بۇگىن پرەمەر-مينيستر ولجاس بەكتەنوۆ قىتايلىق China CAMC Engineering Co., Ltd. (CAMCE) كومپانياسىنىڭ پرەزيدەنتى لي حايسينمەن كەزدەسۋ وتكىزدى.
China CAMC Engineering Co., Ltd. – 60-تان استام ەلدە ينفراقۇرىلىمدى, ونەركاسىپتى جانە ەنەرگەتيكانى دامىتۋ سالالارىندا كەشەندى EPC-جوبالاردى ىسكە اسىراتىن جانە قىتايدىڭ Sinomach Group (China National Machinery Industry Corporation) ماشينا جاساۋ جونىندەگى ءىرى مەملەكەتتىك كونگلومەراتىنىڭ قۇرامىنا كىرەتىن جەتەكشى حالىقارالىق ينجينيرينگتىك كومپانيا.
كومپانيا پرەزيدەنتى لي حايسين الاتاۋ قالاسىنىڭ كولىك-لوگيستيكالىق جانە يندۋستريالىق ينفراقۇرىلىمىن دامىتۋ سالاسىنداعى ينۆەستيتسيالىق ىنتىماقتاستىقتىڭ پەرسپەكتيۆالارى تۋرالى بىرقاتار ۇسىنىس ايتتى. «ورتا ءدالىزدى» دامىتۋ اياسىنداعى ىنتىماقتاستىققا نازار اۋدارىلدى.
«ۇكىمەت جۇمىسىنىڭ باسىم باعىتتارىنىڭ ءبىرى – بارىنشا قولايلى ينۆەستيتسيالىق احۋال قالىپتاستىرۋ. بۇل ناقتى ەكونوميكاعا تىكەلەي شەتەلدىك ينۆەستيتسيالاردى تارتۋعا جانە ەلىمىز ءۇشىن ماڭىزدى جوبالاردى ىسكە اسىرۋدى قامتاماسىز ەتۋگە, جاڭا جۇمىس ورىندارىن اشۋعا مۇمكىندىك بەرەدى. كەيىنگى التى جىلدا ەلىمىزگە تارتىلعان تىكەلەي شەتەلدىك ينۆەستيتسيالار كولەمى شامامەن 130 ملرد دوللاردى قۇرادى. بۇل رەتتە مەملەكەت باسشىسىنىڭ شيكىزاتتىق ەمەس سالالاردىڭ تارتىمدىلىعىن ارتتىرۋ بويىنشا باستاماشىلىق جاساعان شارالارى ناتيجە بەرۋدە – شيكىزاتتىق ەمەس سەكتورعا شەتەلدىك ينۆەستيتسيالار 72,7 ملرد دوللاردى قۇرادى, ياعني شەتەلدىك ارىپتەستەر قايتا وڭدەۋ ونەركاسىبى سالالارىنا كوبىرەك ينۆەستيتسيا سالا باستادى», دەدى و.بەكتەنوۆ.
كەزدەسۋ قورىتىندىسى بويىنشا ءتيىستى مەملەكەتتىك ورگاندارعا ينۆەستيتسيالىق ۇسىنىستى ەگجەي-تەگجەيلى پىسىقتاۋ تاپسىرىلدى.
