فوتو: ۇكىمەتتىڭ ءباسپاسوز قىزمەتى
قانات بوزىمباەۆ يكاو-عا قازاقستانمەن ىنتىماقتاستىق ماسەلەلەرى بويىنشا تۇراقتى قولداۋ كورسەتكەنى ءۇشىن ريزاشىلىعىن ءبىلدىردى. سونداي-اق تاۋەلسىز ساراپشى تورمودۋر تورمودسسوندى Azerbaijan Airlines ۇشاعى اپاتقا ۇشىراعان جەرگە ۋاقتىلى جىبەرگەنى ءۇشىن العىسىن ايتتى.
«بىزگە كورسەتكەن تۇراقتى قولداۋىڭىزعا, سونىڭ ىشىندە باستامالارىمىزدى قولداعانىڭىز ءۇشىن ۇكىمەت اتىنان شىن جۇرەكتەن العىسىمدى بىلدىرەمىن. وسى تەرگەۋدى تولىق اياقتاۋ ماقساتىندا ءبىز يكاو-مەن ءوزارا ءىس-قيمىلدى جالعاستىرامىز», دەدى قانات بوزىمباەۆ.
ۆيتسە-پرەمەر ۇشاق اپاتىنىڭ العاشقى كۇندەرىنەن باستاپ قازاقستاننىڭ وبەكتيۆتى جانە جان-جاقتى تەرگەۋ جۇرگىزۋگە باسىمدىق بەرگەنىن اتاپ ءوتتى.
ءوز كەزەگىندە نيكوليا راللو قازاقستاننىڭ قىسقا مەرزىم ىشىندە دايىنداعان جانە جاريالاعان «Azerbaijan Airlines» اۋە كومپانياسىنىڭ ۇشاعىنىڭ اپاتى تۋرالى الدىن الا ەسەبىن جوعارى باعالادى.
«اپاتتان كەيىن 1,5 ايعا جەتپەس ۋاقىت ىشىندە الدىن الا قورىتىندىنى اياقتاۋعا قول جەتكىزگەن قازاقستان مەن تەرگەۋ كوميسسياسىنىڭ جۇمىسىن اتاپ وتكىم كەلەدى. مەن ءسىزدى تەرگەۋ بارىسىندا حالىقارالىق ازاماتتىق اۆياتسيا تۋرالى كونۆەنتسيانى تولىق ورىنداۋدى جالعاستىرۋعا شاقىرامىن», دەدى نيكوليا راللو.
ايتا كەتەيىك, اقتاۋداعى ۇشاق اپاتىن تەرگەۋ بويىنشا قورىتىندى ەسەپ چيكاگو كونۆەنتسياسىنا سايكەس وسى جىلدىڭ سوڭىنا دەيىن جاريالانادى.
