اكادەميك نايليا ورازعۇلقىزى بازانوۆا – قازاقستان مەن ورتالىق ازياداعى تۇڭعىش ايەل-اكادەميك, كورنەكتى فيزيولوگ, قوعام قايراتكەرى. ول قازاق ايەلدەرى اراسىنان شىققان تۇڭعىش بيولوگيا عىلىمىنىڭ دوكتورى, پروفەسسور, قازاق كسر عىلىم اكادەمياسىنىڭ اكادەميگى, قازاقستاننىڭ ەڭبەك سىڭىرگەن عىلىم قايراتكەرى.
ۇعا پرەزيدەنتى, اكادەميك اقىلبەك كۇرىشباەۆ عالىم ارۋلاردى 8 ناۋرىز حالىقارالىق ايەلدەر مەرەكەسىمەن قۇتتىقتاپ, ەلىمىزدەگى عىلىمدى دامىتۋدىڭ ماڭىزىن اتاپ ءوتتى.
ايتۋلى شاراعا عىلىمدى دامىتۋعا ايرىقشا ۇلەس قوسىپ جۇرگەن 400-گە جۋىق جەتەكشى ايەل-عالىمدار, عىلىمي قىزمەتكەرلەر, وقىتۋشىلار مەن جوعارى وقۋ ورىندارىنىڭ, عىلىمي ۇيىمداردىڭ باسشىلارى قاتىسىپ, ايەل-عالىمدارعا ارنالعان اكادەميك ن.بازانوۆا اتىنداعى ماراپات وتاندىق عىلىمنىڭ دامۋىنا ايرىقشا ۇلەس قوسىپ, عىلىمنىڭ ءارتۇرلى باعىتتارىندا ۇزدىك ناتيجە كورسەتىپ جۇرگەن 48 عالىمعا تابىس ەتىلدى. ماراپاتقا لايىقتى ۇمىتكەرلەر ۋنيۆەرسيتەتتەر مەن عىلىمي-زەرتتەۋ ينستيتۋتتارى ۇجىمدارىنىڭ ۇسىنىستارى بويىنشا انىقتالدى.
«مەملەكەت باسشىسىنىڭ باستاماسىمەن «جاڭا قازاقستان» قۇرۋدى الدىمىزعا ماقسات ەتىپ قويىپ وتىرمىز. وسى كەشەندى جوسپاردىڭ ىشىندە ايەلدەردىڭ عىلىم سالاسىن دامىتۋداعى الار ورنى ەرەكشە بولماق. الدىمىزدا جاۋاپتى مىندەتتەر تۇر. پرەزيدەنت «ايەل – ءومىر تىرەگى عانا ەمەس, ءومىردىڭ ءوزى» دەي وتىرىپ, ايەلدەر ەڭبەگىن لايىقتى باعالاۋ, انا مەن وتباسىن قورعاۋ, رۋحاني قولداۋ – مەملەكەتتىك ساياساتتىڭ التىن ارقاۋى ەكەنىن ارقاشان اتاپ ايتىپ كەلەدى. وتكەن ءبىر جىلدىڭ ىشىندە قانشاما جاس عالىم قىزدارىمىز مەملەكەت باسشىنىڭ تاپسىرىسىمەن پاتەر الدى. مەملەكەتتىك سىيلىقتار, ستيپەنديا, گرانتتار يەگەرلەرى اتاندى. بۇل ءۇردىس ءالى دە جالعاسادى دەپ سەنەمىز. كوكتەم مەرەكەسى – بارشا نازىك جاندىلارعا دەگەن شەكسىز سۇيىسپەنشىلىكتىڭ بەلگىسىنە اينالدى. حالقىمىزدا «انا ۇلتتى تاربيەلەيدى» دەگەن قاناتتى ءسوز بەكەر ايتىلماعان. قوعامدا ايەلدەر كەڭىنەن ارالاسقان سالانىڭ بارلىعىندا جەڭىس تە, جەمىس تە قاتار جۇرەدى», دەپ اتاپ ءوتتى ۇعا پرەزيدەنتى.
بۇگىندە ەلىمىزدە عىلىممەن اينالىسىپ جۇرگەن ايەلدەر اراسىنداعى زەرتتەۋشى ماماندار 12 مىڭعا جۋىقتايدى. بۇل جالپى عالىمدار سانىنىڭ 55,6 پايىزىن قۇرايدى. عىلىمي دارەجە قورعاعان نازىك جاندىلار قاتارى جىل سايىن ءوسىپ كەلەدى. بيىلعى كورسەتكىش بويىنشا ايەلدەر اراسىنداعى عىلىم دوكتورلارى – 848, عىلىم كانديداتتارى – 2 872, PhD دوكتورلار – 1 806-عا جەتتى.
ۇعا دەرەكتەرى بويىنشا, بىلتىر قازاقستاندىق عالىم ايەلدەر Web of Science جانە Scopus جۋرنالدارىندا 3 مىڭنان استام ماقالا جاريالانىپ, 2023 جىلمەن سالىستىرعاندا 15 پايىزعا ارتقان. بىلتىر Web of Science ءبىرىنشى كۆارتيلىندەگى ەڭ بەدەلدى جۋرنالداردا جاريالاعان ماقالالار سانى 500-دەن استى.
الماتى
