قىزىلوردالىق جۋرناليست ايعالي قارابالاەۆ ومىردەن ءوتتى

استانا. 19 ماۋسىم. قىزىلوردادان سۋىت حابار كەلدى: وبلىستىق «سىر بويى» گازەتىنىڭ بەلدى دە بايىرعى جۋرناليستەرىنىڭ ءبىرى ايعالي قارابالاەۆ كەنەتتەن قايتىس بولىپتى. بۇل تۋرالى «سىر بويى» گازەتىندەگى ارىپتەستەرىمىز حابارلادى. قارابالاەۆ ايعالي امانجول ۇلى 1963 جىلى 15 اقپاندا وزبەكستاننىڭ سىرداريا وبلىسى, كيروۆ اۋدانى, كۋيبىشەۆ سەلوسىندا تۋعان. ال بالالىق شاعىنان باستاپ, بارلىق سانالى عۇمىرى قىزىلوردا قالاسىندا ءوتتى. ول 1980 جىلى وبلىس ورتالىعىنداعى №212 مەكتەپتى بىتىرگەننەن كەيىن «ترانساگەنستۆو» مەكەمەسىنە تاسقالاۋشى بولىپ جۇمىسقا ورنالاسادى. ا.قارابالاەۆ 1983-1989 جىلدارى قازىرگى ءال-فارابي اتىنداعى قازاق ۇلتتىق ۋنيۆەرسيتەتىن سىرتتاي وقىپ بىتىرگەن. جۋرناليست رەتىندەگى ەڭبەك جولىن 1985 جىلى قىزىلوردا وبلىستىق «لەنين جولى» (قازىرگى «سىر بويى») گازەتىندە تىڭداۋشى, كوررەكتور بولۋدان باستادى. ءبىر كەزدەرى جاۋاپتى حاتشىنىڭ ورىنباسارى, ءوندىرىس, قۇرىلىس جانە ترانسپورت سەكتورىنىڭ مەڭگەرۋشىسى بولىپ قىزمەت ىستەدى, رەداكتسيا جانىنداعى «دارمەن» كوممەرتسيالىق فيرماسىن باسقاردى. سودان سوڭ حاتتار سەكتورىنىڭ ادەبي قىزمەتكەرى, جارناما بيۋروسىنىڭ ءتىلشىسى, گازەتتىڭ سىرداريا, جالاعاش جانە قارماقشى اۋداندارىنداعى مەنشىكتى ءتىلشى بولدى. بۇدان كەيىن ءومىرىنىڭ سوڭىنا دەيىن الەۋمەتتىك ماسەلەلەر, ساۋلەت بولىمدەرىنىڭ ءتىلشىسى بولىپ قىزمەت اتقاردى. وسىلايشا «سىر بويى» باسىلىمىندا تابان اۋدارماستان, تۋرا 30 جىل ەڭبەك ەتتى. ايعالي جۇمىسقا دا, دوسقا دا بارىنشا ادال, جۇرەگى كەڭ ازامات ەدى. ول قولىنا قانداي ءىستى السا دا, سونى كوڭىلدەگىدەي ورىنداعانشا تىنىم تاپپايتىن تاباندى دا جىگەرلى مامان بولاتىن. ءوزى جاستايىنان باستى تاقىرىبىنا اينالدىرعان وبلىستىڭ ءوندىرىسى مەن ونەركاسىبى, ترانسپورتى مەن قۇرىلىسى, بايلانىسى مەن كوممۋنالدىق شارۋاشىلىق سالالارىنىڭ بىلگىر ءجۋرناليسى ەدى. ومىردەن وسىلاي ناعىز ەڭبەكتىڭ تورىسى اتانعان تاعى ءبىر بۇقارالىق اقپارات قۇرالدارىنىڭ وزىندىك ورنى بار وكىلى ءوتتى. مارقۇمنىڭ سوڭىندا جۇبايى, ءبىر ۇلى مەن ءبىر قىزى قالدى. ءبىز ايعالي امانجول ۇلىنا جاتقان جەرىڭىز جايلى, توپىراعىڭىز تورقا بولسىن دەگىمىز كەلەدى. تالعات رايىمبەك. دەرەك, فوتو: سىر بويى.