سولتۇستىك قازاقستان سوتى ۇكىمدى وزگەرىسسىز قالدىردى

پەتروپاۆل. 19 ماۋسىم. اۋىر قىلمىس جاساعانى ءۇشىن باس بوستاندىعىنان ايرىلعان اقجار اۋداندىق ىشكى ىستەر ءبولىمى باسشىسىنىڭ ورىنباسارى مەن اۋىلدىق ۋچاسكەلىك پوليتسەيگە تاعايىندالعان جازا وزگەرىسسىز قالدى. بۇل تۋرالى وبلىستىق سوتتىڭ ءباسپاسوز قىزمەتى حابارلادى. وقيعا وتكەن جىلى بولعان. ميى شايقالىپ, اۋرۋحاناعا تۇسكەن ەر ادامنىڭ جاعدايىن كورگەن مەدبيكەلەر بىردەن پوليتسياعا حابار بەرگەن.  الايدا, جابىرلەنۋشىنى سوققىعا جىققان كۇدىكتى تابىلىسىمەن ءىس زاڭعا قايشى باعىتتا ءوربي باستاعان. سوتتا بەلگىلى بولعانداي اۋداندىق ىشكى ىستەر ءبولىمى باسشىسىنىڭ تەرگەۋ جونىندەگى ورىنباسارى ك. دايىروۆ پەن ۋچاسكەلىك پوليتسەي ق.ۇسەنوۆ كۇدىكتىنى الداپ-قورقىتۋ ارقىلى قوماقتى قاراجاتقا كەنەلمەك بولعان. ولار ونى قىلمىستىق جازادان بوساتا الاتىندارىنا سەندىرىپ, “قايىرىمدىلىق” قىزمەتىن 300 مىڭ تەڭگەگە باعالاعان. قولىنا كىسەن سالىنىپ, تەمىر تورعا توعىتىلاتىنىن ەستىگەن كۇدىكتىنىڭ كەلىسپەسكە امالى قالماعان. شاراسىز كۇيگە تۇسكەن اۋىل تۇرعىنى سىبايلاس جەمقورلىققا قارسى كۇرەس ءبولىمى قىزمەتكەرلەرىنە قايرىلۋعا ءماجبۇر بولعان.  ق.ۇسەننوۆ ءتيىستى اقشانى الۋ ۇستىندە قۇرىقتالعان. بۇل كەزدە ك.دايىروۆ ارىپتەسىن جانار-جاعارماي قۇيۋ ستانتسياسىنىڭ جانىندا كۇتىپ تۇرعان. سوت ۇكىمىندە كورسەتىلگەندەي ك.دايىروۆ كىناسىن مويىنداماعان. ال ق.ۇسەنوۆ ونىڭ باستاماسى بويىنشا قىلمىستى جاسىرۋ فاكتىسىن اشكەرەلەمەك بولعان كورىنەدى. وبلىستىق اپپەلياتسيالىق سوت القاسى اۋداندىق سوتتىڭ ك.دايىروۆتى – 4 جىلعا, ق.ۇسەنوۆتى 3 جىلعا باس بوستاندىعىنان ايىرۋ تۋرالى ۇكىمىن قاراي كەلىپ, وزگەرىسسىز قالدىردى. ءومىر ەسقالي. دەرەك: سولتۇستىك قازاقستان وبلىستىق سوتىنىڭ ءباسپاسوز قىزمەتى. دەرەك: egemen.kz