جاستار جىل باسىنان بەرى ەل اۋماعىندا ونداعان رەيد وتكىزگەن. سونىڭ ناتيجەسىندە, 100-دەن اسا قۇقىق بۇزۋشىلىقتىڭ جولى كەسىلدى. كەشكى جانە تۇنگى ۋاقىتتا بەلسەندىلەر تۇنگى جانە كومپيۋتەرلىك كلۋبتار مەن ءتۇرلى كوڭىل كوتەرۋ ورىندارىن ارالادى. ماسەلەن, پاۆلوداردا «جاستار رۋحى» وكىلدەرى پوليتسيا قىزمەتكەرلەرىمەن بىرگە قالاداعى كومپيۋتەرلىك كلۋبتارعا رەيد جۇرگىزدى. ونىڭ بارىسىندا جاسوسپىرىمدەرگە قاتىستى ءتۇسىندىرۋ جۇمىسى جۇرگىزىلىپ, كاسىپكەرلەرگە كامەلەتكە تولماعانداردىڭ 22.00-دەن كەيىن مۇنداي نىسانداردا بولۋىنا تىيىم سالىنعانى ەسكەرتىلدى.
ال اقتوبەلىك ءجاسوسپىرىمنىڭ 18 جاستاعى اعاسىمەن بىرگە كومپيۋتەرلىك كلۋبتاردىڭ بىرىندە وتىرعانى انىقتالدى. اتا-اناسىنا اكىمشىلىك شارا قولدانىلىپ, كلۋب يەسى جاۋاپقا تارتىلدى.
استاناداعى بەلسەندىلەر پوليتسيا دەپارتامەنتىمەن بىرلەسىپ ساتۋشىلاردى سىناپ كوردى. كامەلەتكە تولماعان جىگىت جاسىرىن كامەرامەن بىرنەشە دۇكەنگە كىرىپ تەمەكى جانە الكوگولدىك ىشىمدىك ساتىپ الۋعا تىرىستى. زاڭدى بەلشەسىنەن باسىپ, قۇجات سۇراماي تاۋار ساتقاندار, ءتىپتى ۆەيپ پەن ناسىبايدى اشىق ساۋدالاعاندارى دا كەزدەسكەن. جاۋاپسىز كاسىپكەرلەرگە پروفيلاكتيكالىق جۇمىس جۇرگىزىلىپ, كەيبىرەۋى اكىمشىلىك جاۋاپكەرشىلىك ارقالادى.
وسكەمەندەگى جاستار پوليتسيا قىزمەتكەرلەرىمەن بىرگە كافە, مەيرامحانالاردى ارالادى. بىراق تەكسەرۋ بارىسىندا ەشقانداي زاڭ بۇزۋشىلىق تىركەلگەن جوق. ۇيىمداستىرۋشىلاردىڭ ايتۋىنشا, قوعامدىق تاماقتانۋ ورىندارىنىڭ باسشىلارى ءوز بەدەلىن جوعارى باعالايتىندىقتان, كۇماندى جاعدايدا كەلۋشىلەردى ابدەن تەكسەرەتىن كورىنەدى.
