانە ۇساق قۇقىق بۇزۋشىلىققا «مۇلدەم توزبەۋشىلىك» قاعيداتىن قالىپتاستىرۋ ارقىلى ولكەمىزدىڭ تازالىعى مەن ءتارتىبىن رەتكە كەلتىرە الامىز. ول ءۇشىن قوعام ءبىر-ءبىرىن تاربيەلەۋ قاجەت» – دەدى. سونداي-اق, جيىندا ءار كوشەگە تازالىقتى ساقتاۋعا باعىتتالعان بيلبوردتار ورناتۋ بارىسىندا قازىرگى تاڭدا كوپشىلىكتىڭ كەڭ پايدالاناتىن whatsapp جەلىسى ارقىلى ىشكى ىستەر قىزمەتكەرلەرىمەن بايلانىسۋعا جاعداي بار ەكەندىگىن حابارلاۋدى قۇزىرلى ورىندارعا تاپسىردى. مۇنىڭ ءبىر ەرەكشەلىگى ءاربىر تۇرعىن كەز كەلگەن قۇقىق بۇزۋشىلىق تۋرالى مالىمەتتى سۋرەتكە, ۆيدەوعا ءتۇسىرىپ, whatsapp جەلىسىنە جىبەرە الادى.
جيىن بارىسىندا ايتەكە بي كەنتىنىڭ اكىمىنىڭ ورىنباسارى قۋانىش سانسىزباەۆ تازالىقتى قامتاماسىز ەتۋ باعىتىندا جاسالىپ جاتقان جۇمىستار تۋرالى حابارلاما جاسادى. ونىڭ ايتۋىنشا, جىل باسىنان بەرى ۇستالعان 159 ازاماتتىڭ 70-نە ايىپپۇل سالىنعان, 37 ازاماتقا ەسكەرتۋ بەرىلگەن.
ايتا كەتەيىك, اۋدان باسشىسى بۇل جۇمىستاردى ودان ءارى كۇشەيتۋدى قاتاڭ تاپسىردى.
سونىمەن قاتار, كەنت اۋماعىنداعى سانيتارلىق تازالىق, كوركەيتۋ-كوگالداندىرۋ جۇمىستارىنا جاستاردان قۇرالعان «جاسىل ەل» ەڭبەك جاساعىنىڭ 30 مۇشەسى جۇمىلدىرىلىپ, قازىرگى تاڭدا كەنتتىڭ ورتالىق كوشەلەرىندەگى اياق سۋ ارىقتارىن تازالۋ جۇمىستارىن اتقارىلىپ جاتقانى ايتىلدى.
تالعات رايىمبەك.
دەرەك, سۋرەت: اۋدان اكىمدىگىنىڭ ءباسپاسوز قىزمەتى.
