اقتوبەدە تاعى دا وقۋشى جوعالىپ وتىر

استانا. 10 اقپان. اقتوبە قالاسىندا تاعى دا وقۋشى جوعالىپ كەتتى. سىنىپتاستارىمەن مۇزعا سىرعاناۋعا كەتكەن بالا قايتىپ ۇيىنە ورالماعان. وسىدان كەيىن ونىڭ اتا-اناسى پوليتسياعا بارىپ حابار بەرەدى. بۇل تۋرالى 24KZ حابارلادى. ءتارتىپ ساقشىلارى مەن تۋىستارى بىرلەسە وتىرىپ, وقۋشىنى شارق ۇرىپ ىزدەي باستايدى. ون جاستاعى يسلام قازبەكوۆتىڭ سۋرەتىن الىپ, بۇكىل قالادا ىزدەستىرۋ شارالارىن جۇرگىزگەن. «ون ەكىدەن جيىرما مينۋت كەتكەندە, اقتوبە قالالىق ىشكى ىستەر باسقارماسى باستىعىنىڭ ورىنباسارى ءوزى جەكە شىعىپ پاترۋلدەۋ كەزىڭدە «مەگا» ويىن ساۋىق ورتالىعىنىڭ ارتىندا ۇلكەندەرسىز, جالعىز كەتىپ بارا جاتقان كىشكەنتاي بالانى كورگەن. قاسىنا بارىپ ەسىمىن سۇراعاندا ول يسلام ەكەنىن ايتقان», - دەدى وبلىستىق ىشكى ىستەر دەپارتامەنتىنىڭ ءباسپاسوز حاتشىسى ارداگەر ۋايدين. وسىلايشا, ارادا توعىز ساعات وتكەن سوڭ پوليتسەيلەر يسلامدى تۋىستارىنا تابىستادى. ايتا كەتۋ كەرەك, اقتوبەدە بۇعان دەيىن دە بالالاردىڭ جوعالۋ دەرەكتەرى تىركەلگەن ەدى. بىلتىر بەس جاسار تەمىرلان جوعالىپ كەتىپ, ەكى جەتىدەن سوڭ ءمايىتى تابىلدى. ال حرومتاۋ اۋدانىنداعى ون بەس جاسار لەونيد يششەنكودان ءالى كۇنگە دەيىن حابار جوق. قۇرىش نۇرىمبەت.