– ناۋقان ەڭ الدىمەن, بالالاردىڭ قاۋىپسىزدىگىن, ولاردىڭ قاۋىپسىز ورتادا ءوسۋىن قامتاماسىز ەتۋدى كوزدەيدى. «جاستار رۋحى» جالپى الەۋمەتتىك ماسەلەلەردى شەشۋدە ەشقاشان تىس قالعان ەمەس. اكتسيا بارىسىندا ازاماتتاردىڭ قاۋىپسىزدىگى ءۇشىن قالا اۋماعىنداعى اشىق جاتقان ليۋكتەرگە, اۋلالاردىڭ جارىقتاندىرىلۋى, ءۇي جاعدايىندا گاز بالوندارىنىڭ دۇرىس ورنالاسۋى, كامەلەت جاسقا تولماعان بالالاردىڭ تۇنگى ۋاقىتتا ويىن-ساۋىق مەكەمەلەرىندە بولۋىنا رەيد جۇمىستارى جۇرگىزىلىپ جاتىر. وڭىرلەردە ورىن العان كەلەڭسىز وقيعالاردى ەسكەرە وتىرىپ, مۇنداي اكتسيالار سول جاعدايلاردىڭ سانىن ازايتىپ, وڭ ناتيجە كورسەتۋىنە ىقپال ەتەدى دەگەن ويدامىز. قوعام مەن مەملەكەتتىڭ بىرلەسكەن كۇشىمەن عانا جاستاردى قاۋىپتى جاعدايلاردان قورعاپ, قۇقىقتىق مادەنيەتى جوعارى قوعام قۇرا الامىز. مونيتورينگ ناتيجەسى بويىنشا ارنايى ۇسىنىم حاتتار دايىندالىپ, ءتيىستى ورگاندارعا جولدانادى, – دەيدى «جاستار رۋحى» جاستار قاناتىنىڭ توراعاسى اقەركە يسكاندەروۆا.
مەملەكەت باسشىسى قۇقىق قورعاۋ ورگاندارىنىڭ باسشىلارىمەن كەڭەستە «زاڭ جانە ءتارتىپ» قاعيداتىن ۇستانۋ قوعامنىڭ يدەولوگيالىق جانە ساياسي نۇسقاۋلىعىنا اينالۋى قاجەت ەكەنىن باسا ايتقان. سونداي-اق پرەزيدەنت «ادال ادام – ادال ازامات – ادال تابىس» اتتى ۇلتتىق قۇرىلتايدىڭ ءۇشىنشى وتىرىسىندا «ەل ىشىندەگى تارتىپكە ءار وتانداسىمىز جاۋاپتى» دەگەن ەدى. بۇل باعىتتا «قاۋىپسىز قالا» اكتسياسى ءوز ۇلەسىن قوسىپ جاتىر. ويتكەنى ناۋقان كامەلەتكە تولماعان جەتكىنشەكتەردىڭ قۇقىقتىق مادەنيەتى مەن جاۋاپكەرشىلىگىن ارتتىرۋعا, اتا-انالارعا بالالارىن زاڭعا قۇرمەتپەن قاراۋعا تاربيەلەۋگە ۇگىتتەيدى.
نەگىزىنەن اكتسيا جاسوسپىرىمدەردى جازالاۋعا ەمەس, ولاردى قاۋىپتى ارەكەتتەردەن قورعاۋعا, رەيد كەزىندە ءتۇسىندىرۋ جۇمىستارىنا كوبىرەك زەيىن قويادى. دەمەك مۇنداي ءىس-شارالارعا تەك ەرىكتىلەر مەن پوليتسيا قىزمەتكەرلەرى عانا ەمەس, سونىمەن قاتار اكىمدىك وكىلدەرى, ءماسليحات دەپۋتاتتارى مەن قوعام تىرشىلىگىنە بەيجاي قارامايتىن جاناشىر تۇرعىندار قاتىسا الادى.
ازىرگە «جاستار رۋحى» بەلسەندىلەرى كۇندىزگى رەيد جۇمىستارىن كوپقاباتتى ءۇيدىڭ اۋلالارىندا, ساياباقتار مەن قالا كوشەلەرىندە جالعاستىرىپ ءجۇر. بۇل ۋاقىتتا بەلسەندىلەر اۋلالاردىڭ جارىقتاندىرۋ دەڭگەيىن, اشىق جاتقان ليۋكتەر مەن سىنعان اينەكتەردىڭ بار-جوعىن, بالالار الاڭدارىنداعى قاۋىپسىزدىك جاعدايىن ءجىتى تەكسەرەدى. جۇمىس ناتيجەسىندە انىقتالعان ولقىلىقتار كوممۋنالدىق قىزمەت ورتالىقتارىنا حابارلانادى. ىلكىمدى باستاما جىل بويى جالعاسادى.
