شىمكەنتتە كۇتۋشى ەكى ءسابيدى ولتىرە سوققىعا جىققان

استانا. 10 اقپان. شىمكەنتتە بالا كۇتۋشى ەكى ءبۇلدىرشىندى ءولىمشى ەتۋ حالىنە جەتكىزە ساباعان. بۇل تۋرالى 24KZ ارناسى حابارلادى. ارنا ءتىلشىسىنىڭ بايانداۋىنشا, پروكۋرورلار: «اناسىنان امانات ەتىپ العان سابيلەرگە 33 جاستاعى كەلىنشەك قورلىق كورسەتكەن», - دەيدى. قازىر ەكى ءبۇلدىرشىن دە اۋرۋحانانىڭ جانساقتاۋ بولىمىندە جاتىر. ارەكەتتىڭ اشكەرە بولۋىنا 4 جاسار قىزدىڭ اۋىر دەنە جاراقاتىمەن وبلىستىق بالالار اۋرۋحاناسىنا جەتكىزىلۋى سەبەپ بولعان. مۇنى كورە سالىپ, دارىگەرلەر بىردەن پوليتسياعا حابار بەرىپتى. پوگوندىلار مەكەن جايدى انىقتاي كەلە, تاعى ءبىر 2 جاسار ءسابيدىڭ سوققىعا جىعىلىپ جاتقانىن بايقاعان. ءتارتىپ ساقشىلارى بۇل نارەستەنى دە اۋرۋحاناعا جەتكىزەدى. «بەس جاسار بالانىڭ جاعدايى وتە اۋىر. ومىرىنە ۇلكەن قاۋىپ ءتونىپ تۇر. سەبەبى, كوما 3-دارەجەسىندە. بەتى ءالى بەرى قاراعان جوق. ەكىنشى بالانىڭ جالپى جاعدايى جامان ەمەس. ورتاشا قالىپتا. بۇگىنگى تاڭدا ول دا جانساقتاۋدا قالادى. ەرتەڭدەرى بولىمشەگە اۋىستىرۋىمىز مۇمكىن. ونىڭ ومىرىنە قاۋىپ جوق», - دەدى بالالار اۋرۋحاناسى باس دارىگەرىنىڭ ورىنباسارى بولات نۇسقاباەۆ. بۇلدىرشىندەردىڭ ەكەۋى دە باسىنان اۋىر سوققى العان. دەنەلەرىنىڭ ساۋ جەرى قالماعان. بەت-اۋزى مەن اياق-قولدارى كوگەرىپ, جارالانعان تۇستارى دا جەتەرلىك. قازىر وسىنداي اياۋسىز بوپسالاۋعا بايلانىستى بالا كۇتۋشىنىڭ ۇستىنەن «قاساقانا اۋىر دەنە جاراقاتتارىن سالۋ» دەرەگى بويىنشا قىلمىستىق ءىس قوزعالىپ, اباقتىعا جابىلعان. «بۇل جاعداي بويىنشا قىلمىستىق ءىس قوزعالىپ, 106-باپپەن ءىس قوزعالىپ, ءىس شاراسى ءجۇرىپ جاتىر. گۇلچەحرا دەگەن كەلىنشەك ۋاقىتشا ۇستاۋ وقشاۋلاعىشقا قامالىپ, قازىر باس شاراسى, سانكتسياسى شەشىلۋدە», - دەدى اباي اۋداندىق پروكۋرورىنىڭ ورىنباسارى ەرمەك ءايتىموۆ. قۇزىرلىلاردىڭ ايتۋىنشا, كۇدىكتى ەكى ءبۇلدىرشىندى شۋلاپ, تىنىشىن بۇزعان سوڭ ساباعان. ءبىر ايتا كەتەرلىگى, بالا كۇتۋشىنىڭ ءوزىنىڭ 3 بالاسى بار ەكەن. «نەگىزىنەن, اناسى بۇلدىرشىندەردى وتكەن ايدا, ياعني قاڭتار ايىندا كۇتۋشىنىڭ قاراۋىنا بەرگەن. ءوزى شالعاي جەردە جۇمىس ىستەيتىن, جالعىزباستى كەلىنشەك 70 مىڭ تەڭگە اقى تولەپ, سابيلەرىن كۇتۋشىنىڭ ۇيىنە تاستاپ كەتكەن. ۇل-قىزىن سوڭعى مارتە 27 قاڭتاردا كورگەن انانىڭ قازىر ءوزى دە تەرگەلىپ جاتىر. ايتا كەتۋ كەرەك, بۇل جىل باسىنان بەرى سابيلەردىڭ ەرەسەكتەردەن قورلىق كورىپ, سوققىعا جىعىلعان وڭتۇستىك قازاقستانداعى وسىمەن ەكىنشى وقيعاسى بولىپ وتىر», - دەپ تۇيىندەيدى تەلەارنا ءتىلشىسى. قۇرىش نۇرىمبەت.