فوتو: وقۋ-اعارتۋ مينيسترلىگى
Discover List — بۇل كورەرمەندى شابىتتاندىرىپ, ءتۇرلى ترەند جاساپ جۇرگەن, الەمنىڭ ءار تۇكپىرىندەگى ءتۇرلى مازمۇنداعى كونتەنت اۆتورلارىنا ارنالعان TikTok جوباسى.
وقۋ-اعارتۋ مينيسترلىگى بوتاگوز وماروۆانىڭ وسى تىزىمدەگى «وقىتۋشىلار» ساناتى بويىنشا ەڭبەگى ەلەنگەنىن اتاپ ءوتتى.
ءبىلىم بەرۋ سالاسىندا 20 جىلدان بەرى شاكىرت تاربيلەپ كەلە جاتقان ۇستاز TikTok-قا 2020 جىلى تىركەلىپ, پاراقشاسىن بەلسەندى جۇرگىزە باستاعان. بۇگىندە پاراقشاداعى جازىلۋشىلار سانى 160 مىڭنان اسقان.
ۇستازدىڭ ساباق بەرۋ پروتسەسىندەگى ەرەكشە ادىستەمەلەرى اۋديتوريا نازارىن اۋدارعان. بوتاگوز وماروۆا قىسقا بەينەروليكتەردە ءتىل مەن ادەبيەتتى ۇيرەنۋدىڭ كرەاتيۆتى جولدارىن ۇسىنادى.
جەلى پايدالانۋشىلارى پەداگوگتەن تەك ساباقتاعى ەرەجەلەردى ۇيرەنىپ قانا قويماي, سونىمەن قاتار مادەنيەتتى, تازا سويلەۋگە جانە ءتىلدىڭ ەرەكشەلىكتەرىن وڭاي تۇسىنۋگە بولاتىنىن جازعان.
«مەن ءتىلدى ۇيرەنۋ — ەرەجەلەردى ەستە ساقتاۋ ەمەس, قىزىقتى پروتسەسس ەكەنىن كورسەتكىم كەلدى», دەيدى پەداگوگتىڭ ءوزى.
ول TikTok-تىڭ وقىتۋشىلاردى قولدايتىن بىرقاتار جوباسىندا باق سىناپ, 2023 جىلى جەڭىمپاز اتانعان.
