پريگورودنىي اۋىلىندا ىنتىماعى جاراسقان, ەڭبەكتەن باقىتىن تاپقان بيكتاشەۆتار وتباسى تۇرادى. ءبىر ەرەكشەلىگى, ىستىق ۇيادا, شىرايلى شاڭىراقتا ءتالىم-تاربيە العان, تەپسە تەمىر ۇزەتىن ءۇش بىردەي جىگىت جەر ەمشەگىن ەمىپ, مەحانيزاتورلىق ماماندىقتى قاپىسىز يگەرگەن. ۇشەۋى دە قابىرعاسى قاتىپ, بۋىنى بەكىمەستەن تەحنيكاعا ءۇيىر بولىپ ءوسىپتى. كوزىن اشقاننان كورگەنى وسى بولعان سوڭ, ەلبەسىپ-سەلبەسىپ ەر جەتكەن اعايىندى ازاماتتار ەل ىشىندەگى تەحنيكا اتاۋلىنى بالا كەزىنەن باستاپ تىزگىندەپ, كوز كورىپ, قول ۇيرەنگەن سوڭ مايتالمان مامانعا اينالعان.
اعايىندىلاردىڭ ۇلكەنى دەنيس فاريتوۆيچ ورتا مەكتەپتى بىتىرگەننەن كەيىن ەڭبەك جولىن «راسسۆەت» شارۋا قوجالىعىندا باستادى. ىنتالى جىگىت شاعىن شارۋا قوجالىعىنىڭ بار شارۋاسىن ۇرشىقشا ءيىرىپ اكەتكەن. ءبىر ايتا كەتەرلىگى, بۇل وڭىردە دە الدىنان جۇمىس ۇركىپ وتىراتىن مەحانيزاتورلار جەتىسپەيدى. سەبەبىن دە سۇراپ كوردىك. دەنيس ءفاريتوۆيچتىڭ ايتۋىنا قاراعاندا, شالعايداعى شاعىن اۋىل جاستارىنىڭ وسى ءبىر قات ماماندىقتان قول ءۇزىپ قالۋىنىڭ الدەنەشە سەبەبى بار, بىرىنشىدەن, وتپەلى كەزەڭنىڭ وكپەك جەلى شارۋاشىلىقتاردىڭ تۇندىگىن جەلپىلدەتكەن قيىن كەزدە مەحانيزاتورلارعا اۋىلدىق جەردە جۇمىس بولماي قالدى. بارىنىڭ ءوزى كوكتەمگى ەگىس, كۇزگى وراق سىندى ناۋقاندىق جۇمىس كەزىندە عانا. ادال ەڭبەكتەرىنە ساي ەڭبەكاقى دا جارىتىمسىز بولدى. ءبىرىن ەكى ەتە الماي جاتقان شارۋاشىلىق باسشىلارى جۇمىسشىلاردىڭ ەڭبەكاقىسىن ءشوپ, سابان, استىق قالدىعى ءتارىزدى ونىمدەرمەن وتەدى. تابانى تاستان تايماعان تارلانبوزداي كۇندى تۇنگە, ءتۇندى كۇنگە ۇلاستىرىپ ادال ەڭبەك ەتكەن ادامدار تابىسىنا اۋىز جارىماعاننان كەيىن مەحانيزاتورلىق ماماندىقتان قول ءۇزىپ قالدى. ءارى جاستاردىڭ دا ەڭبەككە دەگەن كوزقاراسى كۇرت وزگەردى, تابىسى مول جەڭىل جۇمىس ىزدەي باستادى. اعا بۋىن زەينەت دەمالىسىنا شىعىپ كەتكەن. دەنيس شارۋا قوجالىعىنان كەيىن ءۋاليحانوۆ اۋىلىنداعى «جەر-1» جاۋاپكەرشىلىگى شەكتەۋلى سەرىكتەستىگىندە مەحانيزاتور بولىپ ەڭبەك ەتتى. كەيىنگى تولقىنعا ونەگە كورسەتتى. تەحنيكا ءتىلىن مەڭگەرتۋمەن قاتار, ەڭبەكتىڭ قادىرىنە جەتۋ, ءوز جۇمىسىن تاپ-تۇيناقتاي ەتىپ اتقارۋ ازاماتتىققا سىن ەكەندىگىن سانالارىنا قۇيدى. جاي سوزبەن عانا ەمەس, ءوزىنىڭ تەگەۋرىندى ىسىمەن.
اعايىندىلاردىڭ ورتانشىسى ۆيتالي فاريتوۆيچ «باۋىر-اگرو» سەرىكتەستىگىنىڭ مەحانيزاتورى. ول دا بۇرىن «ايا ليۋتس», «ازامات-4» شارۋا قوجالىقتارىندا جۇمىس ىستەگەن.
