سولتۇستىكقازاقستاندىق بويجەتكەن كيكبوكسينگتەن رەكورد جاڭارتتى

پەتروپاۆل. 19 ماۋسىم.  كيكبوكسينگتەن وتكەن قازاقستان چەمپيوناتىندا 18 جاستاعى پەتروپاۆلدىق جادىرا احماديەۆا جەڭىستىڭ ەڭ بيىك تۇعىرىنا كوتەرىلىپ, التىن مەدال ولجالاپ ورالدى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ماماندارى حابارلادى. جادىرانىڭ سپورتتىڭ بۇل تۇرىمەن شىنداپ اينالىسقانىنا ەكى جىل عانا. بۋحگالتەرلىك كوللەدجدە وقيتىن ول دودالى جارىستا 52 كيلو سالماق بويىنشا كۇرەسىپ, ءتورت قارسىلاسىن دا باسىمدىقپەن ۇتقان. «بۇرىندارى سولتۇستىكقازاقستاندىق بويجەتكەندەر ەكىنشى ورىننان جوعارى كوتەرىلە المسا, مەنىڭ شاكىرتىم قىزىلجار ءوڭىرىنىڭ تاريحىندا رەكوردتى جاڭارتتى. ەندى ونى قازاقستان قۇراما كومانداسىنىڭ مۇشەسى رەتىندە ينديادا تامىز ايىندا وتەتىن ازيا بىرىنشىلىگى كۇتىپ تۇر», دەيدى چەمپيوننىڭ جاتتىقتىرۋشىسى ءادىل نۇرجاۋىپوۆ. قازاقستان چەمپيوناتىندا وزگە سولتۇستىكقازاقستاندىق كيكبوكسينگشىلار دا تابىستى ونەر كورسەتتى. ولار كوماندالىق ەسەپتە 1 التىن, 2 كۇمىس, 2 قولا مەدالدى يەلەندى. ءومىر ەسقالي. دەرەك: سولتۇستىك قازاقستان وبلىستىق دەنە شىنىقتىرۋ جانە سپورت باسقارماسى. سۋرەت: egemen.kz