– مەن مەحانيزاتور بولعانىمدى ماقتان تۇتامىن, – دەيدى ۆيتالي فاريتوۆيچ. – ءبىز الا جازداي تىربانىپ تىرشىلىك ەتىپ, ەل يگىلىگىن ەسەلەسەك, جالعىز ءوزىمىزدىڭ ناپاقامىز ەمەس, جالپاق جۇرتقا ورتاق ىرىزدىق. بايقاپ قاراساڭىز, مەحانيزاتور بولۋ دا وڭاي ەمەس. ءدان وسسە, ماڭداي تەرمەن وسەدى. ەڭ الدىمەن جەر تىنىسىن, اۋا رايىنىڭ اۋ-جايىن تامىرشىداي تاپ باسىپ اڭعارا بىلگەن ءجون. سودان سوڭ ءدان سەبەتىن ۋاقىتتى, توپىراقتىڭ جىلۋىن, ىلعالدىڭ جايىن سەزىنە ءبىلۋ كەرەك. ارينە, قازىرگى تەحنيكا ءبىزدىڭ اكەلەرىمىز بەن اتالارىمىز تىزگىندەگەن تەحنيكا ەمەس, جەتىلگەن, جاڭارعان. سوندا دا تىزگىنىن ۇستاعان سوڭ ءتىلىن تابۋىڭ شارت.
كەنجە ۇل راميل فاريتوۆيچ اعالارىنىڭ جولىن قۋىپ, مەحانيزاتور بولۋعا اڭسارى اۋعان. «ارعىن ت-50» جاۋاپكەرشىلىگى شەكتەۋلى سەرىكتەستىگىندە جۇمىس ىستەيدى. قوعامدىق جۇمىسقا دا ءجيى ارالاسادى. اقىق ءدان ايالاعان اۋلەتتىڭ ساۋلەلى سوقپاعىن جالعاستىرىپ كەلە جاتقان ابىرويلى ازاماتتىڭ ءبىرى.
– مەحانيزاتورلىق ماماندىق ءبىلىم مەن بىلىكتى عانا ەمەس, جاۋاپكەرشىلىكتى دە قاجەت ەتەدى. ءبىزدىڭ ەڭبەگىمىز ارقىلى شارۋاشىلىق, شارۋاشىلىق قانا ەمەس, قوعام يگىلىككە يە بولادى. اۋىلدىق جەردە مەحانيزاتورعا جۇمىس جەتەرلىك. كوكتەم كەلىسىمەن استىقتى القاپتى وڭدەۋگە شىعامىز. بۋسانىپ, بالبىراپ جاتقان دالا توسىنە بولاشاق ىرىزدىقتىڭ تۇقىمىن سەبەمىز. شىنىن ايتقاندا, وسى ءبىر كورىنىستەن كادىمگىدەي ءلاززات الامىن, قارا بۇيرا توپىراققا ەككەن ءداننىڭ كوگەرىپ, كوكتەپ شىعۋى ءبىر عاجاپ دۇنيە. ودان سوڭ بالاپانداي باپتاپ, كوك وسكىندى ايالاۋ تىلمەن ايتىپ جەتكىزگىسىز قۋانىش. سارشا تامىزدا, ساعىم ويناعان سارى دالادا تەڭىزدەي تولقىعان ءداندى القاپتىڭ ماساقتارى جايناپ تۇرادى. تەحنيكانى ۋاقىتىندا دايىنداپ, كۇتىپ باپتايمىز. جاۋاپتى ناۋقاندا تۇرىپ قالماۋى كەرەك. ول ۋاقىتتا قاس-قاعىم ءسات قىمبات. اگرونوممەن اقىلداسىپ, اۋا رايىن بولجاپ ۇمىتپەن ەككەن ەگىنىڭ جايقالىپ شىققانى – جان راحاتى.
ۆيتالي ءفاريتوۆيچتىڭ ويىنشا, ۇجىمداسا ەڭبەك ەتكەن ۇتىمدى. اۋا رايىنىڭ سىناعىنا توتەپ بەرۋدە دە يىق تىرەستىرىپ ەڭبەك ەتەتىن, ءبىر ماقساتتا جۇمىلعان ۇجىم بولعانى جاقسى. ونىڭ ۇستىنە ءار جىل سايىن جاڭارىپ جاتاتىن قۇرىلعىلاردى, الۋان ءتۇرلى تەحنيكالاردى مەڭگەرە ءبىلۋىڭ كەرەك.
اعايىندى مەحانيزاتورلار ەل ىشىندە ۇلكەن بەدەلگە يە. ولاردىڭ ەڭبەكقورلىعى, ىسكەرلىگى جاستارعا ۇلگى رەتىندە ءجيى ايتىلادى. بيكتاشەۆتار اۋلەتىنىڭ بەرەكەلى ەڭبەگى ەل يگىلىگىن ەسەلەۋگە جۇمسالىپ جاتىر. قولدارى قالت ەتكەندە ءوز شارۋالارىمەن اينالىسادى, انالارىنا كومەكتەسەدى. باقىتىن بايتاق دالادان تاپقان, ون ساۋساعىنان ونەر تامعان وسى ءبىر اۋلەتتىڭ تاماشا تاعىلىمى جاستارعا جاقسى ۇلگى.
اقمولا وبلىسى,
جارقايىڭ اۋدانى
